Borgmesteri akissuteqaqqusisoq: Naalakkersuisut innuttaasut toqqissisimanerat puiorpaat

Nuummi sakkutuut umiarsuaannut talittarfik nutaaq pillugu isumaqatigiissuteqartoqareersorlu borgmesterip Naalakkersuisut ataatsimeeqatigiumavai. Taassuma kommuni innuttaasullu qulangerlugit sakkussiornissamik aalajangiisoqarsoraa.

Allattoq Markus Valentin

oktobarip 16-at 2025 15:45

Naalakkersuisut sakkussiorneq pillugu isumaqatigiissut nutaaq tallimanngormat saqqummiuppaat. Tamannalu Kommuneqarfik Sermersuumi borgmesterimit, Avaaraq Olsenimit (IA) isornartorsiorneqangaatsiarpoq.

Taanna Nuummi Issittumi Sakkutooqarfiup nutaamik allaffissaanik sanaartorneqarnissaa Illersornissaqarfiullu umiarsuaannut talittarfiliortoqarnissaa pillugit ilisimateqqaarneqarsimanngilaq.

Taassuma tamanna innuttaasut akornanni sakkussiornermut tunngatillugu nalinginnaasumik toqqissisimannginnerulersitseqataasoraa.

- uanga aamma ilisimasaqarsimananga oqaaseqarnera arlaannut suli toqqissisimannginnerulersitsisoq aamma takorloorsinnaavara.

Issittoq pillugu isumaqatigiissut 2-mi suliniutit

Danmark Issittup aamma Atlantikup avannaata illersorneqarneranut 27,4 milliardit koruuninik aningaasaliissuteqarpoq. Suliniutit ilaat uani ataani allassimapput.
Kalaallit Nunaata Danmarkillu akornanni imaatigut kabelimik pilersitsisoqassaaq.
Timmisartuaqqanik inuttaqanngitsunik illersornermut nakkutilliinermullu 2,1 milliardit koruunit atorneqarput.
Dronit (timmisartuaqqat inuttaqanngitsut aaqq.) nutaat nukittorsaataassapput “pisuni takunnissinnaanermik”, pisuni nutaani, Illersornissaqarfiup najukkani oqartussat tapersersuleraangagit, Savalimmiuni aamma Kalaallit Nunaanni.
Tamatuma saniatigut issittumi umiarsuit marlunnik timmisartunillu imaani nakkutilliissutit ilaneqassapput.
Issittumi Sakkutooqarfik Nuummi nutaamik qullersaqarfiliorneqassaaq.
Issittumi sakkutooqatigiinnik nutaanik immikkut piginnaanilinnik pilersitsisoqassaaq, taakku Issittumi Sakkutooqarfiup ataaniittussapput.

Paasissutissarsiffik: Ritzau/Forsvarsministeriet

Allisiguk

Naleqqap Nuummi sanaartornissat nutaat isornartorsiornikuuaat. Taakku Nuuk nuummiullu ullut arlaanni sorsuttoqalissagaluarpat sakkutooqarnikkut eqqugaaratarsinnaasoraat.

Avaaraq Olsen aamma taama isumaqarpoq.

- Sakkussiortoqarneratigut eqqugaaratarsinnaalernissarput toqqissisimanngissutigineqarnerulerpoq.

Borgmesterip oqaaseqarnermini 'toqqissisimaneq' uteqattaarpaa. Taassuma sakkussiorneq isumannaannerulerniarnerlu akerlerinngilai.

Kisianni tamanna innuttaasut ersitinneqaratik ingerlanneqassasoq, taanna oqarpoq.

Toqqissisimaneq isumannaassuserlu

Avaaraq Olsenip aasaq sakkutuut sungiusarnerannik eqqarsaatiginninnermini oqartussanit pitsaasumik oqallittoqarsoraa.

Taamaakkaluartorli innuttaasunit utoqqarnik sorsuttoqalernasoralugu ernumasunit arlalinnik pingaartumik sianerfigineqarpoq.

Naalakkersuisut danskillu naalakkersuisuisa nutaamik isumaqatigiissuteqarnerminni isumannaassuseq toqqissisimanermit samminerugaat taanna isumaqarpoq.

- Maannamut takoriikkagut innuttaasunut toqqissisimanerulersitsinngillat, taamaammat pissaaneqarnerusut tamanna uani puiorsimagaat isumaqarpunga.

Aamma atuarukBorgmesterit illersornissamut isumaqatigiissuteqarnissamut isumasiorneqarsimannginnertik isornartorsioraat

Naalakkersuisut Danmarkillu ilaatigut– illersornissaqarfimmit, FE-mit PET-imiillu siooranartunut tunngatillugu naliliinerit aallaavigalugit taama isumaqatigiissuteqarput. Isumannaatsuunissaq eqqarsaatigalugu taama iliorniarlutik aalajangiisimagunik paasisinnaassaviuk?

- Isumaqarpunga tusagassiuutitigut saqqummiinnginnermi kommunimi politikikkut akisussaasoq qaffasinnerpaaq tamanna pillugu ilisimatinneqaqqaartariaqartoq. Pissutigalugu uanga borgmesteritut innuttaasunut toqqissisimatitsinissamik eqqarsaatiginninnermut atatillugu ilisimasaqarpunga.

Sakkussiornissamut takussutissaqarneq

Suleqatigiinnerup innuttaasut eqqissimanermik misigisaat ilalissavaa, tamannalu "sorsunnermut sakkussiulernerunermik aallaaveqartumik ataatsimuussutitsinnik innarliisuussanani".

Takussutissiineq qanoq isumaqartinnerlugu oqaasertalersinnaaviuk?

- Issittumi Sakkutooqarfimmi sulisut sakkutuutut atisaqarlutik 400-vejikkut angerlariartortarput. Sakkutuutut atisaqarnatik angerlartartuugunik maluginiarnannginnerussagaluarpoq. Annikippalussinnaavoq, kisianni toqqaannartumik maluginiartuaannarpagut.

Aamma atuarukAki-Matildap illersornissaqarfiup qullersaqarfissaata nutaap Nuummiinnissaa isornartorsioraa: - Inuunermik navianartorsiortitsineruvoq

Nalinginnaasunik atisaqarunik ulluinnarnilu takuneqartarunnaarpata taava pissutsit nunatut inissisimaffigisagut puiorneqaratarsinnaanngillat?

- Kisianni tamakku pillugit innuttaasup nammineq isummerluni oqaaseqarsinnaatitaanissaanut pisariaqartuusoraakka. Oqaloqatigiinneq taanna amigaataavoq, taanna oqarpoq, assersuuteqarlunilu:

- Illoqarfimmi maani sakkussiortoqartikkusupparput; Nalinginnaasunik atisaqartikkusuppagut, imaluunniit sakkutuutut atisaqassappat; Illoqarfimmi inuiaqatigiinni qanoq ilaatigissappat; innuttaasut allat assigivaat imaluunniit immikkooruteqarpat?

Issittumi Sakkutooqarfimmit akissut

KNR-ip Innuttaasunut oqaloqatiginninnermik aqqusinermilu sakkutuutut atisaqartunut atatillugu Issittumi Sakkutooqarfiup pisortaa, generalmajor, Søren Andersen qanoq isiginninnersoq paasiniarlugu attavigaa.

- Issittumi Sakkutooqarfimmit Namminersorlutik Oqartussat, innuttaasut Kalaallit Nunaannilu suleqatigisagut qanimut attaveqatigilluarlugillu ataqatigiissaareqatigilluartarpagut.

- Ukiup affaani kingullerni Illersornissaqarfiup Kalaallit Nunaanni sumiiffigisaanni najuuttoqarnerunera pissutgalugu innutaasut suliaqarnerunermut atatillugu immikkut ittumik oqaloqatigisarpagut. Taamaaliornermi ilaatigut Kalaallit Nunaanni sumiiffinni arlalinni innuttaasunut ataatsimiititsivugut. Aaqqissuussinerni taakkunani innuttaasut Illersornissaqarfiup najuunnera pillugu oqaloqatigisinnaanikuuaannga.

- Tamatuma saniatgiut sammisagut pillugit sumiiffinni Facebookikkut quppernerit aqqutigalugit ilisimatitsisarpugut aamma nunatsinni tamarmi umiarsuit, illut timmisartuusivinnillu ingerlaavartumik ammatitsisarluta. Aaqqissuussinerni taakkunani Illersornissaqarfiup suliai pillugit tusagaqarnissaq periarfissaallunilu Illersornissaqarfimmi sulisut naapinneqarsinnaapput.

Issittumi Sakkutooqarfiup sakkutuutut atisanik atuisarnermut polikkianik apeqqummut tunngatillugu Issittumi Sakkutooqarfiup pisortaa ima akissuteqarpoq:

- Issittumi Sakkutooqarfimmi sulinermi amma suliartornermi soraarnermilu atisat atorneqarsinnaapput. Sulinermulli atatillugu atorneqarnissaa akuerisaavoq.

Allisiguk

Naalakkersuisut ataatsimeeqatiginiarnerat

Avaaraq Olsenip talittarfiup nutaap "illoqarfiup niuernikkut, kulturikkut ulluinnarnilu inuuneqarnermi ammasutut qitiusutullu oqaluttuarisaaneranut" allanngortitsinissaa ernumassutigalugu tusagassiuutinut nalunaarummi oqaatigaa.

Talittarfiup illuttut atorneqarnissaa aamma piumasaqaataavoq. Talittarfiup Nuummi niuernermut ammanerulersitsinermullu iluaqutaasinnaanissaa takorloorsinnaaviuk?

- Taamaattoqarsinnaalluarsoraara, kisianni qanoq isumaqatigiissuteqartoqarsimaneranut atatillugu ilisimasakippallaarpugut.

Borgmesteritut maanna qanoq iliorniarpit?

- Vivian Motzfeldt (S) aamma Jens-Frederik Nielsen (D) ataatsimiigiaqquakka, pissutigalugu pilersaarutit qanoq inneri tusarusukkakkit, taanna oqarpoq, nangillunilu:

- Taamaammat illoqarfiup ineriartorneranut qanorlu sammiveqartumik ineriartornissaanut akisussaaffeqartugut aalajangiusimaniarpara. Kommunalbestyrelsi minnerpaamik peqataatinneqassaaq.

Talittarfik nutaaq aamma Issittumi Sakkutooqarfimmut allaffik nutaaq qanoq aaqqiivigineqassasut isumaqarpit?

- Tamanna taakku peqatigalugit paasiniassavara. Ingerlaqqinnissatsinnut tunngavigisassat pingaarpaat inissinnissaat pisariaqartilluinnarpara.

Vivian Motzfeldtip (S) Jens-Frederik Nielsenip (D) Avaaraq Olsenillu (IA) akornanni ataatsimiinneq sisamanngorpat pissaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.