Kenneth Kleist KAK-mi siulittaasussarsiornermut qinigassanngortippoq

Arsaattartut kattuffianni KAK-mi siulittaasumik nutaamik arfininngorneq oktoberip 21-at qinersisoqassaaq ileqquusumik ataatsimeersuartoqarnerani.

Maanna siulittaasuusoq Benjamin Kielsen siulittaasutut qinigassanngorteqqinnianngilaq maannamullu qinigassanngortilluni avammut nalunaaruteqartoq ataasiinnaavoq.

Taanna tassaavoq Kenneth Kleist Nuummi B-67-meersoq ukiorpaalunnilu nammineq piumassutsimik suliniarluni siulersuisuni sulinermi misilittagaqartoq.

- Sivisuumik eqqarsaatigereerlugu aalajangerpunga misiliiniarlunga, Kenneth Kleist KNR-mut oqarpoq.

B-67-ip Nunatta avataanut isumaqatigiissusiortarnerani malunniuteqartarpoq. Assersuutigalugu FC København, Klaksvik Savalimmiuni kiisalu Orebro Sverigemi isumaqatigiissusiorfigineqarput.

Unammersuariaaseq nutaaq

Maanna misigisimavoq KAK-mi akisussaaffimmik tigusinissamut.

- Ukiut arlallit B-67-mi aqutsisuni suleqataavunga suliani assigiinngitsuni siunnersuisarlunga. Imaanngikkaluarpoq suliara naammassisutut misigisunga, kisianni aamma Kalaallit Nunaanni inerisaaqataarusuppunga, Kenneth Kleist oqarpoq.

- Nunatsinni peqatigiiffiit akornanni qaninnerusumik suleqatigiinneq ineriartuutaasinnaasunillu siunnersoqatigiinneq maqaasisarpara, Kenneth Kleist oqarpoq, ilanngullugulu oqaatigaa KAK-mi siulersuisut ammanerunissaat maqaasisarsimallugu.

Suli nalunarpoq siulittaasussarsiornermi unammisoqarumaarnersoq. Arlallit qinigassanngortinniarnerat tutsiuttarpoq, taamaattoq qinigassanngortilluni pisortatigoortumik suli tutsiuttoqarani.

KAK-mi siulersuisunngortussat suliassaasa annertuut ilagaat futsalimi aamma silami arsaannermi unammersuariaasissaq.

- Oqallinnerup taassuma naammassinissaa assut pissanngatigaara. Qularinngilara pitsaasumik naammassineqarumaartoq iluatsissappalli tamatta suleqatigiittariaqarpugut, Kenneth Kleist oqarpoq.

KAK-mi malittarisassat malillugit siulittaasutut siulersuisunilu ilaasortatut qinersilivinneq tikillugu qinigassanngortittoqarsinnaavoq.