Inuit Gaza pillugu akerliussutsimik takutitsiniartut

Kulturikkut suliniuteqartut eqimattat akerliussutsimik takutitsinermikkut naalakkersuisut siulittaasuat Palæstinami pisumut atatillugu nalunaaruteqartitsissallugu neriuutigaat.

Allattoq Hanna Vestergaard Hviid

juunip 11-at 2024 14:51

Nutserisoq Connie Fontain

Nunarsuarmi sumiiffinni assigiinngitsuni akerliussutsimik takutitsinerpassuit siorna oktobarimili takussaalerput. Inuit Gazami pisut, palæstinamiunik nungusaasoqarneranik taasartik akerliussutsimik takutitsiffigaat.

Nunatsinnili arlallit aamma taamaaliulerput. Kulturikkut suliniuteqartut eqimattat “Inuit for Palestine”-mik oqaasinnaaqarlutik Nuummi akerliussutsimik takutitsiniarput.

Taakku tusagassiuutinut nalunarummi allapput.

- Gazami inuiannik nungusaaneq massakkut ingerlasoq isigalugu, Múte B. Egede ersarissumik nalunaaruteqarnissaanik kajumissaarivugut. Atajuartussamik sakkulersorluni akiuukkunnaarnissaq kissaatigaarput, nunarsuarmilu tamarmi akerliussutsimik takutitsisunik tapersersuingaarluta, taakku allapput.

Aamma atuarukPolitikerit nuimasut Nuummiinnerminni inuiannik nungusaaneq pillugu allagartarsualisaarfigineqarput

Taakku sakkuaakkunnaartoqarnissaanik kissaateqartut tamarmik politikerinut takutitseqataajartornissaat kaammattuutigaat.

- Akerliussutsimik takutitsinermi uagut nunatsinni innuttaasutut inunnut Palæstinarmiunut tapersersuinerput takutikkusupparput.

SULIAQ NAATSUMIK

Oktobarip arfineq-aappaani Hamasip sakkutuui Israelip Gazallu killeqarfiatigut saassussipput, Israelillu oqarnera naapertorlugu inuit 1200-it toqutaapput – taakkkunanngalu amerlanerpaat inuinnaallutik.

Tamatuma saniatigut israelimiut 250-it tigusarineqarput Gazamukaanneqarlutillu. Tigusarineqartunit 100-t missaanniittut suli uumasut nalilerneqarpoq.

Tamatuma kingunerisaanik Islaelimiut Hamasimut ajugaaniarlutik sakkortuumik sakkutuulersornikkut saassussinermik aallartitsipput.

Gazami peqqinnissamut ministereqarfik Hamasimit aqunneqartoq naapertorlugu akiniaalluni saassussisoqarnerani palæstinamiut ikinnerpaamik 35.000-it toqutaapput. Taakkunannga 13.000-init amerlanerusut meeraapput.

Saassussinerit israelimiut palæstinamiullu kikkut nunamik pisinnaatitaanerat pillugu ukiuni qulikkaani aaqqiagiinnginnerisa kinguneraat.

Gazami Danmarkimi Langelanditulli isorartutigisumi inuit 2 millionit missaanniittut najugaqarput. Taakku 40 procentii 15-it ataallugit ukioqarput.

Peqqarniisaarniap Hamasip Gaza 2007-imi aqulerpaa. Israelilli Gazap killeqarfii, Gazap imartaa Gazallu silaannaa aqutaralugu.

Naalagaaffiit Peqatigiit Isumannaallisaaniaqatigiivisa isumaqatigiissut Israelip Hamasillu akornanni sakkuaakkunnaartoqarnissaanik isumaqatigiissummut tapersiisoq juunip qulingani akuersissutigaa.

Hamasip isumaqatigiissut akueraa annikitsortaasa isumaqatigiinniutigilluarnissaat piareersimaffigalugu.

Allisiguk

Akerliussutsimik takutitsineq pingasunngornermi nalunaaqutaq pingasunut Tuapannguit isuaniit aallartissaaq. Ataatsimullu Inatsisartunut ingerlaaqatigiittoqassalluni.

Akerliussutsimik takutitsinissamik aaqqissuussisut tassaapput Alfred Victor Hansen, Aka Niviana Mørch Pedersen, Laura Lennert Jensen, Mudi Kramer Berthelsen, Nina Kreutzmann Jørgensen aamma Nivi Pedersen.