Arsaanneq: GM-riaatsip allanngortinnissaa nuna tamakkerlugu sungiusaasup kissaatigaa
![Morten Rutkjær 2021 Morten Rutkjær 2021](/sites/default/files/styles/image_934x467/public/article_images/188978664_376029707152428_9138627498258376219_n.jpg?itok=XoIV-D1M)
Angutit inersimasut silami arsaannermi pissartanngorniunneriat sapaatip akunnera kingulleq naammassivoq. Tassani ullut arfinillit ingerlaneranni ullut tamakkiallugit unammisaqattaartoqarpoq.
Unammeriaaseq tamanna aappaagu atoqqinneqassanngitsoq nuna tamakkerlugu sungiusaasoq Morten Rutkjær siunnersuuteqarpoq.
- Arsaattartut paarilluarnissaat pingaaruteqarpoq. Unneqqarillunga oqaaseqassaguma ullumikkut unammersuariaaseq sakkortuallaarpoq, Morten Rutkjær KNR-mut oqarpoq.
Unamminerit akornanni qasuerluarnissamut piffissakinneq sapaat akunnerata ingerlanerani malunnarsisarpoq pingaartumik unammersuarnerit naammassiartorneranni tamaviaarsimanerup kinguneranik ajoqusertoqarsinnaalluni. Ullut tamakkiarlugit unammeriaatsip tamanna nassatarisarpaa.
- Misissuinerit tamarmik tikkuussipput; taamaasiortoqartariaqanngilaq, Morten Rutkjær sungiusaasutut nunani tamalaani atorsinnaasumik allagartalik aammalu Danmarkimi inuusuttuni piukkunnaatilinnik alaatsinaattutut atorfeqartoq oqarpoq.
- Ajoqusernerit pinaveersimatissagaanni annerpaamik ulloq allortarlugu unammisoqartariaqarpoq. Aamma takusinnaavara minutsit 20-it kingulliit nukeertoqartartoq arsaannerullu pitsaassusaa pitsaajunnaarluni, Morten Rutkjær oqarpoq.
Taanna siunnersuuteqarpoq ulloq allortarlugu unammisitseriaaseqartoqartariaqartoq.
Siusinnerusukkut sungiusarneq
Arsaattartut kattuffianni KAK-mi ataatsimeersuartut aalajangernikuuaat unammersuariaaseq nutaaq atulissasoq. Qanorpiarli unammeriaaseqartoqassanersoq suli aalajangiunneqanngilaq.
Pissartanngorniunnernili pitsaassuseq qaffassarneqassappat unammeriaaseq kisiat isumalluutigissallugu amigarsorinartoq nuna tamakkerlugu sungiusaasoq oqarpoq.
Peqatigiiffinni ataasiakkaani suliniarneq aamma ingerlasariaqarpoq.
- Isumaqarpunga silami arsaannerup aallarteqqinnissaanut timikkut sungiusaneq februaarimi aallartereertariaqartoq, aamma tamanna arsaattartut silami arsaattalernissaminnut iluaqutiginiassammassuk, Morten Rutkjær isumaqarpoq, aammalu pissartanngorniunnerit naggataarnerat augustip aallartilaanerani pisartoq kingusinnerusumut illuartinneqartinneqarsinnaasoq isumaqarluni.
- Arsaattartut ilarpassui sulinngiffeqarlutik angalariiginnarlutik toqqaannaq GM-riartarput. Iluassagaluarpoq unammersuartarneq nikisinneqalaartuupput siusinnerusukkut aallartittalerluni, aammali GM-ip naggataarnera septemberimut kinguartinneqarsinnaalluni, Morten Rutkjær oqarpoq.