Nakorsap oqarasuaataa ajornakusoortoq – Akimorsinnaanngikkaanni annilaanganarsisarpoq

Nuummi nakorsap oqarasuaataannut sianerneq pakatsinarpoq.

Utaqqineq sivisungaatsiartoq nakorsamullu attaveqarnerup amigaataanera innuttaasunut ernumanarpoq, taakkulu isummaminnik annisserusupput.

Frederikke Silassen 38-nik ukiulik, peqqinnissamut ikiortaavoq, taassuma nakorsamut sianerneq utaqqinertaqangaatsiartoq arlaleriarluni nalaassimavaa. Naak taanna ullut arlallit matuma siorna sianereersimagaluarluni nakorsamut suli utaqqivoq.

- Aqaguani sianerniaraluarput, kisianni sianinngisaannarput. Nakorsamik pisariaqartitsigaangatta sianertarpugut. Sianerniaannarluta sianerneq ajorpugut. Nakorsamik pisariaqartitsigaangatta qinnutigisarparput. Kiinneraarnerusariaqaraluarput imaluunniit ilungersunarnerusumik tigusisariaqaraluarpaatigut. Oqalunniaannarluta maalaarneq ajorpugut. Nakorsamut sianernerput pissutissaqarpoq.

Frederikke Silassen nammineq peqqinnissamut ikiortaavoq. Taassumalu nuannariinnarlugu nakorsamut sianertoqarneq ajortoq erseqqissaatigaa.

Ajornartorsiutaasoq ilisimaneqarluartoq

Nakorsap oqarasuaataannut sianertut affaat uterfigineqaqqinneq ajortut KNR-ip ataasinngormat saqqummiuppaa. Tamanna KNR-ip nunatsinni peqqinnissaqarfimmit paasissutissanik takunniffigisinnaasaanni allassimavoq.

55-inik ukiulik, Ole Lundblad kilisaammiuuvoq. Taanna silaluttarlunilu uissanngusarpoq. Taanna arlaleriarluni iluatsitsiffiunngitsumik sianertarsimavoq.

- Akisoqarneq ajorpoq. Utaqqigaluarlunga utaqqigaluarlunga akisoqarneq ajorpoq. Taava aqauguni sianeqqittarpunga. Akisoqarneq ajorpoq. Arriitsorujussuupput, taanna oqarpoq.

Ole Lundblad 55-inik ukiulik nakorsap oqarasuaataanit uterfigineqarnissaminut suli utaqqigaluarpoq.

60-inik ukiulik, Kenneth Thomsen Nuuk Outdoorimi sulisarpoq, taassuma utaqqisoqangaatsiartarnera aamma ilisimalluarpaa.

- Isornarluinnarpoq. Nakorsap kingusinnerusukkut sianerniarluni sianertannginnera arlaleriarluni pisaripoq. Taava aqaguani sianeqqikkaanni ullup ingerlanerani sianerumaartut ilisimatitsisarput. Ullullu sisamat ingerlaannartumik taama pisoqarpoq.

- Kingunera tassaagajuppoq sulitilluni utaqqisuni qassimut killinnerluni tusaasinnaaniarlugu oqarasuaatip saninniitillugu nippaqqanissaa. Taamaammat puullaaqinarpoq. Uanga iluatsitsineq ajuleqqasuni kisimiinnavianngilanga, sanasunilu sulisut eqqarsaatigigukkit nippaqqatikkaluarlugu naammassisaqarniarneq ajornakusuussaaq, taamaammat arlaanni kingunerluuteqartarsimassasoq eqqarsarpunga.

Taassuma peqqinnissaqarfimmut tatiginninneq ajunnginnerarpaa, kisianni:

- Aaqqitassaqarpoq, ilaatigut una sianernissamut piffissaq.

Kina akisussaanersoq aperigatsinni akivoq:

- Kina akisussaanersoq oqaatigissallugu ajornanngitsunnguuvoq. Annertuumik unammillernartoqartitsivugut. Aaqqissaqqaartorli qularutiginngilara. Maanna ukiut qulit maaniippunga, assigiinngitsorpassuartigullu pitsanngoriartortoqarnera takusinnaavara. Kisianni ukkatarineqartuarnissaa pingaarnerpaavoq.

60-inik ukiullip, Kenneth Thomsenip utaqqinerit sivisuut nammineq aamma nalaassimavai. Taamaakkaluartorli pitsanngoriartortoqarumaartoq qularutiginngilaa.

Aaqqissuussamut tatiginninneq annikillisimasoq

64-inik ukiulik, Jacobine Berthelsen, qaratsamigut aanaartoornikuullunilu naggussamigut gigteqarpoq, aamma astmartuullunilu sapigaqarpoq.

- Ullut sisamat utaqqivunga. Ajorluinnarpoq. Ingasappallaaqaaq. Inuunerup sinnera nakorsaateqassaanga. Inuunermut pingaaruteqartunik nakorsaatinik pissarsissaanga. Ullut sisamat sianerniarnera iluatsinngilaq. Sianerneq iluatsinngikkaangat annilaanganarsisarpoq.

Taanna peqqinnissaqarfimmut tatiginnikkunnaariartorpoq.

- Upperinngilakka. Taamaammat Danmarkimiinninni isumagerusunneruakka. Danmarkimi maanngaanniit pitsaanerusumik iliuuseqartarput.

Jacobine Berthelsenip sulisussaaleqineq isumaqartoq nammineerluni eqqaavaa. Aamma sulisut taarseraannerujussuat neriuutaarunnarnerarpaa.

- Piffissami sivikitsuinnarmi maaniittarput. Ilikkaleraanni aallaqqittarput, taamaammat tatiginninneq tassaniinngilluinnarpoq.

KNR-ip Sermersuumi nunap immikkoortuani nakorsaneq, Jesper Olesen innuttaasut nakorsap oqarasuaataanni utaqqisarnerujussuaq pillugu puullaaqissutaat pillugu qanoq iliuuseqartoqarniarnersoq apeqquteqarfigaa:

- Innuttaasut politikerillu oqaloqatigisariaqarpagut. Peqqinnissaqarfitsinniiguna suna naatsorsuutigineqarsinnaasoq. Inuit ikiorusuttorujussuuagut, kisianni taama ilungersortigaluta unammillernarpoq, tamannalu nassuerutigaarput. Kisianni sulisutta (Dronning Ingridip Napparsimamvissuani sulisut aaqq.) allanik pissarsisinnaannginnerput akisussaaffiginngilaat, taanna KNR-imut oqarpoq.