Kaj Kleist: Folketingimut qinigassanngortittut taamaammat aatsaat taama amerlatigipput
Kalaallit folketingimut ukioq manna qinigassanngortittut aatsaat taama amerlatigipput.
Folketingimi atuuffiit marluk pillugit qineqqusaartut maannamut 24-upput, taakkulu naalakkersuisunik maanna atuuttunik naalakkersuisuusimasunillu ilaqarput.
Taamaattoqarneranut suna pissutaanersoq paasiniarlugu KNR-ip politikkimut ilisimasaqarluartoq, Kaj Kleist nunatsinni atorfinni qaffasissuni, tassa Namminersornerullutik Oqartussat pisortaatut, naalakkersuisoqarfiup pisortaatut aamma Siumumi allatsitut ilaatigut ukiuni arlalinni atuuffeqarsimasoq oqaloqatigaa.
Amerikamiunit tatineqarneq
Qinigassanngortittut ukioq manna sooruna taama amerlatigisut?
- Inuit tamaani ikiligaluttuinnarnerat eqqarsaatigissagaanni, ukioq manna qinigassanngortittut amerlaqaat, Kaj Kleist oqarpoq illarlunilu.
Taassuma tamatumunnga nassuiaatissarpassuaqarnerarpaa, siullertulli tamanna Amerikamiut præsidentiata nunatsinnik soqutiginnittuarneranut tunngassuteqarpoq.
- Tassa una immaqa eqqarsaatigineqarsinnaavoq; nunanut allanut politikki pillugu apeqqutit amerlasoorpassuit nunatsinnut aamma attuumassuteqarluartut, ukioq manna ukioq kingullerluunniit takkussuupput. Qinigassanngortittut tamanna pillugu, qularnanngitsumillu aamma nunanut allanut politikkimut apeqqutit qanimut peqataaffigisinnaajumallugit, qineqqusaarnermut ilanngupput.
Namminiilivikkusunneq
Kisianni nunanut allanut politikki politikerit anguniagarerusutaannik kisimi pilersitsinngilaq. Nunap namminermi politikkikkut ilungersuussaajuartut aamma pissutaasut, Kaj Kleist oqarpoq.
- Allat namminiilivinnissaq pillugu oqaluffissatut atorusuppaat. Ajunngippat isumaqarpunga tamanna pitsaasuusoq. Aningaasaqarniarneq eqqartulaarpassuk naammagisimaarpara, taanna oqarpoq.
- Partiilli ilaat, Naleraq, ministeriunissamik Kalaallit Nunaannik attuinngitsumik, eqqartuinngitsumik oqaloqateqanngitsumillu tikkuussiumaarluni oqariartuuteqartoq takoreerpara.
- Tamannalu killormoorluinnartutut paasivara. Arlaatigulli angusaqarniaraanni Danmark oqaloqatigineqarnerusariaqartoq isumaqarpunga.
Folketingimut qinigassanngortittut maanna 24-nngornerat qanoq isumaqarsoraajuk?
- Maannakkut 24-uppat?! Kaj Kleist tupigutsappalulluni oqarpoq.
Taama amerlatiginerat tupaallannarpoq, taanna oqarpoq, nangillunilu:
- Siornami marloriarluta qinersivugut - inatsisartunut kommuninullu - tamannalu tunngavigalugu partiit inissisimaneri, soorlu inatsisartuni kommuninilu, allanngungaatsiarput.
- Tamanna aamma, taamatut allanngortitseqqissinnaanermik kissaatit pissutaallutik, amerlanerusunik qinigassanngortitsinerannut tunngaviusinnaavoq.
Oqaluttuarisaaneq qiviarlugu
Innuttaasoqassuseq eqqarsaatigigaanni nunatsinni politikkimut soqutiginnittut amerlangaatsiarput. Tassunga suna pissutaasoraajuk?
- Aatsaat maannakkut. Maani politikkikkut ineriartorneq ukiorpassuarni eqeersitsinngilaq. Namminersornerulernerli eqqunneqarmat kingornalu namminersulerneq eqqunneqarluni, tassunga aaqqissuussinerit nutaat, tassalu aamma akisussaaffiit assigiinngitsut qallunaat nunaanninngaanneersut uagut nammineerluta akisussaaffigilikkagut pillugit, taamatut soqutiginninneq annertusiartortutut isikkoqalersimavoq, aammattaaq innuttaasut politikkikkut eqeeriartulernerannik qularnanngitsumik kinguneqarpoq.
Kaj Kleistip oqarneratut, taamatut ineriartortoqarnera, politikkikkut akisussaaffeqarfik kingullertigut sammineqaqisup qinersinermut sassartut amerlanerannut pissutaanerarpaa: Nunanut allanut politikkimi akisussaaffik - USA-p siooranarsiartortitsinera ilutigalugu ukiuni kingullerni pingaaruteqaleraluttuinnartoq.
Taamaattumik politikerit Christiansborg Kalaallit Nunaata anguniagaanik nunarsuarmut saqqummiussinissamut periarfissatsialattut isigerpasippaat, tamannalu taakkua isumaanni ulluni makkunani pingaaruteqarpoq.
