Ozempic-inut peqqinnissaqarfiup aningaasartuutai ukiut pingasut ingerlaneranni sisamariaammik amerleriartut

Peqqinnissaqarfiup aningaasaqarnera ilungersunartorsiorpoq. Tamanna erseqqissaatigineqartuarpoq, maannalu aamma Peqqinnissaq pillugu siunnersuisoqatigiit ukiumoortumik nalunaarusiaanni siullermi qaammatip matuma aallartinnerani saqqummersumi erseqqissarneqaqqippoq.

Peqqinnissaq pillugu siunnersuisoqatigiit partiit Inuit Ataqatigiit, Siumut, Naleraq aamma Atassut kissaateqarnerisa kingorna siorna ukiakkut pilersinneqarput.

Siunnersuisoqatigiit ukiuni aggersuni peqqinnissaqarfimmi ineriartornerup malinnaaviginissaa akisussaaffigaat.

Siunnersuisoqatigiit peqqinnissaqarfiup qanoq innera pillugu ukiumoortumik nalunaarusiaanni nakorsaatinut aningaasartuutit - aningaasartuutinit tamanit 5 procentiusut - peqqinnissaqarfimmi aningaasaqarnermut missingersuusiornermullu tunngatillugu unammillernarnerpaat ilaattut eqqaaneqarput.

Nakorsaatinummi missingersuutit „malunnartumik qaangerneqarsimasut“, nalunaarusiami allassimavoq.

- Peqqinnissaqarfimmi missingersuutit qaangerneqarsimanerannut pissutaanerpaasut marluk tassaapput piffissami sivikitsumi sulisartunut nakorsaatinullu missingersuutit, Peqqinnissaq pillugu siunnersuisoqatigiinni siulittaasoq Kjeld Møller Pedersen oqarpoq.

Nakorsaatinut missingersuutit qaangerneqarnerat nakorsaatinut Ozempic-inut aningaasartuuterujussuaqalernermik pissuteqarpoq.

Ozempic sukkornermik type 2-mik nappaateqartunut atorneqartarpoq. Nakorsaatilli saqqummersinneqarnerata kingorna aamma sanigorsarnermut iluaqutitaqartoq paasineqarpoq.

2021-miilli nunatsinni Ozempic-inut aningaasartuutit 2,7 millionit koruuniniit 11,6 millionit koruuninut amerleriarsimapput. Taakkununnga aningaasartuutit 2023-miit 2024-mut marloriaatingajammik amerleriarput.

Napparsimasut Ozempic-inik siullertut neqeroorfigineqartut

Ozempic-inut aningaasartuutit qaffariarujussuarnerannut Ozympic-it akitsorujussuarsimanerannik ilaatigut pissuteqarpoq. Peqqinnissaq pillugu Siunnersuisoqatigiit nalunaarusiaminni taama erseqqissaapput.

Tamannaannaanngilarli.

Peqqinnissaq pillugu siunnersuisoqatigiit siulittaasuat, Kjeld Møller Pedersen, nalunaarusiamik allattut ilaat, piffissap ilaani nunatsinni Ozempic "nakorsaatitut siullertut“ atorneqartarsimasoq nassuiaavoq.

- Inuk sukkornermik nappaatilik katsorsarniarlugu Ozempic atorneqartarsimavoq. Tamannali akisoorujussuuvoq, taanna oqarpoq. 

Kjeld Møller Pedersen naapertorlugu nunatsinni peqqinnissaqarfiup Ozempic nakorsaatitut siullertut sukkortunut 2024-p missaani neqeroorutigiunnaarpaa.

- Aatsaat nakorsaatit allat akikinnerusullu atorneqarsinnaanersut misissorneqareeraangata periarfissaanatillu Ozempic atorneqalertarpoq.

Tamanna sukkornermut sanigorsarnermilu nakorsaatinut aningaasartuutit appariartornerannik kinguneqarumaartoq, Kjeld Møller Pedersen isumaqarpoq.

- Taamaaliortoqaleruni aningaasartuutit 2024-mi aningaasartuutaasunut naleqqiullugit appassapput, taanna oqarpoq. 

Nalunaarusiami aamma allassimavoq nunatsinni pualavallaanut nakorsaat Wegovy "napparsimasunut piumasaqaatinik aalajangersimasunik naammassinnittunut“ nakorsaatitut akeqanngitsumik tunniunneqartartoq, Danmarkimili Wegovy nakorsaatiginiaraanni nammineq akilerneqartartoq.

Nunatsinni Wegovymut aningaasartuutit 2023-mi 2024-milu tassaapput 586.000 koruunit aamma 968.000 koruunit.

- Wegovymilli nakorsaaserneqartartut amerlasinnaanngillat, Kjeld Møller Pedersen naliliivoq.