Palæstinamiut Gazami meerartaat maannamuugallartoq 2141-t 2023-mi toqutaasimasut FN-ip uppernarsaraa
Meeqqanut nakuuserniartarneq 2023-mi aatsaat taama ingasatsigilerpoq.
Gazami Sudanimilu aaqqiagiinngissuteqarnerit tamatumunnga pissutaanerpaapput. Naalagaaffiit Peqatigiit nalunaarusiaanni saqqummersinneqaqqammersumi tamanna atuarneqarsinnaasoq, nutaarsiassaqartitsivik AFP allappoq.
Kangia Qiterlermiinnaq aaqqiagiinngissutit pissutaallutik meeqqanut nakuuserniartarnerit 155 procentinik annertunerulersimavoq.
Nalunaarusiaq "Børn og væbnet konflikt", tassa meeqqat sorsuffiusuniittut pillugit nalunaarusiaq Naalagaaffiit Peqatigiit ukiut tamaasa saqqummersittarpaat.
Palæstinamiut Gazami meerartaat 2141-t 2023-mi toqutaasimasut, FN-ip kisitsisaataasa uppernarsarpaa. Taakkunannga 2000-nit ikinnerunngitsut siorna oktobarip ulluisa arfineq-aappaata decembarillu 31-ata akornanni toqutaasimapput.
Meeqqanut sakkortuumik pinerluttuliornerit 23.000-t taassuma saniatigut 2023-mi nalunaarutigineqarsimapput, taakkunannga israelimiut 3900-t palæstinamiullu 19.887-it pinerluttuliorfigineqarsimanerat suli uppernarsarneqarsimanatik.
Israelimiut sakkutuui sorsuffinni allatigulluunniit aaqqiagiinngissuteqarfiusuni meeqqat illersorniarlugit naammattumik iliuuseqarneq ajortut, nutaarsiassaqartitsiviit nalunaarusiap saqqummersinneqarnerani ilaatigut allaaseraat.
Paasissutissat tamakku nutaarsiassaqartitsiviup AFP-p aamma uppernarsarpai.
