Ukioq manna uuliamik qillerisoqassava? Greenland Energy suliami uunnga killippoq
Amerikamiut Nunap Qeqqani uuliasiornissamik pilersaarutaat qaammatini kingullerni oqallisaangaatsiarluni apeqqutinik arlalinnik pilersitsivoq.
Naak Ittoqqortoormiini innuttaasorpassuit qilleriffiusussatut pilersaarutigineqartoq qanikkaluarlugu eqqaminni susoqarsinnaanera pillugu paasissutissinneqarsimanngitsutut misigisimapput.
- Susoqarnera ilimanngilluinnarparput, Ittoqqortoormiini piniarnermut nakkutilliisoq, Erling Madsen oqarpoq, taannalu Naalakkersuisunut ingerlatseqatigiiffimmullu suliniuteqartumut isornartorsiuilluni:
- Tusagaqarfigineq ajorpagut.
KNR-ip atorfillit ingerlatseqatigiiffiullu aqutsisui oqaloqatigalugillu suliaq maanna sumut killinnersoq piffissamilu aggersumi qanoq pisoqarnissaa naatsorsuutigineqarnersoq paasiniarlugu Naalakkersuisut nittartaanni suliniut pillugu immikkut qupperneq pilersinneqaqqammersoq misissuiffigaa.
Aatsaat aallarteqqammertoq
Uuliasioqatigiiffik Greenland Energy Company suleqatini aqqutigalugit Nunap Qeqqani uuliamik misissuinissamut akuersissutinik pisoqaanerusunik pisinnaatitaaffeqarpoq.
Ingerlatseqatigiiffiup taakku Tunup avannaani uuliamik ujaasinissamut ukiamut atorsinnaassallugit neriuutigaa.
Akuersissutit nunatta uuliasiornissamut suliniutinut nutaanut inerteqquteqalinnginneraneersuupput, taamaammat suli atuullutik.
Inuussutissarsiornermut Aatsitassanullu Naalakkersuisoqarfiup oqarnera naapertorlugu akuersissutinik taamaatitsineq taarsiissuteqartoqaqqusinermik kinguneqarsinnaavoq.
Uuliamik suli nassaartoqanngilaq, oqartussallu qillerilluni misissueqqissaartoqarnissaanut pilersaarutaasunut suli akuersissuteqanngillat.
Ingerlatseqatigiiffiup suliniummik ingerlatsinermi alloriarneq siulleq aatsaat aallarteqqammerpaa: tassa suliniummik nassuiaateqarneq.
Tamatuma kingorna qillerilluni missuinerit pilersaarutaasut marluk akuerineqarnissaannut tamanut tusarniaanerit marluk, suliamut atatillugu nalunaarusiat arlallit aamma oqartussanit akuerissuterpassuit suliarineqassapput.
Akuersissutillu pisariaqartut pissarsiarigaluarpatigilluunniit aamma qillerinerit uuliamik nassaarfiussappata uuliamik tunisassiulertoqarnissaata oqaluuserineqarsinnaalernissaanut ukiorpassuit suli ingerlasinnaapput.
Qillerinermut atortorissaarutit ilaat Nerlerit Inaannut toqqorsimasuutigineqalereerput, taakkuli akuersissuteqarnissamik suliaqarneq tamarmi naammassineqareertinnagu Nunap Qeqqanut assartorneqaqqusaanatillu atuleqqusaanngillat, Naalakkersuisoqarfik paasissutissiivoq.
Suliniut sumut killippa?
Ingerlatseqatigiiffiup suliniut arlallit piareersaatit naammassereerpai.
Avatangiisinik naliliinissamut paasissutissanik katersiniarluni avatangiisinik misissuinerit annikitsut 2025-mi ilaatigut naammassivai.
Ingerlatseqatigiiffiup misissuinermi immikkoortumi siullermi piumasaqaatit annerpaartai aamma naammassivai, quppernermi paasissutissiivimmi allassimavoq.
Suliniutilli avatangiisinut inuiaqatigiinnullu kingunissaanik inatsisit naapertorlugit naliliinerit suli amigaataapput.
Tamatuma saniatigut ingerlatseqatigiiffiup qillerinissamut atortunik Nerlerit Inaannit sumiiffimmut akuersissuteqarfiusumut nuussuinissaanut qinnuteqaataa aamma suliarineqarpoq.
Ingerlatseqatigiiffik suniarpa?
Ingerlatseqatigiiffiup pilersaarutini allanngortippai.
Sajuppillatsitsisarluni misissuinissaq aallaqqaammut pilersaarutaagaluarpoq, tassungali taarsiullugu ujarlerluni qillerinerit marluk ingerlakkusuppai.
Nunap iluani misissuinissaq sumiiffimmilu uuliaqarneranik paasiniaanissaq tassani siunertarineqarpoq.
Qillerilluni misissuineq nunamik sajuppillatsitsinermik qulakkeernerusumik ilisimasaqalersitsisarpoq, qillerinermi ujaqqat toqqaannartumik misissorneqarsinnaapput. Taamaalilluni uuliaqarnersoq aamma uuliaqassusaa imminut akilersinnaanersoq aalajangerneqarsinnaavoq.
Ingerlatseqatigiiffiup ukioq manna qillerinermik ataasiinnarmik suliaqarniarnini maanna paasissutissiissutigaa, tamannalu naalakkersuisoqarfimmi atorfillillu isumaqatigiissutigineqarsimanerarpaat. Tamanna naalakkersuisoqarfiup pisortaata, Jørgen T. Hammeken-Holmip eqqunnginnerarpaa.
- Ukioq manna misiliummik qillerisinnaanissaat isumaqatigiissutiginngilarput, taanna KNR-imut oqarpoq.
Ingerlatseqatigiiffiup qillerinerit 2026-2027-mi ukiukkut naammassisinnaassallugit neriuutigaa.
Tamannali Naalakkersuisoqarfiup pisortaata imaluunniit Nunanut allanut, Inuussutissarsiornermut Aatsitassanullu naalakkersuisup, Múte B. Egedep (IA) piviusorsiortuunnginnerarpaat.
Tamanna misissuilluni qillerinissamut suli akuersissuteqartoqannginneranik ilaatigut pissuteqarpoq.
Suliaq maanna sumut killippa?
Ingerlatseqatigiiffik suliaqarnermi immikkoortumi suli siullermiippoq.
Suliniutip nassuiaataa suliarineqarpoq oqartussallu oqaloqatigineqarput.
Tamanut tusarniaaneq siulleq suli aallartinneqanngilaq, naalakkersuisullu ingerlatseqatigiiffiup qillerilluni misissuisoqarnissamut pilersaarutit naammassisinnaanerai suli aalajangiiffiginngilaat.
Allatut oqaatigalugu suliffeqarfiup nunamut qillerummik ikkussisinnaalersinnaanissaanut oqartussanit akuersissutigineqartussarpaaluit aamma tusarniaassutigineqartussat suli amigaataapput.
Tamannalu uuliamik imminut akilersinnaasumik qallugassaqarnersoq paasineqannginnerani pissaaq.
Greenland Energy Companyp misissuilluni qillerinerit oktobarimi aallartissinnaassallugit naatsorsuutigalugu oqaatiginikuuaa. Novembarimullu kinguartinneqarpoq, tamannalu maanna decembarimut kinguartinneqartussaarpasippoq.
Ingerlatseqatigiiffilli qillerinissamut akuersissuteqarfigineqarnissaanut avatangiisinut sunniutissanik naliliinerit (VVM) aamma inuiaqatigiinnut sunniutissanik naliliinerit (VSB) tunniunneqaqqaarlutillu tamanut tusarniaassutigineqaqqaassapput, taakkulu sapaatini akunnerni arfineq-pingasuni tusarniaassutigineqaqqaassapput.
Ingerlatseqatigiiffimmi aqutsisup, Roderick McIllreep ukioq manna akuersissuteqarfigineqanngikkunik suliniut unitsinneqarumaartoq KNR-imut siusinnerusukkut oqaatigaa.
- Akuersissuteqarfigineqassagutta atortorissaarutit nunamut ikkussorlugit ukiuunerani qillerissaagut, imaluunniit akuersissuteqarfigineqassanngilagut. Taamaattoqassappat atortorissaarutit tamarmik pisiortorfitsinnut tunniuteqqissavagut, tamattalu avissaarluta ingerlaqqissalluta.
Sooruna atortorissaarutinik Nerlerit Inaanniittoqalereersoq?
Atortut Nerlerit Inaanni mittarfiup eqqaani toqqorsimasuutigineqalereersut ingerlatseqatigiiffiup qillerilluni misissuinissamut pilersaarutiminut atussallugit kissaatigai.
Atortut Inuussutissarsiornermut Aatsitassanullu Naalakkersuisoqarfimmut paasissutissiisoqarani mittarfiup eqqaanut assartorneqarput.
Tamanna ‘sakkortuumik mianersoqqussuteqarnermik’ aamma ‘siunissami assartuinissamut tunngasut tamarmik’ nalunaarutigineqarlutillu aatsitassanut oqartussanit akuerineqaqqaartarnissaannik assuarliinermik avoqqaarinermik kinguneqarpoq.
Oqartussalli atortut peersinneqarnissaannut tunngavissaqanngitsoq nalilerpaat, tassami atortut mittarfiup eqqaaniitsinneqaannarmata aamma suli atulerneqanngillat.
Aatsitassanut oqartussat oqarnerat naapertorlugu atortut umiarsualiviit niuernermut atorneqartut marluk akornanni assartorneqarnissaannut imaluunniit Greenland Airportsimut isumaqatigiissuteqartoqarneratigut mittarfiup eqqaani toqqorsimasuutinneqarnissaannut immikkut akuersissuteqartoqarnissaa piumasaqaateqanngilaq.
Ingerlatseqatigiiffiup aqutsisuata Roderick McIllreep oqarnera naapertorlugu, White Flame atortunik uninngatitsigallarnermut sapaatip akunneranut 15.000 dollarinik, tassa 100.000 koruuningajannik akiliisarpoq.
Atortulli oqartussat akuersiteqqaartinnagit akuersissuteqarfimmut nussorneqaqqusaanngillat uuliamilluunniit ujaasinissamut atorneqaqqusaanngillat.
Suliaq pillugu Naalakkersuisut sammisamut atatillugu nittartakkaminni quppernermi pilersitaanni annerusumik atuagaqarsinnaavutit.
