Nukappissat qamuteralannik ajutoortut, napparsimmaviup ammarnissaanut utaqqisariaqarsimanerat pillugu illoqarfimmiut naammagittaalliortut
- Takuinnarparput qanoq pingaaruteqartigigaluartoq, ammajuaannartumik napparsimmaveqarnissaq, immaqaluunniit inoqartuaannaavinnissaa. Inuunermik kinguneqarsinnaavoq.
Bella Broberg Qeqertarsuarmeersoq taamak oqaluttuarpoq.
Taassuma ernerata inooqataatalu, qamuteralannik sapaammi februaarip aallaqqaataani ajutoortunut marlunnut ujaaseqataapput. Nukappissat tikinngimmata aappaata ajaajaa politiinut nalunaaruteqarpoq.
Illoqarfimmi napparsimmaviup ammasarfiisa sivikillineqarnissaannut siorna septembarimi aalajangiunneqarnera pillugu taanna isornartorsiuivoq.
Nukappissat maqaasineqartut nalunaarutigineqarmata illoqarfimmi innuttaasut ujaasiartorput, nalunaaquttallu akunneri arfineq-marluk arfineq-pingasut qaangiummata napparsimmaviliaanneqarput.
Tassanili akunnerup affaa siulleq ikiortissaqanngillat. Qerutiteqqallutillu silami utaqqisariaqarsimapput, Bella Broberg paasititsivoq.
- Pisuni taamaattoqartillugu isumaqarpunga napparsimmavik piareersimaqqissaartussaagaluartoq. Torraginngitsorujussuuara taamatut pisoqarnerani akunnerup affaa sinnerlugu silataani utaqqisimanerat, taanna oqarpoq.
Napparsimmavik piareersimanngitsoq
Bella Brobergip paasisai malillugit Aasiannut nalunaaqqaaqqusaasimagaluarput.
Naak akunnerpassuarni ujaasisoqareersoq, napparsimmavimmi sumilluunniit piareersaasoqarsimarpasinngilaq.
- Taava malinnaaqqissaaginnaavikkama takusinnaallugu napparsimmavik ikinneq ajortoq, kiisa aappaa sanioqquppoq immaqa ½ tiimi missaa qaangiummat, suli napparsimmavik ikinngitsoq, taanna oqarpoq.
Ajutoortup aappaata arnaa nakorsap matuanut kasuttoriartortariaqarsimavoq napparsimmavik ammariartoqqullugu ikiorneqaqqullutillu, Bella Broberg oqaluttuarpoq.
- Taavalu allatut ajornartumik anaanaasoq (nukappissat aappaanut, aaqq.) nakorsap matuanut kasuttoriartortariaqarnikuuvoq, ammaateqqullutik ikioqqullutik imatut pisoqarmat. Tassani ersippoq imaluunniit paasitinneqarsimanngitsut susoqarnersoq, taanna oqarpoq.
Inuunermik kinguneqarsinnaasoq
Bella Brobergip nassuiaanera naapertorlugu, pisuni taama ittuni napparsimmaviup matoqqanera, inuunermik kinguneqarsinnaanera pissutigalugu akuerineqarsinnaanngilluinnarpoq.
- Aamma isumaqarpunga tulluanngilluinnartoq taamak aqqunartigisoqarsimatillugu taavalu soorlu assanngui isigaat qerussortut silami utaqqitinneqarnissaat taamatut torranngilluinnartutut isigaara.
KNR-ip Peqqissutsimut inunnullu Innarluutilinnut Naalakkersuisoq Anna Wangenheim (D) oqaaseqaateqartinniarlugu saaffigaa.
Oqaaseqaateqartinnani Naalakkersuisoqarfimmiit pisoq pillugu tamakkiisumik paasissutissiisoqarnissaa utaqqimaarlugu, taanna oqarpoq.
