Unammersuariaasissaq pillugu KAK septembarimi aalajangerusuppoq
Ullut tamakkiallugit unammisarluni ullumikkut GM-riaaseq pisoqalivoq timimullu pitsaasuunani.
Kalaallit Nunaanni arsaattartut kattuffianni KAK-mi siulittaasoq Benjamin Kielsen taamatut eqikkaavoq aammalu siunissamut GM-riaasissaq pillugu KAK-mi siulersuisut suleqatigalugit septembarimi ataatsimiisitsilersaarluni.
KAK internet aqqutigalugu siorna isumasioqatigiissitsivoq upernaaq nanginneqartussaagaluartumik.
- Isumasioqatigiinnissamulli peqatigiifiit pingasuinnaat aalajangiinnissami pingaarutilimmi peqataaniarlutik nalunarput. Tulluartuusorinngilarput aalajangiinermi taama pingaaruteqartigisumi peqatigiiffiit taama ikitsigisut aalajangiitinneqarnissaat, KAK-mi siulittaasoq Benjamin Kielsen KNR-mut oqarpoq.
Divisionikkaarneq
Silami arsaannermi nuna tamakkerlugu sungiusaasoq Morten Rutkjær naliliivoq ullumikkut unammersuariaaseq timimut pitsaasuunngitsoq taarsiullugulu qasuersaarfissaqarnerusumik unammersuartitsisarneq eqqunneqassasoq inassutigalugu.
- Nuna tamakkerlugu sungiusaasoq isumaqatigilluinnarpara aammalu nammineq unammisartuugallarama nammineq timikkut malugereernikuullugu tulleriiginnarnik unammisaqattaarnerup pikkunarsinnaanera – qanorluunniit qasujaallisarluarsimatigigaluaraanni. Unammersuariaaseq taanna ullutsinnut naleqqukkunnaarsimavoq, Benjamin Kielsen oqarpoq.
Angallannermi akit
KAK-mi ileqquusumik ataatsimeersuarneq oktobarimi pissaaq unammersuariaasissarlu pillugu oktobari nallertinnagu isummertoqarnissaa kissaatiginartinneqarpoq.
- Kissaatigilluinnarpara ileqquusumik ataatsimeersuarnissaq sioqqullugu unammersuariaasissaq pillugu aalajangertoqassasoq kingusinnerpaamillu qaammatip tullia tamanna pissasoq, Benjamin Kielsen oqarpoq.
Silami arsaannermi unamminerit amerlanerulernissaat peqatigiiffiit kissaatitut saqqummiutereerpaat.
- Siunnersuutigineqartut ilagaat divisionikkaalernissaq aamma tamanna amerlanerit orniginerunnguatsiarpaat, Benjamin Kielsen oqarpoq.
Unamminerit amerlippata aamma peqatigiiffiit aningaasartornerulissapput.
- Iligiit amerlasuut suliffeqarfinnik aningaasaliisartoqanngillat ilaallu annikitsuinnarmik aningaasaliisoqartarput. Taamaammat katersuiniarnermut nukippassuit atorneqartarput, Benjamin Kielsen oqarpoq.
