Naggataatigut inuit 100 appisimaarput, nilliallutik qiallutillu Gazami eqqugaasut pillugit
Meeqqat toqorarput.
Pappialarsuarmut tuschimik aappalaartumik ”pualasuumik” allatami taama allassimavoq.
Nuummi Gazami sorsunneq akerleralugu akerliussutsimik pingasunngornermi takutitsinermi allagartarsuarni allani oqaatsit assingusut suaarutillu aamma takussaapput.
Aputeqalaartumi inuit 50 missaanni meeqqat qamutaat kaamisarlugit/uniarlugit palæstinamiullu erfalasuannik tigumiartumik siuttoqarlutik Inatsisartut ataatsimiittarfiannut ingerlaarput. Arlallit arpallutik ornigupput ilanngullutillu.
Ataatsimik anguniagaqarput.
- Nunami pisortarput tassaavoq avammut kinaanitsinnik takutitsisussaq. Tamaattumik uagutsinnut pingaartuuvoq nunami pisortarput isummissasoq inuinnarnillu toqoraaneq miserratiginagu. Soorunamilu sakkuaakkunnaarnissaq piumasaqaatigalugu.
Nina Kreutzmann Jørgensen akerliussutsimik takutitsinermik aaqqissuusseqataasoq taama oqarpoq.
Neriuutigaa akerliussutsimik takutitsinerup politikerit kisiisa angusimassanngikkai.
- Neriuutigaara Gaza angussagaa, aamma neriuutigaara nunarsuarmi sumiluunniit akerliussutsimik takutitseqativut angussagai, takuniassammassuk aamma uagut maani Kalaallit Nunaanni Gazami inuinnarnik toqoraaneq akerlerigipput.
Sorsunneq, akerleriinneq aamma Instagram
Nuummi akerliussutsimik takutitsineq ingerlanneqarpoq nunami maani Gazamik ukkataqaleruttorneq ilutigalugu.
Ingammik tamat attaveqaqatigiittarfiini.
Siorna Gazami sorsunneq aallartimmat arlallit piumasaqarput inuit tusaamasat inuillu attaveqaqatigiittarfinni malitserpassuallit Gazami pisut sunniuteqarnertik atorlugu oqaluuserinninnermik kaammattuissasut.
Isumminngitsullu amerlasuut malitsiminnit nuannaartorinnitsiminnillu alarneqarput.
Assersuutigalugu Amerikami tusagassiuutini attaveqaqatigiittarfinnilu tusaamasaq Kim Kardashian taama pineqarpoq.
Juuni aallartittoq Kalaallit Nunaata sunniiniartartuisa ilaat assigisapajaavanik misigisaqarpoq. Tassa Qupanuk Olsen, sunniiniartaartuusoq instagram-imilu Q’s Greenland-imik ingerlatsisoq, isumasioqatigiinnermut ‘Nas Summit’-imut peqataasoq. Aaqqissuussaq tassaavoq inunnut inuit attaveqaqatigiittarfiinut imassaqartitsisunut naatsorsuussaq.
Isumasioqatigiinneq Israelimi Tel Avivimik ingerlanneqarpoq Qupanuk Olsenilu Instagramprofilimini pisumit ilanngussivoq.
Taanna oqaaseqarfissartaani annertoqisumik isornartorsiorneqarpoq, nunatsinnilu kulturikkut ilisimaneqarluartut arlallit qisuariarput nammineq ikkussillutik sunniiniartartoq isumaqatiginagu ajattorpaat.
Tusagassiuutinut nalunaarummi Qupanuk Olsen kingunerisaanik isornartorsiuisut akivai, ilaatigut allalluni Gazami pisunut politikikkut isummersimannginnini pakatsissutigineqarsimammat paasisinnaallugu, kisianni “Q’s Greenland tassanngimmat politikikkut isummertarfik, naak ukiuni makkunani politikip qanoq pingaartiginera annikillisanngikkaluarlugu”.
- Nipituumik erseqqissumillu erseqqissarniarpara isumasioqatigiinnermut qaaqusaagama nammineq piumassutsinnik peqataasutut. Angalaninni aattalinnik taaneqartartunik aningaasarsinngilanga, allappoq.
Sorsunnermi pinerluutit
Inuit Inatsisartut tungaannut ingerlasut uterfigigutsigit pissangartorsiorneq, ajorsaarineq sunniiniartartullu oqaljuuserineqanngillat. Isummernerit isertuunneqanngillat:
- Inuit for Palestine. Inuit for Palestine!.
- Free, free Palestine. Free, free Palestine!
Akerleriinnerup nunami maani maluginiarneqarnerata isornartorsiorneqarneratalu saniatigut Israelip tungaanut Gazamilu pisunut akerliulluni oqarluartaarnerit nunat assigiinngitsut akornanni sapaatip akunnerini kingullerni sakkortuseriarsimapput.
Pingaartumik sapaatip akunnerani maani FN-ip Undersøgelseskommission-iata Misissuillutik Paasiniaasartuisa) paasimmagu israelimiut sakkutuui aamma Hamas sorsunnermi pinerluttuliorsimasut.
- Pinngitsoornani pisariaqarpqo pinerluttuliorsimasut tamarmik akisussaatinneqassasut, Navi Pillay, FN-imi paasiniarsaartut siulittaasuat sapaatip akunnerani maani siusinnerusukkut oqarpoq.
FN-ip Isumannaallisaanermut Siunnersuisartuisa ilutigalugu assigisaanik tamaviaarlutik Gazami sakkuaakkunnaarnissaq anguniarlugu ilungersuutigaat.
Meeqqat pineqarput
Gazami qanittukkut eqqissisoqarnissaanik sakkuaattoqarunnaarnissaanillu neriuutiginnittut ilagaat Klaus Geisler. Pingasunngormat akerliussutsimik takutitseqataavoq.
Tassani oqaatigaa tapersersuinerminik takutitsinissani pingaarteqalugu.
- Tassa meeqqat, inuusuttut, inuit namminneq qanoq iliorsinnanngitsut. Tamatumunnga ilaassallutik pinngitsaalineqarput pissaanermillu ima annertutigisumik saassunneqarlutik allaat qimaasinnaanatik, pingasunngormat KNR-imut oqarpoq.
Kilaasimut Gazap nunataa Kalaallit Nunaanniit kilometerinik tuusintilinnik arlalinnik ungasissuseqarmat apeqqutaanngilaq.
- Tamatta Nunarsuarmi maani inuuvugut. Tamattalu nipaatsumik isiginnaaginnarutta, taava … taamaassinnaanngilagut. Ungasikkaluaqaluta iliuuseqartariaqarpugut, oqarpoq.
Akerliussutsimik takutitsinerup aallartinneraniit 45 minutsit missaat qaangiummata Inatsisartut ataatsimiittarfiata majuartarfii anguaat.
Taamaalinerani inuit 100 missanniipput.
Múte B. Egede (IA), Naalagaaffinngornissamut Nunanullu allanut Naalakkersuisoq Vivian Motzfeldt (S) Nunanut Allanut aamma Isumannaannissamut Ataatsimiititaliami ilaasortat marlussuit akerliussutsimik takutitsisunik isginnaarput.
Tassanngaannaq inuit erinarsorlutik appipput. Sanileriillutik erfalasulisaarlutik allagartarsuillu tigumiarlugit erinarsuut Eqqissisinnga-aat appippaat. Arlallit imerlaarsipput qullingiallattaarlutillu.
Erinarsuut naammat akerliussutsimik takutitsisut Gazami toqutaasut pillugit minutsi ataaseq nipaallisimapput. Biilit H.J. Rinksvejikkut saneqquttut kisimik tusarsaapput.
Minutsi qaangiummat aaqqissuisunit oqaaseq ataaseq højttalerikkut tutsiuppoq:
- Qujanaq.
