Pele Broberg: 2021-mi naalagaaffinngornissaq piviusorsiornerunngilaq
Naak naalagaaffinngornissaq Partii Naleqqap pingaartorsuartut anguniagarigaluarlugu akisunaarnianngilaa. Aningaasaqarnikkut illersorneqarsinnaasariaqassaaq, aatsaallu Danmarkimit tapiissutinik taarsiisinnaasumik nunap karsia sinneqartooruteqalerpat taama pisoqarsinnavoq.
- Danmarkimit tapiissutit anigornissaannut maani nunatsinni isertitaqarnerulernissarput pisariaqarpoq, Pele Broberg oqarpoq.
AAMMA ATUARUK Naalagaaffimmit tapiissutit unitsissappata iliuuserineqartut oqaatsinit amerlanerusariaqarput
Taamaattumik partiia Folketingimut aamma qinigassanngortippoq
aningaasarsiorluarneruleriartornissamik oqariartuuteqarluni. Inatsisartunut qinersinermi naalagaaffinngornissaq oqallisigisani pingaarutilinni qaffasissumik inissisimavoq, sulilu taamaattoq, Pele Broberg erseqqissaavoq. Taamaattorli aamma erseqqissarpaa 2021 piviusorsiortuunngitsoq, kisianni naalagaaffinngorneq partiip tunngaviisa ilagaat takorluugaallunilu anguniagaasoq.
Sapaatip akunnerani matumani isumasioqatigiinnermi Future Greenlandimi aningaasaqarnikkut siunnersuisoqatigiinni siulittaasoq aamma aningaasaqarneq pillugu lektori aningaasaqarnikkut namminersulivinnerup kingunissai pillugit oqalugiarput. Nunap karsiata ullumikkut isertitaasa affaat annaaneqassapput, tassaallutik aningaasanngorlugit koruunit 5 milliardit. Tamakku taarserneqarsinnaapput pisortat aningaasartuutaasa affaannanngortinnerisigut, akileraarutit akitsuutillu marloriaatinngortinneqarnerisigut imaluunniit aningaasarsiornerulernikkut, akileraarutinut tunngavigisassat marloriaatinngortinnerisigut.
AAMMA ATUARUK Mittarfiliortiternermi danskit peqataatinneqassappata akuerisinnaanngilluinnarparput
Kisianni taaneqartut siulliit marluk Pele Brobergimut periarfissaanngillat.
- Partiit arlaannaataluunniit Danmarkimit tapiissutit peerneqarnissaat tapersersornaviarunanngilaat, tamanna innuttaasunut pitsaanerpaanngippat. Aningaasaqarnikkut periarfissaqarnerput Danmarkimit tapiissutit peerneqarsinnaanerannut tunngaviussaaq. Uagut erseqqissumik isumaqarpugut innuttaasut inuunerminni ajornerusumik atugaqartinneqalissanngitsut. Ulluinnarni pissaqarnissamut periarfissiaqarnissaat isumagisussaavarput, Pele Broberg oqarpoq.
Tamanna aningaasaqarnikkut ineriartortitsinikkut anguneqarsinnaavoq, suliffeqarfiit akileraarutinik akitsuutinillu akiliisinnaasut amerlinerisigut, taamalu innutaasut amerlanerusunik inuiaqatigiinni atorsinnaasaminnik aningaasarsiorsinnaalernerisigut, politikeri isumaqarpoq.
- Isertitaqarneruleriartorneq imaanngilaq kisitsisit Naalakkersuisunit allanngortinneqarnerisigut pilersinneqartoq. Tassaavorli inuit amerlanerusunik aningaasaqalernerat, Pele Broberg oqarpoq.
AAMMA ATUARUK Namminersulivinnissaq Partii Naleqqap anguniagarissavaa
