Akiliisinnaavugut: Umiarsuit takornariartaatit akitsuutit nutaat ilassilluaraat

Nuummi umiarsualivimmi umiarsuaq takornariartaat Seven Seas Mariner 216 meterinik takissuseqartoq inituvoq.

Umiarsuarmi ilaasut 700-it missaanniipput sulisullu 400-t sinneqarlutik, taannalu umiarsuarni takornariartaatini illoqarfiit pingaarnersaannut aasaq manna tikittussani siulliuvoq.

Taamaalillunilu umiarsuarni takornariartaatinut ilaasunut akitsuutinik nutaanik ukiup nikinnerani atuutilersunut akiliisussani aamma siulliulluni.

Akitsuutit nutaat pissutigalugit umiarsuarnut takornariartaatinut ilaalluni takornariartut nunatsinni nunamukarnerit tamaasa 50 koruunimit 100 koruunimut akiliisalertussaapput.

Ilaasulli KNR-ip umiarsualivimmi umiarsuarsuup saani naapitaasa tamanna akornutiginngilaat.

- Naamik umiarsuaq takornariartaat alla ilaaffigalugu aappaagu uteqqissaagut, taamaammat tamanna ajornartorsiutaanngilaq, Joe Finnegan Australiameersoq oqarpoq.

Taassuma nulia, Rosemary Finnegan isumaqataavoq.

- Taamaattussaavoq. Attaveqaasersuutinut iluaqutaappat tamanna Kalaallit Nunaannut pitsaasuussaaq, taanna oqarpoq, uialu nangippoq:

- Tamannalu siunissami takornariaqarnermut aamma pitsaassaaq. Umiarsualiivt pitsaanerulerpata umiarsuarnut tikikkuminarnerulissapput. Taamaammat aap ajornartorsiutaavinngilaq.

Umiarsuarsuaq takornariartaat Seven Seas Mariner Nuummi umiarsualivimmi initungaatsiarpoq. Assi © : Johansinnguaq Olsen / KNR

Malittarisassat nutaat ilaattut kommunit illoqarfinni pitsanngorsaanissamut assersuutigalugu puttasunut, perusuersartarfinnut pitsaanerusunut imaluunniit paasissutissiinermi allagartanut aningaasaliissutigineqaqqittussanut ilaasunut ataasiakkaanut avatangiisinut aserfallatsaaliunermullu akitsuuteqartitsisinnaapput.

Tamannalu naleqquttoq, Joe Finnegang isumaqarpoq.

- Isumatsialaavoq. Inuimmi uatsitut ittut piffissaq eqqorlugu umiarsuarmukarsinnaanngikkutta nunami perusuersartarfinni atuerusuppugut. Taamaammat tamarmi ajunngilaq, taanna oqarpoq.

Kalaallinut innuttaasunut pitsaasuusoq

USA-mit Massachusettsimit Peter Gillespie-ip aamma Margaret Taylorip akitsuutit nutaat aamma ilassilluarpaat.

Taakku saniatigut aningaasartuuteqalaarnissaq ajornartoqanngilaq.

- Kalaallit Nunaannut ajoraluartumik tikeraaqattaarnissara naatsorsuutiginngilara, taamaammat inuunermi ataasiarluni marloriarluniluunniit tikinniaraanni aningaasartuutissat annertunngillat, Peter Gillespie oqarpoq.

- Umiarsuarmullu takornariartaammut ilaaneq akisusoq Peter Gillespie oqarpoq. Taamaammallu ilaasunut saniatigut akitsuuteqarneq malugineqangaarnavianngitsoq, taanna isumaqarpoq. Assi © : Johansinnguaq Olsen / KNR

Margaret Taylorilu isumaqataavoq.

- Tikiffigisatsinnut pitsaasuuppat akiliisinnaakutsoorpunga, taanna oqarpoq.

Tamatuma saniatigut akitsuutit umairsualivinni atortorissaarutinut aningaasaliissutissat ilagigaat tusarlugu aamma nuannaarutigaa.

- Isumaqarpunga, aningaasat atorluarneqassasut, neriuppungalu kalaallinut inuiaqatigiinnut iluaqutaassasut, taanna oqarpoq.

Margaret Taylorip Kalaallit Nunaata nunataata katersugaasiviillu misigisaqarfiginissaat qilanaaraa. Assi © : Johansinnguaq Olsen / KNR

Akitsuutit nutaat ukioq manna januaarip aallaqqaataani atuutilerput, umiarsuarnulli takornariartaatinut ilaasussat ukiut arlallit sioqqullugit inniminneereertarmata umiarsuarnik takornariartaataatillit takornarianut saniatigut akitsuuteqartitsinissaq utaqqissutigeqqaarniarpaat.