Piniartut: Takornariartaassuit akornusersorpaatigut

- Umiarsuit takornariartaatit tikikkaangata naluneq ajorparput qilalukkat takkunnaviangitsut.

Ittoqqortoormiini piniartut peqatigiiffianni siulittaasoq Åge Hammeken Danielsen taama oqaluttuarpoq.

Ittoqqortoormiinilu piniartut arlaleriarlutik umiarsuarniit angisuuniit akornusersorneqartarsimapput, tamannalu piniartut qatsukkat, siulittaasoq nassuiaavoq.

Umiarsuup motooriata nipaanit qilalukkat qimaasartut, Åge Hammeken Danielsen oqaluttuarpoq.

Inatsisinik unioqqutitsinerunngitsoq

Qilalukkanut qamatillutik umiarsuaq angisooq tikikkiartulersimasoq piniarfigisaannullu qallattulersimasoq, Åge Hammeken Danielsenip ilanngullugu oqaluttuaraa.

- Umiarsuaq takornariartaat piniarfigisatsinnut tikippoq, umiarsuarmilu sulisut ornippaatigut aperaluta tamaani kisarsinnaanerlutik. Iitigartippagut paasinnillutillu ingerlaqqipput. Umiarsuaq aallaqqikkami kilometerit marluk missiliorlugit ingerlareerluni unippoq. Akunnerni pingasuinnarni tamaaniissallutik oqaatigaat.  Taamaattoqanngilarli. Aatsaat unnukkut aallaqqipput.

Åge Hammeken Danielsen oqaluttuarpoq nangillunilu.

-Ajorpoq nuanneranilu.

Umiarsuit takornariartaatit piniarfinnut angalanissaq inerteqqutanngitsoq KANUAANA-p, Kalaallit Nunaanni Aalisarnermut Piniarnermullu Nakkutilliisoqarfimmi, pisortaq Claus Nielsen nassuiaavoq.

- Umiarsuit takornariartaatit kangerlunnut angalaqqusaannginnerannik inatsiseqanngilaq, Claus Nielsen oqarpoq.

Kisianni Avatangiisinut Naalakkersuisoqarfik arferit kangerlunni sivisunerusumik najortagaanni angallatit qanoq angalarsinnaanissaannik aqutsinermut atugassamik nalunaarummik maanna suliaqarpoq. Taannali qaqugu piariissanersoq suli paasinarsinngilaq.

Avannaani aamma ajornartorsiutaasoq

Tamannalu Ittoqqortoormiini piniartut qujaruppaat.

- Piniariartuusuguut umiarsuarniit takornariartaatiniit tingerlaataannalinniillu akornusersorneqarusunngilagut. Inatsiseqalernissaalu kissaatigaarput, Åge Hammeken Danielsen oqarpoq.

Qaanaami aamma assingusumik ajornartorsiuteqarput.

Qaanaap eqqaani Kangerlussuaq qilalukkat najugannarigaat, Qaanaami KNAPP-imi siulittaasua Tobias Simigaq oqaluttuarpoq.

- Umiarsuit takornariartaatit tingerlaataannallillu piniarfigisartakkatsinnut tikikkaangata qilalukkat qimaasarput, Tobias Simigaq oqarpoq ilanngullugulu oqaatigaa Avannaata Kommunianut killeqarfilersuinissamut qinnuteqaammik nassiussisimallutik.

Tobias Simigalli oqarnera naapertorlugu kommuni saffiginnissumut akissuteqarsimanngilaq.  

Takornariartassuit piniarfinnut pisarneranut Naalakkersuisut qanoq isumaqarnerat KNR-miit pasiniarlugu saaffiginnippugut, tassanngaanniillu suli akisoqanngilaq..