Politiit Qaqortumi toqutsisoqarneranik tusatsiakkat eqqunngitsuuneraraat
Qaqortumi eqqunngitsumik tammartoqartarnera imaluunniit toqoraasoqarneranik Facebookimi quppernermi oqalunnerit piffissami kingullermi ingerlaarput.
Tamannali Kalaallit Nunaanni Politiit eqqunnginnerarpaat.
- Illoqarfimmi tammartoqartarnerani eqqumiitsoqarnera imaluunniit illoqarfimmi toqoraasartoqarnera pillugit oqaluttoqarnera eqqunnginnerarniarpagut, Qaqortumi politiit immikkoortortaanni aqutsisuat, Christian Illum oqarpoq.
Nakuuserneq toqumik kinguneqartoq pillugu oqallinnerit
Angutit marluk sakkortuumik nakuuserfigineqarsimasut aappaatalu – angutip ukioqqortunerusup – ikilerneqarnini toqqutigisimagai kingullertigut oqallisaavoq.
Politiit tamanna aamma eqqunnginnerarniarpaat.
- Marlunnik toqusoqarnera ilumoorpoq, politiilli misissueqqissaarnerit kinguneranni pasinartoqanngitsoq aalajangiuppaat, Christian Illum oqarpoq.
Angut ukioqqortunerusoq tusatsiakkat naapertorlugit nakuuserfigineqarnermini toqusimanerarneqartoq nakkarluni niaqquminik ajoqusersimavoq. Taassumalu ajutoornermini ajoqusernini angerlarsimaffimmini kingorna toqqutigaa, politikommissæri oqarpoq.
Christian Illumip tusatsiakkat tunngavissaqanngitsut Qaqortumilu innuttaasut toqqissisimasinnaasut erseqqissaatigaa.
