Nunatta karsia millionilinnik sinneqartooruteqartoq

Internetti atorlugu aningaasaatinik misissuinermi aningaasat aappalaartuunatik qernertuunerat nalinginnaasumik pitsaasuuvoq.

Tamanna pisortat aningaasaqarnerannut aamma atuuppoq. Nunatta karsiata pissarsianik atuinissamut missingersuutai sapinngisamik sinneqartooruteqassapput, taamaaliornikkut aningaasanik atorsinnaasaqarnermit annertunerusumik atuarfinnut, napparsimmavinnut pisortanilu sulisut akissarsiaannut atuisoqassanani.

Taamaammat aningaasaqarnermut akileraartarnermullu naalakkersuisoq, Erik Jensen (Siumut) upernaakkut ataatsimiinnermi ullormi ataatsimiiffiusumi kingullermi nunatta karsiata 2023-mut naatsorsuutaanik saqqummiigami aamma naammagisimaarpoq.

Tassami ingerlatsinermut sanaartornermullu inernerit 2023-mi 421 millionit koruuninit ikinnerunngitsumik sinneqartooruteqartoqartoq takutippaat.

Naalli sinneqartooruteqangaatsiartoqaraluartoq naalakkersuisut illuatungiliuttunit isornartorsiorneqarput, taakkumi naatsorsuutigisamit annerunerungaatsiarnerat eqqarsarnartoqartippaat.

Naalakkersuisummi aningaasanut inatsimmi taamaallaat 6 millionit koruuninik sinneqartooruteqarnissaq missingersuusiorpaat.

Naleqqap siulittaasua, Pele Broberg aperigaanni naalakkersuisut naatsorsuinerminnik nakkutiginnissinnaannginnerat uteqqiasumik ajornartorsiutaavoq.

- Tassa imaalersimarpasippoq nunatta karsianut naatsorsuutit ukiut tamaasa pilersaarutaanngitsumik sinneqartooriasaartarput, taanna oqarpoq.

Aningaasat innuttaasunut atorneqassasut

Atassutip Demokraatillu sinneqartooruteqangaatsiariasaarneq aamma isornartorsiorpaat.

Partiit taakku naalakkersuisut sinneqartooruteqangangaatsiarnissamik naatsorsuuteqaratik nalunaaruteqarsimanerat isornartorsiorpaat. Tamannami akileraarutinik akitsuutinillu appaaniarnermi aningaasassarsiniarnermut ajornakusoortitsivoq. Pingaartumik piviusup allaasup paasineqarnerata kingorna.

- Sinneqartoorut taama annertugisassaanngitsigitillugu politikkikkut sipaarniarnermik takutitsisariaqarsimavugut, ima isumaqarpoq akileraarutinut akitsuutinullu appaaginnarsinnaasimanngilagut, aningaasaleerujussuarsinnaanngilagut, peqqinnissaqarfimmi pitsutsinut aaqqiissutissanik, Nivi Olsen oqarpoq, nangillunilu:

- Paasinarsimmat sinneqartoorut 16 millionit koruuniinnaanani 400 millionit koruunit sinnerlugit annertugisoq, eqqarsanngitsoorsinnaanngilanga innuttaasunut pitsassuarnik iliuuseqarsimasinnaagaluarnerput taakku aningaasat atorlugit.

Taamaammat naalakkersuisut naatsorsuusiornermut pikkorinnerulernissaannik kaammattuuteqarput, taamaaliornikkummi nunatta karsia pisariaqartumit annerusumit sinneqartooruteqassanngilaq.

Danmarkip naalagaaffianit tapiissutit aamma akileraarutit akitsuutillu nunatta karsianut naatsorsuutigisamit amerlanerunerat isertitaqarnerunermik kinguneqarput.

2023-mut naatsorsuutit pilersaarut malillugu upernaakkut ataatsimiinnermi akuerineqassapput.