Assit takukkit: Gazami sorsunnermut akerliuneq

Nuummi inuit Gazami palæstinamiunik nungusaanertut taasartik pillugu ullumi akerliussutsimik takutitsipput.

Allattoq Hanna Vestergaard Hviid, Birgitte Kjeldsen

juunip 12-at 2024 15:48

Erfalasoq qernertumik, aappaluttumik, qaqortumik qorsummillu qalipaateqartoq inuillu 100-t missaanniittut assigiinngitsunik ukioqartut suaartartut.

Nuummi inuit Tuapannguanit Inatsisartut tungaannut pingasunngornermi ualikkut takusinnaavaat.

Gazamimi sorsunneq pillugu akerliussutsimik takutitsisoqarpoq. Kulturikkut suliniuteqartut ”Inuit for Palestine”-mik oqaasinnaaqarlutik politikerinut tusaaniaatitsipput.

- Nunatta tungaanniit kukkusoqarneranik oqarsinnaassuseqartugut takutinneqassaaq, aaqqissuusseqataasoq, Nina Kreutzman Jørgensen oqarpoq.

Taassuma nunarput sorsunnermut palæstinamiunullu kingunerluuteqangaatsiarneranut atatillugu nipangersimaannannginnissaminut akisussaassuseqarsoraa.

SULIAQ NAATSUMIK

Oktobarip arfineq-aappaani Hamasip sakkutuui Israelip Gazallu killeqarfiatigut saassussipput, Israelillu oqarnera naapertorlugu inuit 1200-it toqutaapput – taakkkunanngalu amerlanerpaat inuinnaallutik.

Tamatuma saniatigut israelimiut 250-it tigusarineqarput Gazamukaanneqarlutillu. Tigusarineqartunit 100-t missaanniittut suli uumasut nalilerneqarpoq.

Tamatuma kingunerisaanik Islaelimiut Hamasimut ajugaaniarlutik sakkortuumik sakkutuulersornikkut saassussinermik aallartitsipput.

Gazami peqqinnissamut ministereqarfik Hamasimit aqunneqartoq naapertorlugu akiniaalluni saassussisoqarnerani palæstinamiut ikinnerpaamik 35.000-it toqutaapput. Taakkunannga 13.000-init amerlanerusut meeraapput.

Saassussinerit israelimiut palæstinamiullu kikkut nunamik pisinnaatitaanerat pillugu ukiuni qulikkaani aaqqiagiinnginnerisa kinguneraat.

Gazami Danmarkimi Langelanditulli isorartutigisumi inuit 2 millionit missaanniittut najugaqarput. Taakku 40 procentii 15-it ataallugit ukioqarput.

Peqqarniisaarniap Hamasip Gaza 2007-imi aqulerpaa. Israelilli Gazap killeqarfii, Gazap imartaa Gazallu silaannaa aqutaralugu.

Naalagaaffiit Peqatigiit Isumannaallisaaniaqatigiivisa isumaqatigiissut Israelip Hamasillu akornanni sakkuaakkunnaartoqarnissaanik isumaqatigiissummut tapersiisoq juunip qulingani akuersissutigaa.

Hamasip isumaqatigiissut akueraa annikitsortaasa isumaqatigiinniutigilluarnissaat piareersimaffigalugu.

Allisiguk

Akerliussutsimik takutitsinermik aaqqissuussisut akerliussutsimik takutitsinermut atatillugu naalakkersusiut siulittaasuanut allagaqarput, taakkulu tamatuma tusarneqarnissaa neriuutigaat.

- Neriuppugut anillalluni akuersaassagaa. Neriuppugut sakkuaakkunnaartoqarnissaanik piumasaqassasoq, taanna oqarpoq.

Angut akerliussutsimik takutitsisut takkutsikkusutaat Naalakkersuisut siulittaasuat, Múte B. Egede aamma takkuppoq. Taanna eqimattat akerliussutsimik takutitsisut kingullersaanniippoq.

Eqimattat Inatsisartut saanni nunanut allanut tunngasunut naalakkersuisumit, Vivian Motzfeldtimit naalakkersuisut siulittaasuannit, Múte B. Egedemit, Inatsisartuni Nunanut allanut Sillimaniarnermullu ataatsimiititaliami siulittaasuamit Pipaluk Lyngemit naapinneqarput.

Naalagaaffiit Peqatigiit Israelip Hamasillu nunarsuarmiunut pinerliiteqarsimanerannik inerniliisumik nalunaarusiamik ullormi saqqummersitsineranni akerliussutsimik takutitsoqarpoq.

Aamma atuarukPalæstinamiut Gazami meerartaat maannamuugallartoq 2141-t 2023-mi toqutaasimasut FN-ip uppernarsaraa

Naalagaaffiit Peqatigiit Gazami palæstinamiut meeraartaat 2141-t 2023-mi toqutaasimasut nalunaarusiami uppernarsarneqarpoq. Israelimiut meerartaat 43-t Israelimi Vestbreddenimilu oktobarip arfineq-aappaani Hamasimit pikisitsisut saassussineranni tigusarinninnerannilu toqutaasimasut aamma uppernarsarneqarpoq.