Borgmesterip mittarfiit sanaartornissaannut naammagittarneq nersualaarutigigaa

Malik Berthelsenip (S) Inatsisartut Nuummi, Ilulissani Qaqortumilu mittarfissat ilusilersornerannut aalajangiinissamik kinguartitsinerat nersualaarutigaa.

- Aningaasanimmi qilammiit nittaalatut nakkaaginnartutut ittunik aningaasaateqanngikkaanni aammalu politikkikkut innuttaasut aningaasaataasa paarinissaannik akisussaaffilerneqarsimagaanni, akisussaassuseqarluni kukkunaveersaarnissaq isumatusaarnerussaaq, borgmesteri oqarpoq.

AAMMA ATUARUK Borgmesterit pingasut mittarfinnut pilersaarutinut nangaasoqarneranik isornartorsiuisut

Sermersuumi, Kujallermi Avannaatalu kommuniani borgmesterit mittarfinnut pilersaarutinut tunngatillugu Naalakkersuisut qularnerat aningaasaliisinnaasussallu akornanni qulartitsilernerat isornartorsiorpaat.

Malik Berthelsenilli aningaasaqarnerup mittarfinnullu pilersaarutit ataqatigiilluarnissaata piffissaqarfiusumik isumaliutiginissaa pisariaqarsoraa. Pingaartumik nunatsinni atlantikoq qulaallugu mittarfittaartussaanngitsut eqqugaannginnissaat pillugu.

- Taamaattorli Qeqqata Kommunianiit ernummatsigisarput tassaavoq, illoqarfinnut pingasunuinnaq taamak takitigisunik 4-5 milliardit atorlugit mittarfiliornikkut, nunatta karsiata artukkerneqarnissaa, taamaasilluni nunatta sinnerani sumiiffiit allat ineriartortinneqarnissaannut akissaaruttoqarluni, Malik Berthelsen oqarpoq.

AAMMA ATUARUK Qularnerup aningaasaliisartut peqataajumajunnaarsissinnaavai

Qeqqata Kommunia kommuninut marlunnut nutaamik mittarfittaartussaanngitsunut ilaavoq. Tassanili Kangerlussuarmi mittarfiup Atlantikoq qulaallugu timmisartuussisarfiunerminngaanniit nunap iluani timmisartunut mittarfittut qulimiguulinnulluunniit mittarfittut atorneqalernissaa ernumanarpoq, tamannami suliffiit annaaneqarneranik kinguneqassammat.

AAMMA ATUARUK Berthelsen lader sig ikke tidspresse