Isikkamik arsarneq: B-67 pissartanngorniutivinnermi pissartanngorpoq
Nuummi angutit isikkamik arsartartut B-67 nunatsinni pissartanngorniunnermi ajugaapput. Tamanna Qaqortumi ippassaq pivoq, Pissartanngorniutivinnermimi Qeqertarsuarmiut arsartuinut G-44-mut 5-0-mik ajugaapput.
- Tupinnaqaaq, nukappiaqqat arsarluavipput assorsuaq pikkorilluinnarput angusassartillu anguaat, B-67-ni sungiusaasut siuttuat Christian Knudsen oqarpoq.
B-67 2018-mili aatsaat kingumut pissartanngoqqippoq.
- Ukioq manna ajugaarusuvissorput, sungiusaraangatta nukitik tamaasa atorlugit sungiusartarput, nukappiaqqat sungiusagaralugit assorsuaq nuannersimavoq, Christian Knudsen oqarpoq.
B-67-t arsarnermi siulersortaat Patrick Frederiksen oqarpoq aallartikkamilli guldtimik angerlaassiumaarlutik siunertarisimagitsik.
- Siorna ajorsaratta pakatsilluta angerlarpugut, taamaammat ukioq manna angorusuissorparput ajugaanissarput, pilluaqaagut arsartullu tunniusimallutik arsarnerat tulluusimaarutigeqaara, maannami ajugaavugut tamannalu nuannerluinnarpoq, Patrick Frederiksen oqarpoq.
Pissartanngorniunneq unammillernaraluartoq iluatsilluarpoq
Qaqortumi pissartanngorniunnermi klubbini arfineq-pingasuusuni piukkunnarnerpaat arfinillit kisimik peqataatinneqarput.
Siornatigut pissartaasimasoq Ilulissaneersoq Nagdlúnguak siulliulluni peqataasinnaannginnini nalunaarutigaa, taava kingorna aamma Ittoqqortoormiormiut klubbiat AK peqataasinnaajunnaarpoq, aammalu Upernavimmiut klubbiat UB-83 peqataasinnaajunnaarluni.
Klubbillu taakku naapertorlugit peqataasinnaajunnaarnerit angalaniarnerup ajornakusoorneranik peqquteqarput.
Peqataasinnaajunnaartoqaraluartoq Kalaallit Arsaattartut Kattuffiata (KAK-p) siulittaasuata Benjamin Kielsenip nunatsinni angutit isikkamik arsarlutik pissartanngorniunnerat iluatsilluarsimasoq.
- Iluatsilluarpoq, silamik aamma iluatsitsivugut naak unnukkut nillilaartaraluartoq, arsarfigalugu iluaannarpoq, Benjamin Kielsen oqarpoq.
Siulersuisullumi klubbit peqataasinnaajunnaarnerannut tunngatillugu aappaagussamut ilikkagaqarput.
- Klubbit ukiamut naapeqqissapput, taakkuuppullu siunissami qanoq pisoqarumaarnissaanik aalajangiisussat. Arlalinnik unammillernartoqarpoq suliassarlu annerpaaq tassaavoq angalaniarnermi akit, Benjamin Kielsen oqarpoq.
Pingajuattut inissippoq Qaqortormi klubbi pissartanngorniunnermilu tikeraartitsisuusoq K-33.
