Malcolm Nance amerikamiut sakkutuuisa umiarsuaanni NSA-milu (National Security Agency)  internettimik oqarasuaatinut attaveqaatinik nakkutiginninneq aqqutigalugu paasiniaasartuni naalagaasimavoq.

Taassuma paasiniaasartuni – oqallisaasuni kilitsissiatut suliaqartuni naalakkatut sulinermini – peqqarniisaarnianik pinaveersaartitsinermik suliaqarsimavoq. Taanna tusagassiorfimmi MSNBC-mi paasiniaasartutut ullumikkut atorfeqarlunilu paasiniaasartut katersisarneri pillugit aamma Donald Trumpip præsidentiunerata ulorianarnera pillugu atuakkiani arlalinni atuakkiortuuvoq.

Taassuma nunarput sapaatip akunnerani 20-mi tikeraarpaa. Taassumami nammineq oqarneratut:

- Kilitsissiaavunga, TV-kkut oqaaseqartartoq. Perulluliortoqarnissaanik paasisaqarnissamut sungiusarsimavunga. Præsidentillu Illorsuanit nalunaarutigineqartut perulluliortoqarnissaanut takussutissaqartut ilungersunartumik tigusariaqarpasi.

USA-p kalaallit innuttaasut pillugit paasissutissanik katersinini, kiisalu anguniakkaminik angusaqarnissamut kikkut atorsinnaanerlugit paasiniaanini annertusissagaa, USA-mi isertortumik paasiniaasartuni pisortap, Tulsi Gabbardip peqqussutigisimagaa, Tusagassiorfiup, Wall Street Journalip maajip aallartinnerani saqqummiuppaa.

Malcolm Nancep KNR-imit sivisuumik apersorneqarnermini politikerit kilitsissiaqarsinnaaneranut tusatsiakkanik qanoq ilungersuussisariaqartiginersut tiguaaniartoqarnissaanullu piareersassasut oqaatigaa.

Kilitsissiatut suliaqarneq piffissamik asuleerinerusoq

Wall Street Journalimit ilanngutassiaq tusarfinnit kinaassutsiminnik isertuussisunik tunngaveqarpoq, tamannalu USA-p Kalaallit Nunaanni maanna kilitsissiatut suliaqalernersoq nunarsuarmi tamarmi tusagassiorfiit isumaliutersuutigilerpaat.

Malcolm Nancelu qularutiginninngilaq: Saqqummiunneqartoq ilumoorpoq.

Assi © : KNR / Markus Valentin

Taassuma tamanna USA-mi politikkikkut suliaqartut Kalaallit Nunaannik tigusiniarnermik ukkatarinninnerannut ersarissumik takussutissatut isigaa – taassumali CIA, NSA DIA-luunniit kilitsissiatut suliaqarnissai ilimaginngilai.

- Kilitsissiatut suliaqartoqarnissaanut oqaluttuaq isumaqanngilaq. Iligisamik nakkutiginninniaraannik immikkut eqqarsaatigisassaqarpoq, isertortumik paasiniaasartuni sulisut 100.000-it piffissaq aningaasallu Kalaallit Nunaannut atornavianngilaat. Tamanna nunaminni inuit pineqartut pillugit isumannaallisaanissamut salliunneqartuunngilaq.

Malcolm Nancep kalaallit isumasaat internettikkut siammarsimallutik pissarsiassaammata aamma amerikamiut sinniisoqarfiata naalakkersuisut assigiinngitsut ataatsimeeqatiginissaat aaqqissuussinnaammagu nunap 57.000-inik innuttaasoqartup kilitsissiatut suliaqarfigineqarnissaa pisariaqanngilaq.

Pingaartumillu kilitsissiat aalajangersimasumik suliaqartut eqqarsaatigineqanngillat.

- Amerikamiumik ataasinnguamilluunniit danskisut kalaallisulluunniit oqalussinnaasoqarunanngilaq. Taamaammat sianiinaarniarutsigut nammineq oqaatsisi atorlugit oqaluinnaassaasi.

- Tamatuma saniatigut nakkutilliissutigut akikitsuunngillat, taakkulu Ruslandimit, Kinamit Iranimit Yemenilu Houthinut sammisunut ulluinnarni atorneqarput. Taamaammat Kalaallit Nunaanni kilitsissiatut suliaqarnissamut atortut taakku qamillugit atorniarukkit nunamut ulorianartunik ataqqinninngitsuussaatit imaluunniit sianiitsuusimassaatit.

Tiguaaniartoqarnissaanut pilersaarummik piareersaagitsi

Taassumali naak taama pisoqarnissaa ilimanarpallaanngikkaluartoq - nunatsinni politikerit innuttaasullu tiguaaniartoqaleratarnissaanut piareersartariaqartut ilungersunarluinnartumik erseqqissaatigaa.

- Aalisariarnermut assersuutigisinnaavat. Nuummiit Maniitsumut angalassaguit silap qanoq innera, umiarsuarlu ajunnginnersoq eqqarsaatigissavatit aamma annanniummik nassataqassaatit. Naalakkersuisut ilungersunarluinnartumik tigusisariaqarneranut periarfissaq 5 procentiuvoq. Taamaammat pilersaaruteqartoqartariaqarpoq.

Misissueqqissaartartullu naalagarisimasaata amerikamiut sakkutuui 200-init 300-inut amerlassuseqartut nunatsinnik tiguaaniarlutik akunnerit arfineq-pingasuinnaat atussagaat nalilerpaa.

Takorloorneqarsinnaanngitsorlu pissagaluarpat innuttaasut assersuutigalugu akerliullutik aqqusinermukaanissaat, Malcolm Nancep kaammattuutigaa.

- Donald Trumpip Kalaallit Nunaat perusullugu aalajangerpaa. Kisianni Nuummi nunallu sinnerani innuttaasut akerliullutik tamat itigartitsinerannik takutitsinissaat kissaatiginngilaa.