Nunat Avannarliit Siunnersuisoqatigiivisa siulittaasua Kalaallit Nunaat tikeraarnermigut tapersersorpaa
Nunat Avannarliit Siunnersoqatigiittarfiata siulittaasua kiisalu Finlandip inatsisartuini ilaasortaq, Ville Väyrynen, ulluni marlunni Nunatsinnut tikeraassaaq. Nunat Avannarliit siunnersoqatigiittarfia tusagassiuutinut taama nalunaarpoq.
Taanna Finlandip Nunat Avannarliit Siunnersoqatigiittarfianut siulittaasuuneranut atatillugu februaarip 15-aniit 17-ata tungaanut tikeraarneq.
Ville Väyrynen, Finlandip Nunat Avannarliit Siunnersoqatigiittarfiata aallartitaanut siulittaasoq, ukioq 2026-mi Siunnersoqatigiittartunut siulittaasuussaaq.
- Kalaallit Nunaat nunani avannarlerni pingaarpoq. Kalallit Nunaata tapersersornissaa oqaloqatiginerulernissaalu tikeraarnitsinni anguniarpagut. Inuiaqatigiit kalaallit taakkualu ingerlanerat ilisimasaqarfiginerulerumavagut kulturiallu immikkut ittoq pissusilersuutaallu pillugit paasisaqarnerulerusulluta, Väyrynen tusagassiuutinut nalunaarummi oqarpoq.
Ville Väyrynen ilaatigut naalakkersuisut Inatsisartullu naapissavai, aammattaaq Ilisimatusarfimmut Arktisk Kommandomullu pulaassalluni.
Suli uninngatinneqarallartoq
Nunatta Nunat Avannarliit Siunnersoqatigiittarfianni pilitikkikkut sulinini uninngattikkallarpaa, naalakkersuisut tamani siulittaasuata, Múte B. Egedep (IA), tassani politikkikkut peqataaneq taamaatikkallarmagu.
Múte B. Egedep suleqatigiinneq ingerlanerluttutut oqaatigaa nunarpullu ilaasortatut naligisatut pineqannginnerarlugu taamani 2023-mi ukiakkut isornartorsiuilluni.
Kalaallit Nunaat, Savalimmiut Ålandilu Nunat Avannarliit Siunnersoqatigiittarfiata siulittaasoqarfiani, siunnersoqatigittarfiup politikkikkut qullersaqarfiusumi, aalajangersimasumik ineqalisssasut, siorna oktobarimi Nunat Avannarliit Siunnersoqatigiittarfia aalajangerpoq.
Taamali aalajangerneq Jens-Frederik Nielsenimut (D), siorna naalakkersuisunut siulittaasunngortumut, Nunat Avannarliit Siunnersoqatigiittarfimmi suleqqilernissamut aalajangiineranik kinguneqanngilaq.
Ilaasortaanermi tamakkiisumik naligiissumillu inissinneqarnissartik Naalakkersuisut suli piumasaraat, aatsaat taavalu suliaqaqqilissallutik.
- Naalakkersuisuusimasut oqariartuutaat, Kalaallit Nunaat Nunat Avannarliit Siunnersoqatigiittarfiani tamakkiisumik ilaasortanngussasoq, naalakkersuisunit maannakkut atuuttunit suli tapersersorneqarpoq aalajangiusimaneqarlunilu, Jens-Frederik Nielsen (D) siorna KNR-imut oqarpoq.
Nunat Avannarliit Siunnersoqatigiittarfimmi siulittaasuutitaaneq ukiut ataasiakkaarlugit nunat avannarliit akornanni paarlakaajaassaavoq. Ataatsimoorussamik isumannaallisaaneq ukioq manna siunnersoqatigiit anguniagaraat.
