Nunarput Nunat Avannarliit Siunnersuisoqatigiivini aalajangersimasumik inissisimaffeqalersoq

Nunat Avannarliit Siunnersuisoqatigiivisa Kalaallit Nunaat, Savalimmiut Ålandilu Nunat Avannarliit siulittaasoqarfianni aalajangersimasumik inissisimaffeqalernissaat aalajangerpaat.

Nunat Avannarliit Siunnersuisoqatigiivisa Stockholmimi 77-issaannik ataatsimeeqqammersut tamanna tusagassiuutinut nalunaarutigaat.

Nunat namminersortut pingasut Danmark, Sverige, Finland Islandilu naligalugit siulittaasoqatigiinnut peqataasalissapput. Taamaalillutillu nunat avannarliit suleqatigiinneranni qitiusumik aalajangeeqataasalissallutik.

Nunarpulli siunnersuisoqatigiinni politikkikkut qullersaasuni maanna inissinneqaraluarluni, tamakkiisumik suli ilaasortanngunngilaq.

Taamaattumik nunatta tamakkiisumik naligiissumillu ilaasortanngornissami tungaanut, politikkikkut sulineq unitsikkallarniarpaa. Naalakkersuisut KNR-imut taama allapput.

- Naalakkersuisuusimasut oqariartuutaat, tassaasoq nunatta Nunat Avannarliit Siunnersuisoqatigiivinut tamakkiisumik ilaasortanngornissaa, maanna naalakkersuisunit suli tapersersorneqarpoq aalajangiusimaneqarlunilu, Jens-Frederik Nielsen (D) oqarpoq.

Aalajangerneq suleqatigiinnerup 'peqataatitsinerunissaanut piffissamullu naleqqunnerulernissaanut' alloriarnerusoq, Nunat Avannarliit Siunnersuisoqatigiivisa tusagassiuutinut nalunaarutaanni allaaserineqarpoq.

Aalajangiineq Helsingforsimi isumaqatigiissummik, tassa Nunat Avannarliit Siunnersuisoqatigiivisa tunngaviusumik isumaqatigiissutigeqqaagaannik allannguisoqarnissaanik kinguneqassaaq, taannalu 2026-p aallartinnerani atuutilersinneqassaaq. Tamannalu Nunat Avannarliit Siunnersuisoqatigiivinut nunatsinnit aallartitap, Justus Hansenip (D) qilanaaraa.

- Nunat Avannarliit Siunnersuisoqatigiivisa Kalaallit Nunaannik, Savalimmiuni Ålandimillu Nunat Avannarliit Siunnersuisoqatigiinni suleqatigiinnermi tamakkiisumik peqataatinneqarnissaannut akisussaaffimmik tigusinerat nuannaarutigaarput. Nunatta nunat naalakkersuisuisa Helsingforsimi isumaqatigiissummik erngertumik nutarterinissaat qilanaaraa. 

Nunarput pingaannginnerutinneqartutut misigisimasoq

Nunatta Nunat Avannarliit Siunnersuisoqatigiivini naligiissumik ilaasortatut pineqannginnini pissutigalugu politikkikkut suleqataanini ukiuni arlalinni tunuarteqqagaluarpaa.

Taamaammat nunarput Nunani Avannarlerni Siunnersuisoqatigiit Stockholmimi ulluni makkunani katersuunneranni peqataanngilaq.

Nunat Avannarliit Siunnersuisoqatigiivi Oslomi 2023-mi ukiakkut ataatsimiinneranni, naalakkersuisut siulittaasorisimasaata Múte B. Egedep nunani avannarlerni suleqatigiinneq “pissusissamisut ingerlanngitsutut” taavaa, nunattalu ilaasortatut naligisatut pineqarsimannginnera pillugu isornartorsiuilluni.

- Ikinngutigiinnerput pimoorutinngikkussiuk aamma peqataanissarput tusaaneqarnissarpullu qulakkeernianngikkussiuk, taava maani peqataanerput eqqarsaatigeqqittariaqarparput. Ilaannaanut peqataatinneqarnata TAMAKKIISUMIK peqataatinneqarusuppugut, taamanikkut naalakkersuisuusoq oqarpoq.

Sverigep aalajangernera pissutigalugu kalaallit peqataajumajunnaartut

Nunat Avannarliit Siunnersuisoqatigiivisa ukioq taanna ataatsimeersuarnissaannut, Sverige nunatut qaaqqusisuulluni Kalaallit Nunaat, Savalimmiut Ålandilu ataatsimeersuarnissamut qaaqqunngimmagit isornartorsiorneqangaalerpoq.

Tamanna pissutigalugu Múte B. Egedep Nunat Avannarliit Siunnersuisoqatigiivisa ataatsimiinnerinut peqataasarnaviannginnini nalunaarutigisimavaa.

- Aaqqissuussinernut assigiinngisitsiffiusunut peqataajuarsinnaanngilanga, taanna oqarpoq.

Sverigemi ministeriuneq Ulf Kristersson taama aalajangerpoq, Sverigelli aalajangernera Nunat Avannarliit Siunnersuisoqatigiivinit aamma isornartorsiorneqarpoq.

Siunnersuisoqatigiinni taamanikkut præsidentiusoq Bryndís Haraldsdóttir, kingusinnerusukkut oqarpoq Nunat Avannarliit Siunnersuisoqatigiivi Kalaallit Nunaannit peqataaffigineqanngitsoq takorlooruminaatsillugu — ingammik Issittumi eqqissineq isumannaallisaanerlu oqaluuserisassaatillugit.

- Nassuerutigisariaqarparput: Naak nunat avannarliit tamarmik Issittumut ilaagaluartut, Kalaallit Nunaat tamatsinniit issittorpalaarnerpaavoq, taanna oqarpoq.

Nunatta suleqatigiinnermiit akuujunnaarneraniilli namminersorlutik oqartussaaffiusut akuunerat, suleqatigiinnermi oqallissutaasarpoq.