Naalakkersuisut: Kujataani takornarialerisut ikiorneqaliivipput

Kujataani sikorsuit ukioq manna ingasavipput namminersorlutillu inuussutissarsiutilippassuit aningaasarsiornerannut kinguneqarpoq.

Pingaartumik takornarialerinermik suliallit eqqugaapput. Taakkumi sapaatit-akunnerini makkunani qaammatinilu aningaasarsiornerpaasaraluarput. Sikorsuilli pissutigalugit takornariartaassuit Kujataanut tikissinnaanngimmata takornarialerisut aningaasarsiorsinnaajunaarput.  

Takornarialerinermi suliallit arlallit naalakkersuisunut ikiorsiissutinik noqqaasut KNR-ip allaaserereerpaa.

Ikiorneqalertupallakkusunnerallu inuutissarsiornermut naalakkersuisup Naaja Nathanielsenip (IA) tusaavaa.

- Pisinnaasarput tamaat aaqqiissuteqapallanniarsarivugut, nukinginnartormi nalunngilarput, taanna oqarpoq.

Kujataani takornarialerisut kisimik eqqugaanatik allat inuussutissarsiortut aamma ilungersunartorsiortut, Naaja Nathanielsen oqarpoq.

Pisorli immikkuullarippoq, inatsimmillu tassunga tunngasumik maanna peqanngimmat suliffeqarfiit ilungersunartorsiortut Namminersorlutik Oqartussanit imaaliallaannarluni ikiorsiissutinik tunineqarsinnaanngillat.

- Aningaasanik unioqqutitsinata tunniussinissatsinnut periarfissaqanngilagut. Taamaaliuinnaraluaruttalu inatsimmik unioqqutitsissaagut, Naaja Nathanielsen oqarpoq.   

Inatsisinut tunngasut inissinnissaasa tungaanut Kujataani bankit allallu aningaasaliisimasut suliffeqarfinnut aningaasarsiorsinnaanngikkallartunut ikiuussinnaapput. Soorlu pisut aaqqinnissaasa tungaanut aningaasanik atukkanik akilersuinissamik kinguartitsisinnaanissaq assersuutigalugu.        

Greenland Sagalandsimeersoq Pitsi Høegh taama kissaateqarluni oqareerpoq.

- Aningaasarpassuarnik bankimut akilersuivugut, aasaq mannalu akiliisarnerit kinguartinneqarsinnaappata iluaqutaassaqaaq, taanna KNR-imut oqarpoq.

Nanortalimmiit Qaqortup tungaanut sikorsuit qanoq annertutiginerat uani takuneqarsinnaavoq. Asseq qaammataasakkut juulip sisamaani assilisaavoq. Assi © : Sentinel Hub EO

Utaqqikatattut paasisinnaagai

Naak Kujataani sikorsuit ukiup aallartilaarneranili ilungersunartorsiortitsigaluartut, taamaattoq ajornartorsiutit takkuttussat ilisimareerneqarsinnaanngitsut, Naaja Nathanielsen isumaqarpoq.

Pisut ilungersunarsigaluttuinnarnerat inuussutissarsiortut naalakkersuisoqarfimmut sapaatip-akunnerata siuliani aatsaat saaffiginnissutigisimagaat naalakkersuisoq oqarpoq.

- Saaffigineqarsimatsiaannarlunga qanoq ajornartorsiortoqartiginera paasiniarpara. Sulinerput namminersorluni inuussutissarsiuteqartut arriigisinnaavaat. Paasisinnaavaralu. Peqqissaarlutali piniarnerput aamma paasisinnaassagaat neriuppunga, taanna oqarpoq.   

Namminersorlutilli inuussutissarsiortut erinitsalluinnarput. Erngerlunimi ikiorsiisoqapallassasoq Pitsi Høegh neriuppoq.

- Naammaginanngilluinnarpoq. Inuit akissarsiassaat uani eqqartorpagut, ikiorsiissutissallu utaqqisinneqarpata immaqa angerlaannartitsisariaqalissaagut, taanna oqarpoq.

Naaja Nathanielsen maanna aasaanerani sulinngiffeqarsinnaanngikkallarpoq, Kujataanimi namminersorlutik inuussutissarsiortunut ikiorsiissutissiinissaq piareerneqapallattariaqarpoq. Assi © : KNR/Ann-Sophie Greve Møller

Inatsisissaq sapaatit-akunneri pingasut sisamalluunniit qaangiuppata piariissangatikkaat

Sikorsuit pissutigalugit aningaasat qanoq amerlatigisut annaasaqaataasimanersut misissorneqaleruttortoq inuutissarsiornermut naalakkersuisoqarfik sapaatip-akunnerata aallartinnerani tusagassiorfinnut allagaqarpoq.

Taamaaliortoqareerpallu kikkut qanorlu ikiorneqassanersut naalakkersuisoq siunnersuuteqassaaq.

Ajunaarnersuaqarnerani ikiorsiissutinut tunngatillugu aaqqiissutaareersoq, siornatigullu aalisartunut piniartunullu atorneqartoq, takornarialerisunut atuutinngitsoq Naaja Nathanielsenip KNR-imut oqaatigaa.    

- Ikiorsiinissaq ukiup affaa qangiuppat pinavianngilaq. Tunngavissaqalerluta aaqqiipallakkusuppugut. Sapaatit-akunneri immaqa pingasut sisamalluunniit pineqarput. Pisariaqartitsineq Inatsisartuni partiit paasisinnaagaat qularinngilara taamaattumik iliuuseqaqataapallakkusussapput, Naaja Nathanielsen oqarpoq.