Trumpip uulia pillugu nalunaarutaa Ittoqqortoormiini kamaatigineqartoq
- Hello, Greenland!
USA-p præsidentiata, Donald Trumpip assi inoqatinut attaveqaatikkut, Truth Socialikkut pingasunngornerup unnuaanut siammartigaa taama allassimasortaqarpoq. Assimi præsidentip nunatsinni illoqarfiorpasissoq assigaa.
Nunatsinni uuliamik, gassimik aatsitassanillu misissuingaatsiartoqarnissaa aallartinneqangajalersoq saqqummersitsinerminit akunnialuit qaangiuttut nalunaarutigaa.
- Uuliasiorneq, gassimik ujarlerneq aatsitassanillu qalluisinnaanissamut periarfissat annertuut Kalaallit Nunaanni pigisatsinni kusanaqisumi ujartorneqalerput, præsidenti allappoq, Kalaallit Nunaannilu uulia nunani allani tamangajannit qalloruminarnerusoq oqaatigalugu.
Tunumi uuliasiornissamut pilersaaruteqarfiusumut qanittumi Ittoqqortoormiini nalunaaruteqarneq ernumassutigaat.
Amerikamiut anguniagaat illoqarfiup innuttaasuinut aamma pinngortitamut inuuniutigisami pisariaqartitaanut mianernartumut kingunerluuteqarsinnaanera innuttaasunit ernumassutigineqarpoq.
- Tassami nunatsinni sumiiffiit allat tamarmik assigalugit Donald Trump nunatsinnut tunngasunik oqaaseqaraangat tamanna annilaangassutigineqartarpoq, Ittoqqortoormiini piniarnermut nakkutilliisoq borgmesteriusimasorlu, Erling Madsen oqarpoq.
Erling Madsenip oqarnera naapertorlugu Ittoqqortoormiit naalakkersuisunit tunineqarsimasoq ilaannit misigisimaneqarpoq.
Pinngortitaq piniartullu inuuniutaat pillugit annilaangasut
Uuliasiornissaq kingornalu Nunap Qeqqani qalluisoqarsinnaanera pingaartumik akerleringaatsiarneqarpoq.
Sumiiffik piniartut sunngiffimmilu aallaaniat ilaatigut umimmanniarfigisartagaannut ilaavoq. Sumiiffik avatangiisinut atatillugu mianernartuullunilu timmissat uumaffigisaannut pingaaruteqarluinnarpoq, Erling Madsen oqarpoq.
Taassuma uuliamik misissuineq umiarsuarujussuarnik angallattoqarfiusariaqassappat sumiiffimmilu suliaqangaatsiartoqarnissaata tamatuma kingunerisassai pingaartumik ernumassutigai.
Uuliamik qalluisoqarsinnaanera oqaluuserineqalermat ernumassuteqarneq juunimili ersarissereerpoq. Innuttaasunut taamani ataatsimiititsisoqarpoq aamma Ittoqqortoormiini nunatsinnilu illoqarfinni arlalinni akerliussutsimik takutitsisoqarluni.
Erling Madsenip oqarnera naapertorlugu akerlilersuineq annikinnerulinngilaq.
- Naalakkersuisut uuliasiortoqarnissaanut akuersissagunik kingornalu qalluisoqalersinnaanera avatangiisinut tunngasut misissorluarneqareerluni tamanna Ittoqqortoormiinut innarliissanngippat taava tassani qanoq pisoqarnissaa takussavarput, taanna oqarpoq.
'Amerikamiut illersuutissaattut atorneqarusunngilagut'
Ittoqqortoormiini najukkami ataatsimiititaliap siulittaasuata, Hans Brønlundip Trumpip nalunaarutaa kingulleq kamalluni aamma qisuariarfigaa.
- Ullaaq iterama takuara. Eqqarsarpunga: Qanoq taama sianiitsigisoqarsinnaava? Illersornissamut isumaqatigiissut atsioqqammerluinnarpaa, taanna oqarpoq.
Brønlundip nunatta, Danmarkip USA-llu illersornissamut isumaqatigiissutaat nutaaq najukkami innuttaasunut ataqqinninnerunermik kinguneqarnissaa neriuutigaa.
Trumpilli nalunaaruteqarnera pissutigalugu taamaattoqarnissaa qularutigaa.
- Tassalu tamannarpiaq. Inatsit taakani qanoq isumaqarfigigaa nalunngilarput, taanna oqarpoq, ernumasutullu illariarluni.
Brønlundip Amerikamiut sakkutuuisa Tunumi nunami eqqissimatitami, Mestersvigimi najuunnerulernissamut pilersaarutaat pingaartumik ernumassutigai.
Taassuma Ittoqqortoormiit eqqaanni mittarfissaq pilersaarutaasoq, innuttaasunit aamma atorneqarsinnaasussaq nunap immikkoortuani illersornissamut pisariaqartitsinermut naammassasoraa.
- Amerikamiut Ittoqqortoormiit eqqaanniitsikkusunngilagut. Taakku nunaannut illersuutaarusunngilagut, taanna oqarpoq, Trumpillu allattoqarfiata missilimut illersuusiornissamut pilersaarutaa innersuussutigalugu.
Taassuma sakkutooqarnikkut suliaqartoqarnerulernera qilalukkanut qernertanut nannunullu akornusersuissaaq, taamaalillunilu piniartut piniarnermik inuussuteqarnissaannut periarfissaannut sunniuteqassalluni. Qilalukkat qernertat illoqarfiup eqqaani kangerlunni ingerlaartarput, Mestersvigilu nunami eqqissisimatitamiilluni.
Brønlundip sakkutooqarnikkut najuuttoqarnerulernissaanut ernumassuteqarneq aatsitassanik piiaasoqarnerulernissaanut ernumassuteqarnermut qanimut atassuteqarpoq.
- Sakkutooqarfimmik Mestersvigimi pilersitsilluni (Donald Trump aaqq.) aallartitsissaguni aatsitassanik uuliamillu piiaanissamik immaqa aamma eqqarsalissaaq, Hans Brønlund oqarpoq.
Uuliasioqatigiit Trumpimut atassutillit nunatsinni qilleriniartut
Trump Amerikamiut piginneqatigiiffiata Greenland Energyp Nunap Qeqqani uuliasiornissamut periarfissarsiornerat ilutigalugu avammut taama oqariartuuteqarpoq.
Greenland Energy suleqatigisani 80 Mile aqqutigalugu sumiiffimmi misissuilluni qillerinissaminut pingasunik akuersissuteqarpoq.
Piginneqatigiiffiulli qillerisinnaanissaminnut akuersissutit suli pisariaqartippaat aappaagulu qillerillutik aallartinnissartik neriuutigaat.
Piginneqatigiiffiup aqutsisuisa sumiiffiup neriunaateqarnera Nunap Qeqqatalu ilua nappartanik 13 milliardinik uuliaqarsinnaanera qangali erseqqissaatigaat. Tamannali qulakkeerneqanngilaq, immikkulli ilisimasallit uuliasiornissap imminut akilersinnaanissaa ajornakusoorsinnaanerarpaat.
Erling Madsenip illariaatigaluni oqarneratut:
- Uuliasiortoqassappat, gassisiortoqassappat aatsitassarsiortoqassappat assigisaanilluunnit, taanna (Donald Trump, aaqq.) taamanikkussamut toqoreersimassajunnarsissaaq.
Kalaallit Nunaat uuliasiornissamut akuersissutinik tunioraanissamut 2021-mili inerteqquteqarpoq. Greenland Energyli suleqatigisani 80 Milekkoorlugu pingasunik akuersissutisivoq.
Greenland Energymi aktiat nalingi Trumpip avammut oqariartuuteqarnerata kingorna oktobarip 14-ianni 75 aamma 78 procentinik akitsorput.
Ittoqqortoormiini innuttaasut aningaasatigut iluanaarutissat eqqarsaatiginerunngilaat. Innuttaasut suliniummut piffissami sivisuumi akerliupput uuliasiorfimmullu akerliussutsimik takutitsinikuullutik.
Hans Brønlundip Greenland Energyp siulersuisuisa siulittaasuata, Larty Swets Jr.-ip illoqarfik 'ilisimasaqarfiginerulerniarlugu ilaquttani peqatigalugit nunatsinnut qaammammi matumani kingusinnerusukkut tikeraarnissani pilersaarutigigaa oqaatigaa. Swetsip tamanna KNR-imut nammineq allappaa.
Brønlundip tikeraartoqarnissaanut atatillugu akerliussutsimik takutitsinissamik isumaliutiginnilerpoq. Taassuma pisiniarfimmi mannippassuarnik pisinissaq Amerikamiunullu inuussutissarsiortunut Trumpimut tapersersuisunut milloornissani quiasaarutigaa.
Brønlund ineriartornerup ernumassutiginera paasissutissallu amigarnerat pissutigalugu politikkikkut qisuariaateqarpoq. Taanna ministeriunermut, Mette Frederiksenimut, Naalakkersuisut siulittaasuannut, Jens-Frederik Nielsenimut aamma Kommuneqarfik Sermersuumi borgmesterimut, Avaaraq S. Olsenimut ammasumik ippassaq unnukkut allagaqarpoq.
Taassuma innuttaasut nunap immikkoortuata siunissaanut atatillugu peqataatinneqarnissaat aamma oqartussat sumiiffimmut atatillugu susoqarnissaanik ersarissaanissaat kaammattuutigaa.
- Københavnimi Nuummilu issialluni aalajangiissutiinnarsinnaanngilaatigut. Uagut maani najugaqarpugut, uagut ulluinnagut, pinngortitarput siunissarpullu pineqarput, taanna allappoq.
Taassuma illersornissamut isumaqatigiissummi najukkami innuttaasunik ataqqinninnissaq aamma Kalaallit Nunaata pinngortitaanik inuusaatsimillu illersuinissaq pillugu allassimasut tamatuma saniatigut innersuussutigai.
