Politikki

Múte B. Egede Gaza pillugu: Eqqissisoqarnissaa oqaatigisassavarput

Naalakkersuisut siulittaasuata Gazami akersuuttoqarneranik unitsitsisoqarnissaa kaammattuutigaa. Taanna Palæstinami eqqissisoqarnissaa pillugu Nuummi akerliussutsimik takutitsisunut oqarpoq. Taamaalilluni Inatsisartuni partiit arlallit isumaqatigai.

Allattoq Jokum Nielsen

juunip 26-at 2024 07:36

Inuit 100-it missaanniittut Gazami Israelip Hamasillu akornanni sorsuttoqarnerani maannamullu meeqqat palæstinamiut 13.000-it sinneqartut toqunerannik kinguneqartumi eqqissisioqarnissaa pillugu akerliussutsimik takutitsipput.

Naalakkersuisut siulittaasuat, Múte B. Egede (IA) Inatsisartut isaariaata saanit akerliussutsimik takutitsisunut oqaaseqarpoq. Taassumalu Naalakkersuisut Israelip Gazamut saassussinera akuersaarneqarsinnaanngissorigaat oqaatigaa, tamatumalu saniatigut Hamasip Israelimut saassussinera assuarinerarpaa. Taassuma eqqissisoqarnissaa sorsunnermillu iliuuseqartoqarunnaarnissaa kaammattuutigaa.

- Mette Frederiksenimuuppat imaluunniit naalakkersuinikkut sulialinnik allanik naapitsisarnitsinni nunatta kangiani eqqissisoqarnissaanik kissaateqarnera oqaatigisassavarput, taanna akerliussutsimik takutitsisoqarnerata kingorna KNR-imut oqarpoq.

SULIAQ NAATSUMIK

Oktobarip arfineq-aappaani Hamasip sakkutuui Israelip Gazallu killeqarfiatigut saassussipput, Israelillu oqarnera naapertorlugu inuit 1200-it toqutaapput – taakkkunanngalu amerlanerpaat inuinnaallutik.

Tamatuma saniatigut israelimiut 250-it tigusarineqarput Gazamukaanneqarlutillu. Tigusarineqartunit 100-t missaanniittut suli uumasut nalilerneqarpoq.

Tamatuma kingunerisaanik Islaelimiut Hamasimut ajugaaniarlutik sakkortuumik sakkutuulersornikkut saassussinermik aallartitsipput.

Gazami peqqinnissamut ministereqarfik Hamasimit aqunneqartoq naapertorlugu akiniaalluni saassussisoqarnerani palæstinamiut ikinnerpaamik 35.000-it toqutaapput. Taakkunannga 13.000-init amerlanerusut meeraapput.

Saassussinerit israelimiut palæstinamiullu kikkut nunamik pisinnaatitaanerat pillugu ukiuni qulikkaani aaqqiagiinnginnerisa kinguneraat.

Gazami Danmarkimi Langelanditulli isorartutigisumi inuit 2 millionit missaanniittut najugaqarput. Taakku 40 procentii 15-it ataallugit ukioqarput.

Peqqarniisaarniap Hamasip Gaza 2007-imi aqulerpaa. Israelilli Gazap killeqarfii, Gazap imartaa Gazallu silaannaa aqutaralugu.

Naalagaaffiit Peqatigiit Isumannaallisaaniaqatigiivisa isumaqatigiissut Israelip Hamasillu akornanni sakkuaakkunnaartoqarnissaanik isumaqatigiissummut tapersiisoq juunip qulingani akuersissutigaa.

Hamasip isumaqatigiissut akueraa annikitsortaasa isumaqatigiinniutigilluarnissaat piareersimaffigalugu.

Allisiguk

Taamaalilluni Inatsisartuni partiit arlallit isumaqatigai.

Assigiinngisitsisoqassanngitsoq

Nunanut allanut sillimaniarnermullu ataatsimiititaliami ilaasortap Kuno Fenckerip (Siumut) Palæstinami illuatungeriit aaqqiagiinngitsut sorsunnermik unitsitsisariaqartut qaammammi matumani siusinnerusukkut oqaatigaa:

- Inuit tamatta inuuneqarnissamik pisinnaatitaaffeqaratta inuiaqatigiit illersornissaat salliuttariaqarparput, inunnillu toqoraanerit ilaat inuiannik pinerlinnermut qanilluinnartut illuatungeriinnit erngertumik unitsinneqartariaqarput.

Aamma atuarukGazami sorsunneq pillugu Nunanut allanut sillimaniarnermullu inatsisartuni ataatsimiititaliaq: - Unitsinneqartariaqarpoq

Taanna ataatsimiititaliap siulittaasuanit, Pipaluk Lyngemit Inuit Ataqatigiinneersumit taperserneqarpoq:

- Meeraaguit, inersimasuuguit, palæstinamiuuguit, danskiuguit kalaaliuguilluunniit assigiinngisitsisoqassanngilaq. Inuit Ataqatigiinnit isumaqatigiissutit Naalagaaffiit Peqatigiinnit pilersinneqartut malittariaqarigut isumaqarpugut.

Naalagaaffiit marluisut pilersinneqarnissaat taperserneqartoq

Illuatungiliuttut partiiannit Atassummi siulittaasoq Aqqalu Jeremiassen ingerlariaqqilluni Palæstinami eqqissisoqarnissaanik kaammattuuteqarpoq. Taanna palæstinamiut namminneq naalagaaffeqassasut isumaqarpoq:

- Nunatta naalagaaffiit marluiusut pilersinneqarnissaannik aaqqiissut tapersertariaqarpaa.

Aamma atuarukNaggataatigut inuit 100 appisimaarput, nilliallutik qiallutillu Gazami eqqugaasut pillugit

Taanna Naleqqap siulittaasuanit, Pele Brobergimit taperserneqarpoq, taassumalu isumaqataanini erseqqissaatigaa:

- Naalgaaffiup pinerliniaqatigiillu akornanni inuit pinerlinneqartillugit sakkuaattoqarnera pissutigalugu illuatungeriinni nukittuinerpaasumut eqqarsartitsisariaqaraluarpoq, inuiannullu qaartartumeerisoqarani.

Nutaarsiassami kukkunermik nassaarsimaguit uunga allaffigineqarsinnaavugut.