Arnat arsaattarnerat KAK-mit annertusaaffigineqalerpoq
Maanna aamma silami arsaannermi arnat nunanut allanut unammisartussaannut KAK sungiusaasussarsiorpoq.
- KAK-mi siulersuisooqatigiit aallartikkattali anguniagaraarput nukappiaqqat angutillu kisiisa sullisissanagit. Arnat niviarsiaqqallu aamma taakkutulli tungitsinniit sullinneqartussaapput, KAK-mi siulittaasoq Kenneth Kleist KNR-mut oqarpoq.
Allannguiniarput
2017-mili silami arsaannermi arnat nunanut allanut unammisartoqarnikuunngillat arnallu arsaattartut internettikkut inuit naapittarfiini saqqummiussisarput angutinit tunulliunneqartutut misigisimallutik.
Tamanna Kenneth Kleistip arajutsisimanngilaa iliuuseqarfiginiarlugulu.
- Niviarsiaqqat arnallu sineriammiittut aamma takutikkusuppagut pilersaarusiorluarnikkut angusaqartoqarsinnaasoq. Nalunaartukinnera pissutigalugu ukiut kingulliit silami arsaannermi pisortatigoortumik arnat pissartanngorniutinngitsoortarput, neriuppugullu suliniut aallartitarput silami arsaannissamut piumassuseqalersitsiumaartoq, Kenneth Kleist oqarpoq.
Silami arsaannermi arnat pissartanngorniunnissaat julip naalernerani pisussatut pilersaarutaavoq. Tamatuma kingorna nunanut allanut unammisartunik toqqaasoqassaaq aappaagu Island Gamesimi peqataanissamut piareersartinneqartussanik.
Periusissiaq aningaasanik malitsilik
KAK maannamut angutini futsalimi silamilu arsaannermi nunanut allanut unammisartoqareerami aningaasartuuterpassuaqarpoq, arnallu nunanut allanut unammmisartoqalernissaat aningaasaqarniarnermut naapertuuttussaavoq.
- Kalaallit Nunaanni timersoqatigiit kattuffiat GIF oqaloqatigisaqattaarparput ukiunut sisamanut tullernut periusissiorluta tamannalu aningaasaqarniarnitsinnut tulluartuuvoq, Kenneth Kleist nassuiaavoq.
- Periusissiap imarisaa kingusinnerusukkut saqqummiukkumaarparput taannali aallaavigalugu pilersaarutit tulliuttut inississorpavut, Kenneth Kleist oqarpoq.
Arnani nunanut allanut unammisartut marluiit aallartinnissaannut KAK akissaqalerpoq timersoqatigiit kattuffianniit GIF-miit tapiiffigineqarnikkut. Qanorli annertutigisumik tapiiffigineqartussaaneq saqqummiunneqanngilaq.
