Benjamin Kielsen KAK-mi siulittaasutut tunuarniarpoq

Ukiut marluk kingulliit KAK-mi siulittaasoq Benjamin Kielsen Narsameersoq ileqquusumik ataatsimeersuarnissami siulittaasutut tunuarniarpoq.

- Uanga tamanna inuttut aalajangigarivara tassalu aalajangiuppara ileqquusumik ataatsimeersuarneq qaammat ataaseq qaangiuppat pilerpat siulittaasutut qinigassanngortissanngilanga, Benjamin Kielsen KNR-mut oqarpoq.

Ukiut marluk matuma siorna siulittaasussarsiorluni unammisoqarnerani qinigaavoq.

Benjamin Kielsen suli aalajanginngilaq siulersuisuni ilaasortatut qinigassanngortinniarnerluni.

- Suliniutit pissanganartut arlallit aallartitavut naammassiartulerput, Benjamin Kielsen oqarpoq.

- Unammersuariaatsip allanngortinnissaa naammassisussaavoq. Amerikap avannaani arsaattartut kattuffissuanni Concacaf-mi ilaasortanngorniarnerput maanna pissanganartorujussuarmut killippoq, siulittaasunngortussallu naatsorsuutigissavaa isumaqatigiinnniarnerit naammassiartorneranni angalangaatsiarnissaq, Benjamin Kielsen siulersuisunut qinigassanngortisinnaanerminut tunngaviusinnaasut pillugit oqarpoq.

KAK tassaavoq Kalaallit Nunaanni timersoqatigiit kattuffianni GIF-mi kattuffiit anginersaat tassanilu illup iluani arsaannermi futsalimi silamilu arsaannermi aaqqissuussarpassuit pisarput.

- KAK-mi siulittaasuulluni piffissartornartorujussuuvoq, Benjamin Kielsen oqarpoq.

- Futsalimi silamilu arsaannermi ilaasortarpassuaqarpugut pisussanillu aaqqissuussiniarnermi ataatsimiinnerpassuusarput. Tamanna siulittaasunngortussat piareersimaffigisariaqassavaa, Benjamin Kielsen oqarpoq.

Ulloq taanna siulittaasumut qinersilivinneq tikillugu siulersuisunut siulittaasumullu KAK-mi qinigassanngortittoqarsinnaavoq.