Berthelsen tuaviuusserusunngitsoq
Mittarfiliornissamut suliami borgmesterit tuavisaarigaluartut, inatsisartuni aningaasaqarnermut ataatsmiititaliami siulittasup suliaq tuaviortumik taamaatorli peqqissaartumik suliarineqarnissaa oqaatigaa.
Avannaata, Sermersuup Kujalliullu borgmesterii utaqqisinnaajunnaaqqapput. Taakkumi Ilulissani Nuummilu mittarfissuassat, Qaqortumilu mittarfissaq tuavisaarutigaat.
AAMMA ATUARUK Borgmesterit pingasut mittarfinnut pilersaarutinut nangaasoqarneranik isornartorsiuisut
- Massakkut inuit ataasiakkaat, imaluunniit regionit ataasiakkaat soqutigisaat pinnagit inuiaqatigiit soqutigisaat tamakkiisumik isigalugit massakkut pinngitsoorata mittarfiit sanasariaqarpagut.
Mittarfinnut tunngasunut suliaq maanna Inatsisartuni aningaasaqarnermut ataatsimiitsitaliami suliarineqarpoq.
Suliarlu sumut killinnersoq Inatsisartuni aningaasaqarnermut ataatsimiitsitaliami siulittaasoq aperaarput.
- Tassa siullermik oqaatigissavara suliassaq annertoorujussuusoq ataatsimiitsitaliami paasisimavarput, taamaammallu apeqqutit paasiniagassat assigiinngitsorpassuit misissorsimavagut. Taakkulu tunngavigalugit isumaliutissiissummik suliaqartussaavugut soorunami, kisianni tassa tassunga tunngatillugu suli saqqummiussaqarsinnaanngikkallarpugut. Suli suliagut tassunnga tunngasut annertummata.
Aningaasaqarnermut ataatsimiitsitaliami ilaasortat, siulittaasoq ilanngullugu arfineq-marluusut tamakkerlutik suliamut tunngasumik apeqquteqarnissaanut periarfissinneqarsimapput misissorluarneqarnissaallu pingaartinneqarsimavoq.
- Naatsumik oqaatigalugu oqaatigiinnassavara suliassaq annertummat suli misissuinerit paasiniaanerit assigisaallu ingerlappagut.
AAMMA ATUARUK Aningaasaliisussarsiornermik tamarmik unitsikkallarneqartut
Naalakkersuisut siulittaasuata kissaataa suliap tuaviortumik naammassineqarnissaa malissamaarpisiuk?
- Tassa imatut oqaannarta, tuaviorpugut kisianni suli naammassinngilarput.
Borgmesterit, inuussutissarsiornermik suliaqartut allallu mittarfiliortiternissanut piffissaq kingulleq tuavisaarisaqattaarput. Tamannali aningaasaqarnermut ataatsimiitsitaliamut sunniinavianngitsoq siulittaasoq erseqqissaavoq.
- Qularinngilara namminneq taavalu tunuliaquttami isumai aallaavigalugit apeqqutit tamakku tunngavigalugit namminneerlutik nammineerluta isummersussaqqaartugut qanorluunniit naatsumik oqaatigaluguaasiit sunnerniarneqaratigigaluarutta suliassaq peqqissaarullugu suliarissavarput.
Inatsisartuni aningaasaqarnermut ataatsimiitsitaliap isumaliutissiissutaa naammassineqarpat inatsisartut immikkut ataatsimiigiarnissaanut qaaqquneqarsinnaapput.
AAMMA ATUARUK Sinneqartoorutit qanoq piniarnerigut oqaatigisinnaanngikkallarpara
