Gazami sorsunneq pillugu Nunanut allanut sillimaniarnermullu inatsisartuni ataatsimiititaliaq: - Unitsinneqartariaqarpoq

Kangiani qiterlermi alianartuliaq naalagaaffinnik marluiusunik pilersitsinikkut aaqqiivigineqartariaqartoq ataatsimiititaliami ilaasortat arlallit oqarput.

Allattoq Jokum Nielsen

juunip 19-at 2024 07:34

Hamasip Israelillu akornanni sorsunneq pillugu nukissaalatsinerminnik sapaatip akunnerani kingullermi Naalakkersuisut siulittaasuanit Múte B Egedemik peqataaffigineqartumik inuit 100-t missaaniittut akerliussutsiminnik takutitsipput.

Sorsunneq pillugu Naalakkersuisut siulittaasuanik ersarinnerusumik akerliussutsimik takutitsisut piumasaqarput. Inuiannik palæstinamiunik inuartarinninnermik taasaminnik Naalakkersuisut siulittaasuata ersarissumik akerliunerminik nalunaaruteqarnissaa akerliussutsimik takutitsisut kissaatigat.

Sorsunneq pillugu Inatsisartut Nunanut allanut sillimaniarnermullu ataatsimiititaliamut ilaasortat ilaannik paasiniaalluni KNR apersuivoq.

Aamma atuarukNuummi innuttaasut Gaza pillugu: Uagut nammineq ajornartorsiuteqarpugut

Naalagaaffiit marluiusut pilersinneratigut Hamasip Israelillu akornanni sorsunnerup unitsinneqarnissaa apersukkatta tamarluinnangajammik isumaqatigissutigaat.

- Inuugatta tamatta inuuneqarnissatsinnullu pisinnaatitaaffeqarluta innuttaasut sakkutuujunngitsut illersorneqarnissaat pingaartittariaqarparput, sakkutuujunngitsunillu toqoraaneq inuiassuarnik toqoraanermut qanilluinnartuusoq illua’tungeriinnit ingerlatiinnartumik unitsinneqartariaqartoq, Kuno Fencker, Siumut sinnerlugu ilaasortaasoq oqarpoq.

Ataatsimiititaliallu siulittaasuanit Pipaluk Lyngemit ilalerneqarpoq:

- Meeraaguit, inersimasuuguit, palæstinamiuuguit, danskiuguit kalaaliuguilluunniit assigiinngisitsissanngilagut. Naalagaaffiit Peqatigiit isumaqatigiissutaat aamma uagut akueralugit atuuttunngortinnikuusagut malillugit ingerlatsisariaqartugut Inuit Ataqatigiinnit isumaqarpugut.

SULIAQ NAATSUMIK

Oktobarip arfineq-aappaani Hamasip sakkutuui Israelip Gazallu killeqarfiatigut saassussipput, Israelillu oqarnera naapertorlugu inuit 1200-it toqutaapput – taakkkunanngalu amerlanerpaat inuinnaallutik.

Tamatuma saniatigut israelimiut 250-it tigusarineqarput Gazamukaanneqarlutillu. Tigusarineqartunit 100-t missaanniittut suli uumasut nalilerneqarpoq.

Tamatuma kingunerisaanik Islaelimiut Hamasimut ajugaaniarlutik sakkortuumik sakkutuulersornikkut saassussinermik aallartitsipput.

Gazami peqqinnissamut ministereqarfik Hamasimit aqunneqartoq naapertorlugu akiniaalluni saassussisoqarnerani palæstinamiut ikinnerpaamik 35.000-it toqutaapput. Taakkunannga 13.000-init amerlanerusut meeraapput.

Saassussinerit israelimiut palæstinamiullu kikkut nunamik pisinnaatitaanerat pillugu ukiuni qulikkaani aaqqiagiinnginnerisa kinguneraat.

Gazami Danmarkimi Langelanditulli isorartutigisumi inuit 2 millionit missaanniittut najugaqarput. Taakku 40 procentii 15-it ataallugit ukioqarput.

Peqqarniisaarniap Hamasip Gaza 2007-imi aqulerpaa. Israelilli Gazap killeqarfii, Gazap imartaa Gazallu silaannaa aqutaralugu.

Naalagaaffiit Peqatigiit Isumannaallisaaniaqatigiivisa isumaqatigiissut Israelip Hamasillu akornanni sakkuaakkunnaartoqarnissaanik isumaqatigiissummut tapersiisoq juunip qulingani akuersissutigaa.

Hamasip isumaqatigiissut akueraa annikitsortaasa isumaqatigiinniutigilluarnissaat piareersimaffigalugu.

Allisiguk

Naleqqap siulittaasua Pele Broberg, isumaqarpoq Palæstina naalagaaffittut akuerisaanngimmat sorsunnertut taaneqarsinnaanngitsoq, nangipporlu: - Palæstinamiut nunaateqarnatillu naalagaaffeqarnatillu inuupput, taamaannerani Israel nukittoorujussuartut inissisimasoq tamakkiisumik ingerlarsorpoq.

Qupanuk Olsen saassutaritittoq

Gazami sorsunneq nunarsuarmi aalassassimaartitseqaaq, aamma qarasaasiatigut inuit naapittarfigisaani.

Qupanuk Olsen qarasaasiatigut inuit naapittarfigisaanni sunniiniartartoq Israelimi Tel Avivimi ataatsimeersuartoqarnerani peqataaffigisaminit instagramimini saqqummiussimmat sorsunneq pillugu oqallinneq qaartutut isikkoqalerpoq.

Kalaallit Nunaanni piorsarsimassutsikkut ilisimaneqartut ikkussillattaalerput Qupanuk Olsen avoqqaarlerlugu.

Aamma atuarukNaggataatigut inuit 100 appisimaarput, nilliallutik qiallutillu Gazami eqqugaasut pillugit

Qarasasiatigut inuit naapittarfigisaani sunniiniartartumut saassutarinninneq pillugu ataatsimiititaliami ilaasortat oqaaseqarusunngillat, taamaakkaluartorli Atassutip siulittaasua, Aqqalu Jeremiassen sunniiniartartup Israeliliarnermini piffissaliisimanera iluatsitsiffiunngitsoq isummerfigaa oqarami.

- Piffissamik eqquilluanngilaq.

Taamatullu oqaaseqarneq ilaatigut Pele Brobergemit ilalerneqarpoq ima:

- Kalaallit Nunaanni oqalliseriaatsimi sammisaq pinnagu kisiannili inummik isumaqatiginngisamik saassussisarneq takornartaanngilaq.

Gazami pisunut politikkimik isummersimannginnerminut pakatsineq paasisinnaalluarlugu Qupanuk Olsen tusagassiutinut nalunaarutigisamini allappoq nassuiaatigaluguli saqqummiussisarfini politikkimut tunngasunut atugarisuunagu. Piumassutsiminik peqataasussatut ataatsimeersuarnermut qaaqqusaasimanini aamma naqissuserpaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.