Nuummi innuttaasut Gaza pillugu: Uagut nammineq ajornartorsiuteqarpugut

Inuit 100-t missaanniittuut Gazami sorsunneq pillugu sapaatip akunnerata siuliani akerliussutsimik takutitsipput. Taakku qinikkat aalajangiinissaanissaat sakkuaattoqarunnaarnissaanillu piumasaqaateqarnissaat anguniagaraat. KNR-ip inuit qinikkat qanoq iliortariaqarnerannik isumaqarnersut paasiniaaffigai.

Allattoq Birgitte Kjeldsen, Nicole Sander Bertelsen

juunip 18-at 2024 10:48

Nutserisoq Steve Pedersen Hinrup

- Årh, isumaqarpunga ajornakusuungaatsiartoq.

Ole Sidenius KNR-ip Nuummi aqqusinermi naapillugu Gazami sorsunnermut atatillugu qanoq eqqarsaatigineqarnersoq aperimmagu oqarpoq.

Siorna oktobarip arfineq-aappaani sorsuttoqalermalli illut aserortersimasut, meeqqat kaattut, tuperfiit inuillu toqungasut assingi nunarsuarmi tamarmi TV-aviisini avisillu saqqaanni takussaapput.

Assit tamakku inuppassuit sorsunneq pillugu akerliussutsimik takutitsinerannik aamma Israelip Hamasillu akornanni eeqqissinermik sakkuaattoqarunnaarnissaanillu piumasaqarnerannik kinguneqarput.

SULIAQ NAATSUMIK

Oktobarip arfineq-aappaani Hamasip sakkutuui Israelip Gazallu killeqarfiatigut saassussipput, Israelillu oqarnera naapertorlugu inuit 1200-it toqutaapput – taakkkunanngalu amerlanerpaat inuinnaallutik.

Tamatuma saniatigut israelimiut 250-it tigusarineqarput Gazamukaanneqarlutillu. Tigusarineqartunit 100-t missaanniittut suli uumasut nalilerneqarpoq.

Tamatuma kingunerisaanik Islaelimiut Hamasimut ajugaaniarlutik sakkortuumik sakkutuulersornikkut saassussinermik aallartitsipput.

Gazami peqqinnissamut ministereqarfik Hamasimit aqunneqartoq naapertorlugu akiniaalluni saassussisoqarnerani palæstinamiut ikinnerpaamik 35.000-it toqutaapput. Taakkunannga 13.000-init amerlanerusut meeraapput.

Saassussinerit israelimiut palæstinamiullu kikkut nunamik pisinnaatitaanerat pillugu ukiuni qulikkaani aaqqiagiinnginnerisa kinguneraat.

Gazami Danmarkimi Langelanditulli isorartutigisumi inuit 2 millionit missaanniittut najugaqarput. Taakku 40 procentii 15-it ataallugit ukioqarput.

Peqqarniisaarniap Hamasip Gaza 2007-imi aqulerpaa. Israelilli Gazap killeqarfii, Gazap imartaa Gazallu silaannaa aqutaralugu.

Naalagaaffiit Peqatigiit Isumannaallisaaniaqatigiivisa isumaqatigiissut Israelip Hamasillu akornanni sakkuaakkunnaartoqarnissaanik isumaqatigiissummut tapersiisoq juunip qulingani akuersissutigaa.

Hamasip isumaqatigiissut akueraa annikitsortaasa isumaqatigiinniutigilluarnissaat piareersimaffigalugu.

Allisiguk

Nuummi aamma sapaatip akunnerata siuliani akerliussutsimik takutitsisoqarpoq. Akerliussutsimik takutitsisut 100-it missaanniittut Gazami pinerlineqartunut misiginneqatiginninnerminnik tapersiinerminnillu takutitsillutik Inatsisartut tungaannut ingerlaaqatigiipput.

Kulturikkut suliniuteqartut “Inuit for Palestine”-mik oqaasinnaaqarlutik politikerinut suaartarput.

Aamma atuarukNaggataatigut inuit 100 appisimaarput, nilliallutik qiallutillu Gazami eqqugaasut pillugit

Múte B. Egedep Gazami pisunut atatillugu isummernissaa taakku anguniarpaat.

- Nunatsinni siuttugut kikkuunitsinnik avammut takutitsisussaapput. Taamaammat nunatsinni siuttut inuiannik toqoraasoqarneranut aalajangiissuteqarlutik nassuerutiginninnissaat uagutsinnut pingaaruteqarpoq, aaqqissuisut ilaat, Nina Kreutzmann Jørgensen oqarpoq.

KNR-ip inuit akerliussutsimik takutitseqataanngitsut isumaannik tamatuma kingorna paasiniaaffigai.

Nuummiummi Gazami pisunut qanoq isumaqarpat? Tamannalu politikerinit qisuariarfigineqartariaqarsoraat?

Nunatsinni pisut eqqarsaatigineruakka

Nuummi Brugsenip silataani Birthe Therkildsenip Gazami aaqqiagiinngittoqarneranut qanoq isumaqarnini eqqarsaatigilaaqqaarpaa.

- Malinnaaffiginngilakka. Kisianni TV-aviisimi tusagassiuutitigullu susoqarnera takuinnarnikuuara, taanna oqarpoq.

Taassumalu Nuummi pingasunngormat akerliussutsimik takutitsisoqarsimasoq tusagassiuutitigut paasivaa.

Aamma atuarukAssit takukkit: Gazami sorsunnermut akerliuneq

Taamalu KNR-ip unitsillugit oqaloqatigisaat arlallit isumaqarput.

Ivalu Kaspersen taakku ilagaat. Taanna Nuummi Katuap saani qaninilu qamutaaqqaniittoq ingerlasut naapippagut.

Gazami maannakkut susoqarnera pillugu qanoq eqqarsarpit?

- Ajoraluaqaaq, kisianni susinnaanngilarput. Maani pisut eqqarsaatigineruakka. Nunani allani pisut pinnagit, taanna oqarpoq.

Múte B. Egede politikerillu allat aaqqiagiinngittoqarneranut atatillugu nunatsinni pisortatigoortumik isummertoqassanersoq Ivalu Kaspersen aperineqarami ima akissuteqarpoq:

- Naluara, nammineq aalajangissavaat.

Birthe Therkildsenilu aamma taama isumaqarpoq, taannali aalajangiisinnaasuugaluaruni politikerit nunatsinni ajornartorsiutinik sammisaqassapput.

- Immaqa isummersinnaagaluarput, kisianni uagut nunatsinni ajornartorsiutigut taakkua pingaarnerupput, tassaniissorivara malinnaaffigalugu isummersinnaanera nunatsinni ajornartorsiutit pillugit, taanna oqarpoq.

Isummernissamut pisussaaffeqarneq

Naalli Ole Sideniusip Palæstinami Israelimi pisut ajornakusoorsorigaluarlugit Gazami pisut tataannartut qularutiginngilaa.

Taassuma Nuummi sapaatip akunnerata siuliani akerliussutsimik takutitsisoqartoq maluginiarpaa.

Nunarsuaq tamakkerlugu naalagaaffinni qullersat assigiinngitsut Gazami sorsunnermut atatillugu isummaminnik pisortatigoortumik nalunaaruteqarnikuupput. Nunatsinni poliutikerit taamaaliortariaqarpat?

- Kikkut tamarmik isummaminnik avitsinissamut killilersorneqassanngillat, taassuma apeqqut sivisulaamik eqqarsaatigeriarlugu akissutigaa.

- Kisianni inunnut tunngatillugu alianartoqarnerani tamatta isummernissamut pisussaaffeqarsimassaagut.