Takornariartaassuit 67-it Nuup umiarsualivianut 2023-mi tulapput.

Kisitsit qaffasinnerusinnaagaluarpoq, tassami juuni qaammat silapilunnerani umiarsuarsuit qulit tulanngitsoorput. Nuummi umiarsualivimmik isumaginnittuusut Sikuki Nuuk Harbour, tusagassiorfinnut taama nalunaarput.

Qulit tikinngitsooraluartut Nuummi takornariartaassuit tikittut 2023-mi 2022-mut naleqqiullutik marloriaatinngorput, eqqornerusumik oqaatigalugu 52,2 procentimik.

Sikuki Nuuk Harbour amerlaqataasa aappaagu tulannissaanik ilimaginnippoq.

Umiarsualiviup pisut ukioq mannatut annertugisut nammassisinnaassagunigit aalajaaffiusariaqarpoq. Kissaatit tamarmik tunniunneqarsimanngillat, ilaanneeriarluta umiarsuit takornariartaatit kisaqquneqartarput. Ikaartaatinillu umiarsualivimmut atueqqusarsimagaluarlugit. Umiarsualiviup piumaneqartut tamangajalluinnaasa tunniussinnaasimavai.” –Lars Erik Bengtsson, Sikukimi Umiarsualivimmi Aqutsisoq oqaluttuarpoq.

Ulloq unnuarlu sulineq

Takornariartaaterpassuit umiarsualivimmi ulapisitsisimapput, ilaannimi allaat assartuussuit tikittussaareersut saniatigut takornariartaassuit ataatsikkut tikittut isumagisariaqartarpavut, unnuaarulluta.

Umiarsuit takornariartaatinut sullissisartunut Eimskip Greenland aamma Blue Water Greenland qanimut suleqatiginninnikkut eqaattunik aamma amerlanertigut pitsaanerusunik aaqqiissutinik Sikukimut nassaarfiusarsimavoq.

- Ukioq manna aatsaat taama takornariartaatilerinermi ulappuffiutigaaq, juuli aggustilu ingasattumik assut arpaffiupput. Taamali immikkut ulapitsigigaluarluta, unamminartut takkuttaraluartut, Kalaallit Nunaanni umiarsualivimmi sullissisuuneq, ingammik Nuummi immikkuullarissuteqarpoq, qanittumik suleqatigisartakkat aamma oqartussaasunik suleqateqarneq, isumalluutillu pineqarsinnaasut atorlugit tikittussat pitsaanerpaamik tikisinniartarlugit. Blue Water Greenlands Port Agency Manager, Lærke Arendrup Kyvsgaard oqaluttuarpoq.

Piareersaatit aallartittut

Ukiup tullissaanut takornariartaatilerinissamut piareersarnermi 2024-mi maannamut tikittussatut inniminneereersut 58-iupput.

Sikukimullu ilimanarsereerpoq 2023-imitulli amerlatigisut tikinnissaat. 2025-miillu mittarfik nutaaq ammarpat, Sikuki tikittussanik amerlanerusunik naatsorsuuteqarsinnaassaaq, taamaattoqarneratalu umiarsualiviup suli annertunerusumik tigusisinnaassusaa sukataartilersinnaava, allapput.