Ilisimatusartoq: USA-p Kalaallit Nunaatalu isumaqatigiissuteqarnissaat silatusaarnerussaaq
- Issittumi pisut pillugit nunarsuarmi politikkikkut allanngortoqarneranik ersersitsisumik, USA Kalaallit Nunaannik Danmarkimillu susassaqartut pingasut akornanni isumaqatigiissusiortariaqaraluarpoq.
Taama Rasmus Sinding Søndergaard amerikamiut atuagassiaanni The American Conservativemi allappoq.
Taanna Dansk Institut for Internationale Studier-imi DIIS-imi amerikap nunanut allanut oqaluttuarisaanera pillugu ulluinnarni ilisimatusartuuvoq.
USA-p sakkutooqarnikkut najuunnissamut annertusaanissaa tunngaviusumik killeqanngilaq, taamaattumillu aatsitassarsiornissamut aningaasaliissuteqarnissamut aporfeqanngilluinnarpoq.
Aatsitassanut Naalakkersuisoq Naaja Nathanielsen (IA) ilaatigut amerikamiut aningaasaliiniarnerminnut arriippallaarnerat pillugu pakatsinini oqaatigaa.
Taamaakkaluartoq USA-p nuna tiguartariaqaraa, amerikap præsidentia Donald Trump nunarput pillugu oqaluppoq.
Taamaattumik USA isumaqatigiissuteqarfigineqartariaqaraluartoq Rasmus Søndergaard isumaqarpoq – naak tamanna kingunipiloqarsinnaagaluartoq.
Takussutissalimmik isumaqatigiissuteqarneq
Naalakkersuisut amerikamiut soqutigisaannut qanoq akerliliisinnaaneri pillugit Rasmus Søndergaard DIIS-imut oqallissaarummik marsimi saqqummiivoq.
Tassani USA-mi eqimattat pingasut nunatta politikkianut pingaaruteqartuusut ersersippai: Sillimaniarnermik suliaqartut, aningaasaatilissuit aamma MAGA-mik suliaqarfiit.
USA-p sillimaniarnermik suliaqartuisa Kinamiut Ruslandillu sunniiniarnerat ernummatigigaat, aningaasaatilissuillu aatsitassat soqutigigaat, MAGA-kkormiut (Make America Great Again, aaqq.) USA-p killeqarfiisa allineqarnissaat, tassa nunatta USA-mut atalernissaa, soqutigaat.
Danmarkip nunattalu eqimattat siulliit marluk saaffigisariaqaraat ilisimatusartoq isumaqarpoq, aatsitassallu pillugit isumaqatigiissuteqarnissamik illersornissamullu isumaqatigiissummik 1951-imeersumik nutarterinissamik siunnersuuteqarpoq.
USA-mik isumaqatigiissuteqarnerup takussutissalimmik iliuusaanerpaanissaa Donald Trumpimullu iluaqutaanerpaanissaa Rasmus Søndergaard isumaqarpoq - tassami nuna taanna soqutigisaminik siuarsaaniarluni periarfissarpassuaqareermat.
- Isumaqatigiissummik piviusunik takussutissalinnillu pissarsisitsisussamik sulisorisai qularunnaarsissinnaagutsigit, Kalaallit Nunaat pillugu suliaq matusinnaalissavarput, tamannalu Donald Trumpip periaasiatut periaaseqarnerussaaq.
Amerikamiulli taamatut oqaloqateqarusunnersut paasinarsiumaarpoq.
- Trumpip aqutsisuisa taamatut oqaloqateqarusunnissaat aamma apeqquserpara, Rasmus Søndergaard naggasiivoq.
Inerneqanngitsumik oqaloqatigiinnerit
Nunatsinni Danmarkimilu siuttut illersornissaq, aatsitassat allallu USA-p soqutigisarisinnaasai pillugit USA-mik oqaloqateqarusullutik arlaleriarlutik oqartarput.
Tamannali angusanik malitseqanngilaq.
Taamaakkaluartoq oqaloqatigiinninniarnermik misiliinerup ingerlateqqinnissaa imminut akilersinnaasoq, Rasmus Søndergaard isumaqarpoq. Taamaattoqanngippat USA-p uagutsinnut sakkugisinnaavaa.
- Matulluinnaraanni oqaloqatigiinnikkumanngilluinnaraannilu, Trumpip Kalaallit Nunaata Danmarkillu suleqatikkuminaattuunerinik oqalunnera uppernarsarneqarsinnaavoq.
Nunalli taakku pingasut isumaqatigiinniarnernik aallartitsissappata, tamanna navianartorsiorfiunngitsoornavianngilaq. USA-mmi qanoq piumasaqaateqarsinnaanera siumut oqaatigineqarsinnaanngilaq.
- Trumpimut isumaqatigiissutinik annikitsunik isaassiviginnereernerup kingorna annertunerujussuarmik piumasaqarnissaanut tatisinissaa ernumanartoqartippara, Rasmus Søndergaard oqarpoq.
Taamaakkaluartoq USA-mut nipangersimaneq aaqqiissutissatut ajornerpaajussasoq, ilisimatusartoq isumaqarpoq.
- Aaqqiissutissarsiumatuutut, iliuuseqarusussuseqartutut saaffigiuminartuusutullu isikkoqannginnissaq ernummatigineruara, Trumpimi itigartinneqaraangami soqutigineqanngikkaangamiluunniit ajorluinnartumik qisuariartartoq isumaqarpunga.
