Aatsitassat kimilluunniit piiaarsinnaaqqullugit EU aningaasaleerujussuarpoq
Aatsitassat pillugit siunnerfeqaqatigiilluni suleqatigiinnissamik isumaqatigiissut ullumi atsioqatigiissutigineqassaaq.
EU-p Nunattalu isumaqatigiissutissaat illuatungeriinnut iluaqutaassaasoq, Antonio Tajanip Berlingskemut oqaatigaa, ilisimatitsissutigalugulu EU-Kommissioni 2014-imit 2020-mut 1,6 milliardit koruuninik aningaasaliinissaminut piareersimasoq, taakku Nunatsinni aatsitassasiornerup ineriartortinnissaanut tapiissutaassapput, tamatumunngalu taarsiullugu aatsitassat pingaarutillit Nunatsinniittut nuarsuarmiunit tamanit unammilleqatigiinnikkut piiarneqarsinnaassallutik.
Nunatsinnili attaveqaatitigut aaqqissuussinernut, soorlu mittarfinnut, aqqusinernut umiarsualivinnullu toqqaannartumik aningaasaliisoqassanngitsoq Antonio Tajani oqarpoq, taamaattorli Nunatta Den Europæiske Investeringsbankimit atorniarsinnaanera immaqa periarfissaasinnaanerarlugu.
Nunatta EU-llu siunnerfeqatigiinnissamik isumaqatigiissummik atsioqatigiinnerisigut, suliffeqarfiit Europamiittut aatsitassarsiornermik ingerlataqartut, Nunatsinni periarfissanik soqutiginninnerulissasut, taassuma neriuutigaa.
- Aatsitassarsiortitseqatigiiffiit Kalaallit Nunaanni misissueqqissaartut 58 procentii Canadamiuunngikkunik Australiamiuupput. Taamaallaat 15 procentit nunanit EU-mut ilaasortaneersuupput. Siunnerfeqaqatigiinnissamik isumaqatigiissuteqarnikkut tamanna allannguuteqangaatsiarsinnaassaaq, Antonio Tajani oqarpoq.
