Sikorsuit takornariartaatit nunatta kujataanut angalanissaat taamaatiinnartikkai
Qaqortoq umiarsuarnik takornariartaatinit ukiorpassuarni pingaarnertut tikinneqartarpoq. Umiarsuarnillu takornariartaatinik ilaasut amerlanerpaartaat nunatsinnukaraangamik Qaqortoq sivisunerpaamik aqqusaartarpaat.
Ukioq mannali taamaattoqassanngilaq.
Sikorsuimmi ukiup aallartinneraniilli nunatta kujataata kangerluiniilerput. Taamaammat umiarsuit angisuut illoqarfinnut talissinnaanngillat, taamaammat Paamiunut Nuummullu ingerlaannartarput.
Tamannalu Greenland Sagalandsip kaaviaartitaasa annerpaartaat umiarsuarnik takornariaqarnermeersut malugisinnaalluarpaa.
- Umiarsuit 70-it missaanniittut ukioq manna tikinnissaat naatsorsuutigigaluarpagut, ulloq manna tikillugu 16-it taamaatiinnarnikuupput. Tamanna aningaasaqarnikkut isumakulutsitsivoq. Aningaasanik annaasaqangaatsiarpugut, ukioq manna aningaasartuuteqarnerugatta, tamanna maannakkut isumakulutsitsivoq, Greenland Sagalandsimik piginnittoq, Pitsi Høegh, oqarpoq.
Illoqarfik tamarmi eqqugaasoq
Umiarsuit takornariartaatit tikinnginnerat suli kujasinnerulaartumi Nanortalimmi aamma malugineqarsinnaavoq.
Minik Serano Frederiksen takornarianut umiarsuarnullu takornariartaatinut angallassinermik aaqqissuussisartumik, suliffeqarfimmik Serano Boat Toursimik piginnittuuvoq. Minik Serano Frederiksenip ukiuni 25-ni Nanortalimmi najugaqarnermini taama sikoqartiginera nalaassimanngilaa.
- Sikorsuaqarnera pissutigalugu isertitassatsinnik annaasaqarpugut. Uangaannaanngitsoq, iloqarfilli tamarmi. Sutorniartarfiit, imerniartarfiit pisiniarfiit taxallu avataanit isertitassaminnik annaasaqarput, taanna oqarpoq.
Minik Serano Frederiksenip qulinik taamaatitsisoqareersoq nalilerpaa. Taakkulu Nanortalimmut 40-t missaanik tikittoqartartumut amerlangaatsiarput.
Taassumalu kommunip avatangiisinut aserfallatsaaliuiniarnermullu akitsuutinit nutaanit iluanaarutigisinnaasai aamma annaaneqartut eqqaasitsissutigaa. Akitsuummi kommunit ilaasumut ataatsimut 50 koruunimik akitsuuteqartitsinissaanut periarfissiivoq.
Qinikkanit ikiorsiissuteqartoqarnissaa neriuutigigaat
Pissutsillu maanna taamaatsillugit Pitsi Høeghip Minik Serano Frederiksenillu sikorsuaqarunnaarnissaa maanna neriuutigiinnarsinnaavaat.
Sumiiffinnili takornarialerisut takornariaqarnermik inuussuteqartut sikoqarunnaarnissaa utaqqiinnarsinnaanngilaat.
Akiligassat akilerneqartussaapput, taakkuli aningaasanik isaatitsinngikkaanni akilerniarnissaat ajornaatsuinnaanngilaq.
Taamaammat nunatsinni politikerinit ikiorsiissuteqartoqarsinnaanissaa neriuutigaat.
- Naatsorsuutigivara eqqumaffigineqarluta aasamut
- Neriuppunga naalakkersuisut arlaatigut alloriaateqassasut aamma qisuariaateqassasut kujataani takornarialerisunut ikiuutitulluunniiit inissiigallarsinnaanissaat aammalu soorlu bankit eqqarsaatigalugit ikioqatigiinnitsigut unitsitsigallarnermik taavalu aamma akileraarutit eqqarsaatigalugit akileraarutinut akiligassanik kinguartitsisinnaanitsinnik aamma tassuunartaatigut alloriartoqarsinnaassasoq, Pitsi Høegh oqarpoq.
Minik Serano Frederiksenip nunatta kujataanut ikiorsiissuteqartoqarnissaa aamma neriuutigaa.
- Kissaatiginaraluarpoq soorlu coronapakkemut assingusumik naalakkersuisuniit ikiorsiissuteqartoqarnissaa. Nunatta kujataani takornariaqarnerup attanneqarsinnaanissaa pingaaruteqarpoq, taanna oqarpoq.
