Canadamiut unioqqutitsisimaneragaapput
Canadami naalakkersuisunngorlaat, siuliminnit qanganisarsiornerusutut taaneqartut, Kyotomi silaannaap mingutsinnerata annikillinissaanut isumaqatigiissummik, avatangiisinut illersuiniaqatigiinnit unioqqutitsisimaneragaapput.
Canadap avatangiisit pillugit ministerertaavata nunarsuarmioqatigiit amerlanerit isumaqatigiissut isumaqatigippassuk aatsaat silaannarmik mingutsitsinertik annikillisinniarlugu nalunaarpoq.
-Suleqativut attaveqaqatigullu isumaqataappata aatsaat isumaqatigiinniarnerni peqataasinnaavugut, Canadap avatangiisinut ministerertaava Rona Ambrose tusagassiutinut nalunaarpoq.
”Suleqatiminnut attaveqaqatiminnullu” USA Australialu ilaappata, paasinarsereerpoq nunarsuatsinni mingutsitsinerpaasoq USA, isumaqatigiissummut akerliunerpaasoq Canadap tapersersorsimassavaa, Canadallu isumaqatigiissummut peqataaginnarsinnaanissaa qularnarsissalluni.
Ukiuni 15-ini kingullerni pinngortitamik illersuiniaqatigiiffiup Greenpeacep ilungersuullugu mingutsitsinernut akiuiniarsimanera taamaalilluni Canadap naalakkersuisortaavisa kimeerutitissagaat, Greenpeace assuarlerpoq.