Innuttaasunut uulia pillugu ataatsimiititsineq: Ittoqqortoormiini najugaqartut ernumapput, ineriartortoqartikkusuppaalli

Iluarsisaq: Siusinnerusukkut allaaserisami oqaatigineqarpoq, amerikamiut suliffeqarfiutaat Greenland Energy Company pisinnaatitsissuteqartoq. Tamanna eqqunngitsoq, Inuussutissarsiornermut Aatsitassarsiornermullu Naalakkersuisoqarfiup KNR-imut paasissutissiissutigaa. White Flame Energy A/S pisinnaatitsissuteqartuuvoq. White Flame tuluit suliffeqarfiutigaat. Greenland Energyp White Flame sinnerlugu qillerinerit ingerlatissavai. KNR-ip kukkuneq iluarsivaa ajuusaarutigalugulu.

Ittoqqortoormiini najugaqartut uuliasiortoqarniarneranut qanoq isumaqarnertik Amerikamiunit pigineqartup, Greenland Energyp innuttaasunut ataatsimiititsinnginnerani oqaluttuaraat.

Isummallu assigiinngillat.

Hans Brønlund najukkami siunnersuisoqatigiinni siulittaasoq, Greenland Energyp illoqarfimmi ineriartortitsisoqarnissaanut qulakkeeruteqarnissamut atsiugassaanik arfinilinnik piumasaqaateqarpoq.

Piniartunut illuaqqanik nutaanik sanaartornissaq, wellness, naluttarfik kissartoq timersortarfik nutaaq allallu ilaatigut piumasaqaatigineqarput.

Sanaartugassanik suliassinneqartartup, Ittoqqortoormiineersup Amerikamiut inuusuttunut suliffissanik pilersitsinissaa pisariaqartinneqartumillu ineriartortitsisoqarnissaa pitsaasutut isiginerarpaa.

Piniarnermik nakkutilliisoq, Erling Madsen aamma piniartorsuaq Aage Hammeken Danielsen allatut isumaqarput.

Taakku suliffeqarfiup piniarnermut qanoq sunniuteqarnissaa ernumassutigaat.

Najukkamilu siunnersuisoqatigiit siulittaasuat, Hans Brønlund isummaminik allannguivoq.

Peqataatitsineq amigaataasoq

Erling Madsenip Ittoqqortoormiini najugaqartut suliniut tusagassiuutinit allaaserineqalersinnagu tusarsimanagu oqaatigaa.

Taamaammat innuttaasunut ataatsimiititsisoqarnerani susoqarnissaa pissangagaa.

Taassuma Greenland Energyp Jameson Land Basinip nunarsuarmi uuliaqarnerpaasinnaasut oqaatigineqarnera aamma uissuummissutigaa.

- Uissuumminaqaaq. Suliffeqarfimmik 80-ikkunni misissueqqaartoqarnikuuvoq, suliniulli qanoq inerneqarnersoq tusarfiginngisaannarparput.

- Ittoqqortoormiini najugaqartunut tupannalaarunarput, tusaaneqanngingajakkattami.

Innuttaasunik ataatsimiititsineq Greenland Energy Companyp aaqqissuunneqarpoq, ingerlatsinermilu pisortaq kiisalu pisortaq Robert Price peqataapput.

Erling Madsenilli naalakkersuisut Ittoqqortoormiini innuttaasunut paasissutissiinissaat amigaatigaa.

Malittarisassalli malinneqartussaanerat suliffeqarfillu misissuinissamut maanna akuersissuteqarfiusoq taassuma paasisinnaalluarpaa.

- Susassaqarfimmut naalakkersuisoq ujartorparput. Suliffeqarfik 20-kkut aallartinnerannili akuersissuteqarfigineqartoq tusagassiuutit aqqutigalugit kingorna tusarparput. Taamaammat taanna iliuuseqarfigisinnaavallaanngilaat. Taamaammat pitsaanerpaamik qanoq pissarsiaqarfigisinnaanerlugu takussavarput.

Piniartunut ernumanartoq

Erling Madsenip Greenland Energy Companyp suliaqarnerata umimmaqatigiiaanut sunniuteqarnissaa ernumassutigalugu oqaatigaa.

- Piniartarfitsinnut; pingaartumik umimmanniarfigisartakkatsinnut tunngatillugu isumaqatigiissusiuinnarsimanerat pakatsinartorujussuuvoq.

- Misissueqqaartoqarnissaanut akuersissuteqaannarsimanerat illoqarfitsinni maani innuttaasunit pingaakujunnerunerannut takussutissaasoq isumaqarpunga.

Ittoqqortoormiini piniartut peqatigiiffiata siulittaasuata, Åge Hammeken Danielsenip umimmaat akornuserneqarnissaat sumiiffimmullu allamut nuunnissaat aamma qularutiginngilaa.

- Umimmaammi neqaat maani piniartuunissamut tunngaviit ilagilluinnarpaat. Umimmaat tassaniittut akornuserneqarunik allamullu immaqa nuukkunik tamanna kingunerluuteqangaatsiarsinnaavoq.

- Umimmaqatigiiaat ungasingaatsiareersut kangerlummut suli ungasinnerusumut nuussapput, sivisunerusumillu piniarneqartariaqassapput.

Åge Hammeken Danielsenip siorna misissuisoqarnerani Jameson Land Basinimeeqataasimalluni oqaatigaa.

Taassuma nuna kusanarluinnartoq takuaa.

- Mingutsinneqarpat uggornartorujussuussaaq.

Ittoqqortoormiinut ineriartortitsineq

Avgo Barselajsen Ittoqqortoormiini sanaartugassanik suliassinneqartartuuvoq.

Taassuma Amerikamiut illoqarfimmut ineriartortitseqataanissaat qilanaarutigaa.

- Suliffeqanngitsorpassuupput. Suut tamarmik allanngussapput, sunniivigineqanngitsorujussuuvugummi. Ukiut tallimat qulillu ingerlaneranni illoqarferujussuaqalissaaq.

Siunissami uuliasiornermi avatangiisinut mianerinninnissaq eqqarsaatigalugu, Greenland Energy Companyp inatsisinik maleruaanissaa Namminersorlutillu Oqartussat nakkutilliinissat naatsorsuutigaa.

- Annertuumik qularnaveeqquteqanngippata Kalaallit Nunaat soorunami akuersinavianngilaq.

- Nunamiitillutilli uuliakoorunnaartitsipallassinnaapput. Nordsømitulli imaaniinngillat. Nunami uuliasiorneq isumannaannerujussuuvoq.  

Naalakkersuisut uuliasiornissamut akuersissutinik nutaanik 2021-mi tunniussineq inerteqqutaalersinniarlugu aalajangerput. Greenland Energy Company uuliasiornissamut akuersissummik inerteqqutip atuutilinnginnerani tunineqarput.

Avgo Barselajsenili isumaqarpoq, ineriartorneq inerteqquteqalernermit unitsinneqassanngitsoq.

- Isumaqarpunga sutigut tamatigut aallartitsisoqartariaqartoq. Pinngitsoorani.

Uukapaatinneqartutut misigisimasoq

Ken Madsen innuttaasunut ataatsimiititsinermut peqataavoq amerikamiorlu pisortaq Robert Price arlalinnik apeqquteqarfigaa.  

Ataatsimiititsinerli naammassimmat salloqittagaasutut misigisimavoq.

- Innuttaasunut ataatsimiititsineq piviusuunngitsunik ulikkaarpoq. 

Apeqqutigisatit akissutissarsivigit?

- Toqqaannartumiunngitsoq. Uuliasiornermit uuliamik qanoq annertutigisumik qalluissanersut erseqqissumik akissutissarsinngilara.

- Uuliamik nappartanik 13 milliardinik nassaarnissartik qularinagu oqaatigigaat nutaarsiassani atuarsinnaavarput. Taassumalli massakkut tamanna suli nalunerarpaa. Taamatut akineqarnissara naatsorsuutiginngikkaluarpara. 

Robert Pricep Kalaallit Nunaanni avatangiisinut illersuiniarnermi malittarisassanik eqquutitsinissartik innuttaasunut ataatsimiititsinermi oqaluttuaraa.

Uuliali qanoq assartorneqarniarnersoq Ken Madsenip suli akissutissarsinngilaa. 

- Tamannali akissutissarsinnginnatsigu suli nalornissutigaarput.

Hans Brønlund, Ittoqqortoormiini najukkami ataatsimiititaliami siulittaasoq, ingerlatseqatigiiffiup illoqarfimmut qanoq ineriartortitsinissaanut arlalinnik piumasaqaateqarpoq.

Suliniummulli isiginnittaatsini ataatsimiinnerup kingorna allanngortippaa.

- Perarfissatsialattut isigigaluarpara. Maani uuliasiornissaat maanna kissaatigiunnaarpara.

- Innuttaasunik ataatsimiititsipput, isumaqarpungali akuersitinniarsariinnarluta tamaanngartut. Uppernassuseqanngillat. Uukapaatitseriaanertut isigaara.

Robert Price uuliasioqatigiiffik uuliamik nassaassappat uuliasiornissamullu akuerineqarpat, aningaasaateqarfimmik Ittoqqortoormiit ineriartortinnissaannut iluaqutaasussamik pilersitsiumaarluni innuttaasunik ataatsimiititsinermi oqarpoq.

Arlallilli salloqittarneqartutut misigisimanerat Hans Brønlundip oqaluttuaraa.

- Allatut oqaloriarlutik allatut iliuuseqarniartutut pissuseqarput. Tamanna ataatsimeeqataasunit allanit aamma malugineqarpoq. Misigisimavunga iluanaarniapiluffiginiarsarigaatigut.