Alaskami ajunaarnersuaqarnerata kingorna inuit 1000-init ikinnerunngitsut qimagussortinneqartut
Alaskap kippasissuani anorersuarujussuartut sakkortutigisumik anorersuartaarnerata ulerujussuartaarneratalu kingorna, inuit 1000-nit ikinnerunngitsut sapaatip-akunnerata ingerlanerani qimagussortinneqarput.
Yukon‑Kuskokwimip ilaani Yup’ik illoqarfii Kipnuk Kwigillingokilu eqqugaanerpaapput, tassani ulerujussuarnerani illut saavigunneqarput. Tamatuttaaq attaveqaasersuutit aseruatiterujussuarput.
Alaskami tusagassiorfik Anchorage Daily News naapertorlugu, anorersuarujussuarnerani inuk ataaseq toquvoq marlullu suli pingasunngornermi maqaasineqarlutik.
Kipnukimi Kwigillingokimilu innuttaasut qulimiguulimmik sakkutuullu timmisartuinit qimagussortinneqarput. Inuit hunnorujulikkuutaat illoqarfitsik qimattariaqarsimavaat, Bethelimut Anchoragemullu hunnorujut arlalinnik ungasissuseqartumut nuutsinneqarlutik. Taamak Anchorage Daily News allappoq.
Inuit Circumpolar Councilip ajunaarnersuaqarnera pillugu tusagassiutinut nalunaarummi oqaaseqarfigaa.
- ICC-p Alaskap kippasissuani inuiaqatigiit ajunaarnersuarmik eqqugaasunut inuunermillu naleqartumut misiginnissuteqangaarnini oqaatigaa.
- Ukiunngilaarnerani inuiaqatigiit taakkua angerlarsimaffeerullutillu aseruatiterujussuartoqarmat, pisimasumi kingunipiloqartumi inissisimalerput.
- Nunap inoqqaavinit aqunneqartunit aamma nunap ilaani inuiaqatigiinnit kissaatigineqartut malillugit qanoq suliniuteqartoqarsinnaanera pillugit ICC-p paasissutissat pingaarutillit siammarterusukkai, ICC allappoq.
Taamaattumik illoqarfinni inuiaqatigiit qanoq tapersersorneqarsinnaaneri pillugit, kattuffik paasissutissanik siammarterivoq.
