Ittoqqortoormiini piniartut Amerikamiut uuliasiorfiannit 100.000 koruuninik neqeroorfigineqartut
Uuliasiorfiup Greenland Energy Companyp Ittoqqortoormiini piniartut pingasut Nunap Qeqqani misiliutitut qilleriffiginiakkamini qaammammut 100.000 koruuninik akissarsialerlugit nakkutilliisuunissamik neqerooruteqarfigisimavai.
Taakku nannunik qanillattortunik ilaatigut nakkutiginnissapput.
Ittoqqortoormiini piniarnermut nakkutilliisoq, Erling Madsen suliffeqarfiup sinniisuanik innuttaasunut juunimi ataatsimiititsisoqarnerata nalaani attaveqarfigineqarsimasoq oqarpoq.
Taassuma saaffiginnissut annerusumik iliuuseqarfiginngilaa, taassumami tamanna soqutigineqarnavianngitsoq ilisimareerpaa.
- Piniartut tamanna akuerinavianngikkaa nalunngereerpara. Qaammammut 150.000-inik 200.000 koruuninilluunniit neqerooraluarpata tamanna akuerineqarnavianngilaq.
- Pisiarineqassanngilagut, Erling Madsen oqarpoq.
Piniarnermut nakkutilliisup oqarnera naapertorlugu taanna suliffeqarfimmit pingasoriarluni attaveqarpoq. Pingajussaanillu attaveqarneranni allamik ujarlertariaqartut oqarfigisimavai.
- Allamik nassaarsimagunanngillat. Taamaattoqaraluarpammi tusarsimassagaluarpara.
Najukkameersunit sulisoqarniartoq
Greenland Energy Companyp najukkameersut qulit paarlakaattumik sulisussatut atorfinitsinniarlugit aamma neqerooruteqarfigai.
Erling Madsenip oqarnera naapertorlugu taakku qaammammut 100.000 koruuninik akissarsiaqartinniarneqarput.
Taannalu nammineq suliffeqarfiup Ittoqqortoormiini attaveqaataatut atuuffeqartussatut aamma neqeroorfigineqarsimanerarneqarpoq, taassuma saaffiginnissutinik ingerlatitseqqinneq uuliasiornissamillu suliniut pillugu oqaloqatigiinnermut sunniuteqarnermut ikiuinissaq ilaatigut suliarisassallugit.
Aammattaaq innuttaasunik ataatsimiititsinermi akunnernik marlunnik sivisussuseqartumi oqalutsitut atuunnissamut 10.000 koruuninik neqeroorfigineqarsimavoq.
Tamanna qujaannarfigaa.
- Ittoqqortoormiini innuttaasut suliffeqarfiup tikeraarnera toqqissisimanngissutigaat. Pisiarineqapajaartutummi misigisoqassaaq, Erling Madsen oqarpoq.
Suliffeqarfiulli nunatta kitaani ilinniartitsisoq oqaluttaasussatut sulisikkaa, taanna oqarpoq.
Nunami pissutsit
Uuliasioqatigiiffiup sinniisui suliniummut akerliuneq Nuummi Danmarkimilu inunnit annertusarneqartoq arlaleriarlutik oqaatigaat.
Ittoqqortoormiini inuit sumiiffimmi inuussutissarsiornikkut ineriartortoqarnerulernissaa pitsaasumik isigigaat oqaatigaat.
- Tamanna toqqaannartumik salluneruvoq, Erling Madsen oqarpoq.
- Innuttaasut akerliulluinnarput, qilleriffiusussarlu ukiukkut piniarfigisaritsik oqaatigalugu. Tassani umimmanniartoqartarpoq.
Piniartut arlallit suliffeqarfik nunamut tulanniarpat assersuiniarniarlutik oqaluuserigaat taassuma oqaatigaa.
- Kikkut tamarmik pissutsit toqqissisimanngissutigaat, Erling Madsen oqarpoq.
Suliffeqarfinnik pilersitsissasoq
KNR-ip isornartorsiuinerit Greenland Energy Companymut saqqummiuppai, tassanngalu ima akissuteqartoqarpoq:
- Najukkameersunik 15-inik aamma piniartunik arlalinnik misissuinerup nalaani atorfinitsitsinissamik pilersaaruteqarpugut. Tamanna Ittoqqortoormiini innuttaasunut juunimi ataatsimiititsinermi oqaatigaarput, neriorsuut tamanna malinniarsaraarput. Najukkami suliffissanik pilersitsinissaq pitsaasutut isigaarput.
- Qillerinissamut suli akuersissuteqarfigineqannginnatta sulisussanik atorfinitsitsineq suli aallartinngilarput. Taamaammat akissarsiat arlaannut aamma oqaluuserinngilagut. Kisianni qaammammut 100.000 koruuninik akissarsiaqartinneqarneq misissuiffimmi ulloq unnuarlu najuuttariaqarfiusumi sulinissamut akissarsiaritinneqartup naligaa.
- Suliassat suliarisassaat suliniummut pisariaqarput. Najukkamiittut suliffik kissaatiginngikkunikku atorfiit nunanit allanit inuttalerneqassapput. Najukkami piniartunik ukioq manna sumiiffimmi suliaqarnermi nannunik nakkutiginnittussanik sulilersitsereerpugut. Atuuffiit taakku akissarsiassarissaarfiupput, taakkumi piginnaasaat qaqutigoortuullutillu suliniummut pingaaruteqarput.
- Taakku saniatigut inuit ataasiakkaat akissarsiaat pillugit oqaaseqarnissarput naleqquttuusorinngilarput.
