- Tamanna tatigeqatigiinnermik innarliivoq. Tamanna ingerlaannaq allanngortinniarneqanngippat naalakkersuisut illersuinnassallugit tapersersuinnassallugillu takorloorsinnaanngilakka.

Taamak Aki-Matilda Høegh-Dam (Naleraq) KNR-imut ataasinngormat oqaaseqarpoq. Akissut Naalakkersuisut danskit naalakkersuisuilu illersornissamut isumaqatigiissutip nutaap, Issittoq pillugu Isumaqatigiissut 2, akornanni qisuariataavoq.

Nuup umiarsualiviata Illersornissaqarfiup sakkutuuisa umiarsuaannut talittarfeqarnissaanut allilerneqarnissaa, sorsuttoqaleriataassagaluarpat Nuummiut navianartorsiortinneqarsinnaasut, illuatungiliuttuni politikeri isumaqarpoq. 

Aki-Matilda Høegh-Dam Folketingimit maanna sulinngiffeqarpoq. Kisianni talittarfissap isumaqatigiissummiit peerneqanngippat allamulluunniit inissinneqanngippat, ukiakkut ataatsimiinnerup kingorna taanna Danmarkimut uterpat kinguneqassaaq.

Lars Trier Mogensen ulluinnarni tusagassiuummi Informationimi politikkikkut naliliisartuuvoq. Naak Aki-Matilda Høegh-Dam (Naleraq) tapersersuiunnaassagaluarpat danskit naalakkersuisuinut nukillaarsaataassagaluartoq, danskit naalakkersuisuinik uppisitsinissaminut peqataanissaa, taassuma ilimanaateqanngilluinnartut isigaa. Assi © : Kim MatthÄi Leland/Gonzales Photo/Ritzau Scanpix

KNR-ip Lars Trier Mogensen ulluinnarni tusagassiuummi Informationimi politikkikkut naliliisartuusoq oqaloqatigaa.

Danskit naalakkersuisui kalaallit savalimmiormiullu folketingimi ilaasortaanit maanna amerlanerussuteqaannartut, taanna oqaluttuarpoq. 

Tamaakkaaluartoq Aki-Matilda Høegh-Dami tapersersuiunnaassagaluarpat isumaqangaarnavianngitsoq taanna naliliivoq.

Tamanna illersornissamut politikki pillugu Danmarkimi isumaqatigineqangaatsiarneranik pingaarnertut pissuteqarpoq. Taamaattumik Kalaallit Nunaannik isumaqatigiissuteqarneq tunngavigalugu illuatungiliuttut naalakkersuisut uppisikkusunngilaat – naak tunngaviusumik naalakkersuisunut akerliugaluarlutik.

- Tassa taassuma sioorasaarinera isumassaqanngitsoq oqarusuppunga, Lars Trier Mogensen oqarpoq.

Naalakkersuisut uppitissinnaanngikkai

Ilimanaatikikkaluartorli Aki-Matilda Høegh-Damip taasinerata aalajangiisuusinnaaneranik kinguneqartumik pissutsit allangoratarsinnaapput.

Tassungalu killittoqassappat, tamanna Danmarkip naalakkersuisuisa Kalaallit Nunaannut tunngassuteqanngitsumik akunnattoornerannik tunuliaquteqartariaqassaaq.

-  Tassalu suliaasariaqassaaq, talerperliit, samerliit, attaviitsullu tamarmik ataatsimoorfigisinaasaat, Lars Trier Mogensen oqarpoq.

Nunanut allanut tunngasunut Naalakkersuisoq Vivian Motzfeldt (S), Naalakkersuisunut sinniisutut Issittoq pillugu isumaqatigiissutip aappaat danskit illersornissamut ministeriat peqatigalugu isumaqatiginninniarput. Kisianni nammineq siulittaasuata Aleqa Hammondip (S) Naleraqqallu isumaqatiginninniarnerit ingerlanneqarneranni partiit innuttaasullu akulerutsinneqarsimanngippallaarneri pillugit isornartorsiorpaat.  Assi © : Markus Valentin / KNR

Takorlooraaannimi Aki-Matilda naalakkersuisunut tatiginninnginnermik taasititsisinnaajuaannarsinnaavoq. Tamaalippallu illua tungiliuttut partiivisa tapersersussanngilaat?  

- Tatiginninnginnermik taasititsiinnassaguni naammanngilaq. Pissuteqarluartariaqarpoq, illersornissamut isumaqatigiissut pissutissaalluarsinnaanera ilimaginngilara.

Qinersisoqarneraniit Folketingimi ilaasortat partiiminniit aninissaminnik aalajangertut attaviitsunngorlutillu maannakkut tallimaapput. Taamaattumik qanoq taasissanerlutik namminneq aalajangigassaraat.

Tassungalu killittoqassappat Aki-Matilda Høegh-Damip Danmarkip naalakkersuisuinut illua tungiliuttut tatiginnikkunnaarnermik nalunaaruteqartissinnaappagit, attaviitsut assinganik iliussanersut qulakkeerneqarsinnaanngitsoq, Lars Trier Mogensen oqarpoq.

- Tamanna attaviitsut politikeriujunnaarsimasutut isumaqarsinnaavoq. Imaassinnaavoq ilai akerliullutik taasisut, ukiup affaa suli aningaasarsiaqaatiginiassagamikku.

Naleraq nutaaliussaaq

Folketingimut qinersinissaq nutaaq kingusinnerpaamik aappaagu oktobarip 31-ani pissaaq. Qinersinermi kingullermi Aki-Matilda Høegh-Dam Siumut sinnerlugu qinigassanngortikkami iserpoq.

Naleraq qinersinerup tulliani isertitaqassappat, Danmarkimi naalakkersuisunngortussanut tamanna sunniuteqarsinnaasoq, Lars Trier Mogensen naliliivoq.

Maannakkut Danmarkip naalakkersuisuinik tapersiisunik, Kalaallit Nunaat Savalimmiullu katillugit pingasunik saamerliunerusunik sinniisoqarput, saamerliunerusumillu akerliusumik Savalimmiormiumik ataatsimik sinniisoqarlutik.

Naleqqap Danmarkimi naalakkersuisut partiit sorliugaluarpataluunniit tapersersornavianngikkai, Lars Trier Mogensenip oqaatigaa.

- Ataatsimut isigalugu Naleraq isissagaluaruni danskit ministeriannik tapersersuinissaa ilimaginngilara.