Perorsaasutut ilinniarneq soqutigineqaleraluttuinnarpoq, perorsaasunngortartulli amerliartunngillat
Perorsaasutut ilinniarneq ukiuni kingullerni soqutigineqarneruleriartuinnaraluarpoq, kisianni perorsaasutut ilinniakkamik aallartittartut naammassinnittartullu amerliartunngillat. Ilinniartunut inissaatikinneq peqqutaasoq, Perorsaanermik Ilinniarfimmi pisortaq oqarpoq.
Allattoq Jonna Enoksen Dahl
oktobarip 16-at 2026 07:30
Nuummi perorsaasut ulluinnarni sulinerminni sulisunik amigaateqarmata, ataasinngormat akerliussutsimik takutitsipput.
Perorsaanermik Ilinniarfiulli kisitsisaatai naapertorlugit, perorsaasutut ilinnialerusullutik qinnuteqartut ukiuni kingullerni arfineq pingasuni amerligaluttuinnarput.
Perorsaanermik Ilinniarfimmi pisortap Ulunnguaq Markussenip tamanna uppernarsarpaa.
-Perorsaasutut ilinnialernissap ukiuni kingullerni soqutigineqaleraluttuinnarnera Perorsaanermik Ilinniarfimminngaannit maluginiarparput. Assersuutigalugu 2019-iminngaanniit 2026-mut kisitsisit sanillersuukkutsigit 60 procentimik taakku nikingassuteqarput.
2019-mi qinnuteqartut 58-iupput, 2026-mi qinnuteqartut 93-iullutik.
| Aallartiffik/Naammassiffik | Qinnuteqartut | Ilinnialertut | Naammassisut | Massakkut ilinniartut |
| 2018/2021 | 25 | 13 | ||
| 2019/2022 | 58 | 22 | 15 | |
| 2020/2023 | 51 | 25 | 11 | |
| 2021/2024 | 74 | 21 | 11 | |
| 2022/2025 | 51 | 25 | 7 | |
| 2023/2026 | 84 | 37 | dec 2026 | 19 |
| 2024/2027 | 113 | 35 | dec 2027 | 31 |
| 2025/2028 | 76 | 50 | dec 2028 | 30 |
| 2026/2029 | 93 | 20 | dec 2029 | 17 |
Ilinnialerlutik aallartittartut naammassisartullu amerliartunngitsut
Ilinnialerusullutik qinnuteqartartut amerliartoraluartut ilinniakkaminnik aallartittartut amerliartunngillat.
Persorsaanermik Ilinniarfiup kisitsisaatai naapertorlugit, 2019-mi 22-t ilinniakkaminnik aallartitsipput. 2026-mi 20-t ilinnialerput.
Perorsaanermik ilinniarfimmi ilinniagassatut neqeroorutit arfineq pingasuupput, taakkununngalu qinnuteqartut 30 procentiinnaat ilinnialertartut pisortaq oqarpoq.
Tamannalu peqquteqarpoq.
-Ilinniartut najugarisaat, uku kolligiet, killeqarneri tassani peqqutaapput, Ulunnguaq Markussen oqarpoq.
Perorsaanermik Ilinniarfimmi pisortaq Ulunnguaq Markussen
Ilinniakkaminnik aallartittartut amerliartunnginnerisa saniatigut ilinniakkaminnik naammassisartut ikiligaluttuinnarput.
Ilinniakkaminnik naammassisut 2019-mi 15-iupput, 2025-mi arfineq marluullutik.
Tamannalu marlunnik peqquteqartoq pisortap oqaatigaa.
-Ilinnialertussamut inuttut aamma akisoorujussuusinnaasarpoq. Avatangiisit, Ilaquttat, kammalaatit sungiusimasarlu qimallugit atuariartorneq arlalitsigut ingerlasarpoq, Ulunnguaq Markussen oqarpoq nangillunilu:
-Taavalu atualeraanni pissutsit nutaat ilinniagassallu inummut aamma sakkortusinnaasarlutik, uagut ilinniartuutigut eqqarsaatigissagaanni.
Suliniuteqarniartoq
Nunagisaq qimallugu allamut nuulluni ilinnialerneq ilungersornarsinnaavoq, tamannalu aaqqiiviginiarlugu Perorsaanermik Ilinniarfik ujartuivoq.
Perorsaasutut ilinniarneq orniginarsarniarlugu nunagisaq qimannagu ilinniarsinnaalernissaq Ulunnguaq Markussenip sulissutiginiarpaa.
-Najugarisaq qimannagu kommunit suliffeqarfiillu suleqatigalugit suliffik paariinnarlugu ilinniakkamik ingerlatsisinnaanerit maannangaaq suliniutigalugit ingerlappagut. Nalunnginnatsigu perorsaanilerinerup iluani ilinniarsimasut nunatsinni amigaatigineqartorujussuusut.
