Mette Frederiksenip Rubiomik Kalaallit Nunaat pillugu ataatsimeeqateqarneq oqaloqatigiilluarfiuneraraa
Ministeriunerup, Mette Frederiksenip (S) aamma Naalakkersuisut siulittaasuata, Jens-Frederik Nielsenip USA-p nunanut allanut ministeriat, Marco Rubio "oqaloqatigilluarpaat".
Ministeriuneqarfik Münchenimi sillimaniarneq pillugu ataatsimeersuartoqarnerata nalaani ataatsimiinnerup kingorna paasissutissiivoq.
Mette Frederiksen aamma Marco Rubio naalagaaffinni naalakkersuisunilu siulittaasorpassuit allat peqatigalugit atlantikumi suleqatigiinnermut pitsanngorsaanermi oqaloqatigiinnermi peqataapput.
- Münchenimi sillimaniarneq pillugu ataatsimeersuartoqarnerani Amerikamiut nunanut allanut ministeriata, Marco Rubio Naalakkersuisut siulittaasuat, Jens-Frederik Nielsen peqatigalugu ataatsimeeqatiginera oqaloqatigiilluarfiuvoq.
- Suliaqarneq isumaqatigiissutigineqartutulli suleqatigiissitani nanginneqassaaq, Mette Frederiksen ministeriuneqarfiup X-ikkut allagaani oqarpoq.
Taassuma taamaalilluni suleqatigiissitaq nunanut allanut ministerip, Lars Løkke Rasmussenip (M) Marco Rubiomik aamma USA-p præsidentiata tullersortaanik J.D. Vance-imik Washingtonimi januaarimi ataatsimiinneranni isumaqatigiissutigineqartoq innersuussutigaa.
Suleqatigiissitaq USA-p Kalaallit Nunaanni Issittumilu sillimaniarnermut atatillugu ernumassutigisaanik naaperiaasussanik aaqqiissutissarsiussaaq.
Suleqatigiissitap suliaqarnerata nalaani Arctic Sentrymik pilersitsinissaq Natomi illersornissamut ministerit sapaatip akunnerani matumani isumaqatigiissutigaat.
Suliniut taanna USA-mit taperserneqarluni Ruslandip Kinallu nunat immikkoortuini tassani qanoq pakkersimaarneqarsinnaanerat pilersaarusiussaaq.
USA-p illuanilu Danmarkip Kalaallit Nunaatalu akornanni pissanganartorsiortoqarnera taamaalilluni annikinnerulertorpasippoq.
Ministeriuneqarfilli X-ikkut saqqummersitsinngilaartoq USA-p præsidentia, Donald Trump Præsidentip Illorsuata saani tusagassiortunik katersortitsinermi paasiuminaatsumik oqaaseqaqqippoq:
- Kalaallit Nunaata kissaatigilissagaatigut ilimagaara, kisianni Europami isumaqatigiilluartorujussuuvugut. Qanoq inerneqarumaarnera takujumaarparput. Kalaallit nunaat pillugu maanna isumaqatiginninniuteqaleruttorpugut, Trump oqartoq, Reuters allappoq.
Nalunaaruteqarnerli Trumpip Kalaallit Nunaannik "piginnittuunissamik" oqaaseqartarneratut oqariartorfiunngilaq.
Trumpip Kalaallit Nunaannik tiguaanissamut sakkutuulersorniarnani Davosimi World Economic Forumimi ataatsimiinnermi oqaatigaa.
Davosimiinnerminilu Natop generalsekretæria, Mark Rutte Natop Issittumi isumannaallisaanerulernissaanut atatillugu isumaqatigiissuteqarfigaa.
Arctic Sentryllu sapaatip akunnerani matumani pilersinneqarnerani tamanna alloriaatigineqangaatsiarluni.
Suliniut tamanna USA-p toqqaannartumik aamma peqataaffigissavaa. Tamanna illersornissamut ministerip, Troels Lund Poulsenip Amerikamiunik aallartitanik Bruxellesimi oqaloqateqareerluni Münchenimi tallimanngornermi oqaatigaa.
- Amerikamiut Arctic Sentrymik mattussissanersut pillugit oqallittoqarsimanera isertuussassaanngilaq.
- Taamalu pisoqannginnera pitsaasumik oqariartuutigineqarpoq. Tassami Amerikamiut suliniuteqaqaalluartussaapput, Troels Lund Poulsen tallimanngornermi oqarpoq.
/ritzau/
