Aka Høegh eqqumiitsuliortunut aningaasaliisalernissaq pillugu: Eqqumiitsuliortut pisariaqartitsipput

Eqqumiitsuliortunut nutaarsiassatsialammik tusagassaqaratarsinnaavoq.

Eqqumiitsuliornermik suliaqartut ataqqinaammik taallugu aningaasanik tunineqartalernissaanik

ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen inatsisartut inatsisaannik allannguisoqarneratigut atuutilersitsiniarpoq.

Aningaasanik ataqqinaammik tunniunneqartartussat eqqumiitsuliortunut eqqumiitsuliornermik suliaqartuni pingaaruteqartutut inissisimasunut sisamanut tunniunneqarsinnaasut siunnersuummi allassimavoq.

Eqqumiitsuliortoq ataaseq ukiumut 250.000 kr-nik tunineqartassaaq taakkualu ukiuni tulliuttuni qulini ukiut tamaasa pisassavai.

Eqqumiitsuliortoq Aka Høegh isumaqarpoq aningaasat eqqumiitsuliortunut amerlanernut atorneqarsinnaagaluartut.

- Eqqumiitsuliortut ukiumut 250.000 kr-nik ukiut amerlasuut ikiorniarneqartut tusarlugit tupannaqaaq nuanneqaaq,  kisianni  ukiumut taama amerlatigisut pisassallugit soorlu ingasalaartut, eqqumiitsuliortunut allanut immaqa sinnassaataaginnassapput. Aka Høegh oqarpoq.

Aningaasat allaanerusumik agguataarneqartassapput

Inatsisisartuni siunnersuut oktoberip ulluisa tallimaanni siullermeerneqassaaq.

Inatsisartunilu akuersissutigineqassappat, januaarip aallaqqaataani 2023-mi atuutilissaaq.

Siunnersuut eqqumiitsuliortumit Aka Høeghimit nuannaarutigineqaraluartoq aningaasat 250.000 kr-nit eqqumiitsuliortunut sisamanut tunniunneqaratik allatut agguarneqarsinnaagaluartut taanna isumaqarpoq.

Taanna eqqumiitsuliortut sulinerannut aningaasaliissutigineqartartut amerlanerunissaat eqqumiitsuliortullu sullivigisartagaasa pitsaanerunissaat kisasaatigaa.

- Danmarkimi eqqumiitsuliortut periarfissarisartagaat eqqumiitsuliortut ukiuni pingasuni sulinissaannut aningaasaateqarfinnut qinnuteqarsinnaasariaqarsoraara, Aka Høegh oqarpoq.

Eqqumiitsuliortut utertitsiffigineqartarlik

Naalakkersuisup Peter Olsenip oqarnera naapertorlugu ataqqinaammik aningaasanik tunniussineq eqqumiitsuliortut tunniussaannut utertitsinertut isigineqarsinnaapput.

Taanna aviisimut Sermitsiaq.AG-mut ima oqarpoq.

- Eqqumiitsuliortut assigiinngitsut inuiaqatigiinnut tunniussimasaannut kingumut qiviarnertut isigineqarsinnaavoq. Isumaqarpunga kalaallit nunaani inuiaqatigiit eqqumiitsuliortunut utertitsillutik tunniussaqartariaqartut, Peter Olsen Sermitsiaq AG-mut taama oqarpoq.

Eqqumiitsuliortut sorliit aamma kikkut aningaasanik ataqqinaammik tunineqartartussat  allassimanngilaq.

Siunnersuummili allassimavoq "ataqqinaammik tunniuttakkat eqqumiitsuliornermi pilersitsiortukkat pitsaassusaasa naliliivigineri taamaallaat tunngavigalugit tunniunneqarsinnaapput” inatsisissatut siunnersuummi taama allassimavoq

Eqqumiitsuliortunut sisamanut aningaasanik tunniussisarnissaq unammillernartuusoq Aka Høegh isumaqarpoq.

Eqqumiitsuliorneq eqqumiitsuliortullu tulleriaarinermi pingaartinneqarnissasut taana isumaqarpoq.