Trump: Kalaallit Nunaanni sakkutuuliisoqassanngilaq
USA-p præsidentiata Donald Trumpip nunatsinnut sakkutuuminik Amerikamiunik atuinissamik eqqarsarsimanngisaannarluni oqaatigaa.
Taama USA-mi illoqarfimmi Bullhead Citymi, Arizona aamma Nevada naalagaaffiit killeqarfianniittumi, qinersisartunut ataatsimiititsinermi sisamanngornerup unnuaani oqarpoq.
Taama oqarnera ilaatigut PBS Newsip toqqaannartumik aallakaatissimasaani ilaatigut takuneqarsinnaavoq.
– Tusagassiorfiit “fake news”-imik taamani taaneqartartut, tassa nutaarsiassanik eqqunngitsumik saqqummiisartut, sakkortuumik isornartorsiorpaannga. Oqarput: “Kalaallit Nunaat pillugu taama oqalunneq ajorluinnartoq, tamanna ajorluinnarpoq!”
– Eqqaamavisiuk isumaqarmata Kalaallit Nunaannut sakkutuujutikka aallartissagikka allaaserinnimmata ? Taamaaliussanngilanga, Trump oqarpoq.
Trumpip oqalugiaataa nalunaaquttap akunnera aappaa avillugu sivisuneruvoq.
Oqalugiarnermini arlalinnik sammisaqarpoq, Venezuelami pisut, Iranimi sorsunneq, Partii Demokratinut isornartorsiutit kiisalu Republikanerit qiterpaartumik qinersinermi ajugaassappata USA-mi inersimasut tamarmik 5.000 dollarinik tunineqarnissaat ilaatigut neriorsuutigaa.
Kalaallit Nunaat aamma eqqartorpaa.
– Danmarkimit pigineqarpoq, nunamit pitsaasumit, nunamit kusanartumillu isikkulimmit. Kisianni ungasissorujussuuvoq, uagullu sanileriippugut. Nunarujussuuvoq, Texasimit anginerujussuaq.
– Nerisassatsitut sassaalliutigineqariaannaavoq, Trump oqarpoq.
Tassani USA-p præsidentiata Venezuela aamma eqqaavaa.
– Nerisassanut tamatigut ilanngussisoqartarpoq. Venezuelami qanoq pisoqarpa? Tassanissaaq ingerlalluartugut isumaqarpunga, Trump oqarpoq.
Taassuma nunatsinni uuliamik, gassimik aatsitassanillu ujaasinissaarsuarmik pilersaarutaata aallartinnissaanut piareersartoqartoq oqaatigaa.
Amerikamiut sakkutuui Venezuelami præsidentip illorsuanut ukioq manna aallartinnerani iserput, præsidentiusimasorlu Nicolás Maduro tigusaralugu. Tamatuma kingorna USA-p præsidentiata Venezuelami naalakkersuisut atuuttut peqatigalugit uuliamik isumaqatigiissuteqarfigai.
Danmark, Kalaallit Nunaat aamma USA nunarput USA-llu attaveqarnerannut tunngasumik nutaamik septembarip naanerani isumaqatigiissuteqarput.
Isumaqatigiissut illersornissamut isumaqatigiissummik 1951-imeersumit, illuatungeriit pingasut akornanni isumaqatigiissutaannik, allanngortitsineruvoq ilassuteqarlunilu.
Isumaqatigiissutip Kalaallit Nunaat Danmarkip naalagaaffiata ataani namminersortuunera, kiisalu kalaallit pisinnaatitaaffimmikkut namminneq aalajangiisinnaatitaanerat aamma naqissuserpaa.
Trumpip inuit attaveqatigiittarfiutimini Truth Socialimi Kalaallit Nunaanni uuliamik, gassimik aatsitassanillu misissuisoqarnissamik piareersarnersuaqartoq pingasunngornermi ullaakkut oqaatigaa.
Kalaallit Nunaanniilli uuliaqartorujussuuneranik misissuinissaarsuaq qanillinera ilumuunngitsoq uppernarsarneqarpoq.
USA Kalaallit Nunaanni uuliamik allanillu pisuussutilinnik misissuissappat, tamanna Kalaallit Nunaanni inatsisit naapertorlugit pissasoq, Danmarkip nunanut allanut ministereqarfiata aamma erseqqissarpaa.
Ritzau
