Amerikamiut uuliasioqatigiiffiata suleqatimi Tuluit Nunaanneersup piginneqataaffii pisiarerusukkai
Greenland Energy Companyp suleqatigisani 80 Mile, tuluit suliffeqarfiutaat nunatsinni aatsitassarsiornissamut arlalinnik akuersissutilik pisiarerusuppaa.
Sermitsiaq 80 Milep nittartagaani niuertut aningaasarsiuteqartullu allat niueqatigiittarfianni nalunaarummut innersuussilluni taama allappoq.
Suliffeqarfiup illuatungeriit pigineqataassutinik niueqatigiinnissamut atugassaatitaagallartut pillugit, 80 Milep Greenland Energymit pigineqalernissaanut isumaqatigiissuteqarsimanertik, tassani ilisimatitsissutigaa.
Tamannali Naalakkersuisunit aatsaat akuerineqarpat naammassineqarsinnaavoq.
80 Milemi pisortaq, Roderick McIllree, Greenland Energy Companymi suliinnarnissani naatsorsutigalugu Sermitsiamut oqaatigaa. Tamannali Robert Pricep siulersuisullu aalajangigassaraat.
McIllreep oqarnera naapertorlugu, siunissami aningaasassaqarnissaq qulakkeerniarlugu niueqatigiittoqarpoq.
- Tamanna aningaasaliissutinik pissarsinissamut periarfissatsialaavoq. Amerikap Avannaani niuertut aningaasarsiuteqartullu allat niueqatigiittarfianni nunarsuarmi annerpaartaraat, tassanilu suliffeqarfittut nalunaarsorneqarutta siuarsaaniarnikkut suliniutigut piviusunngussappata aningaasassaqartilissavagut, Roderick McIllree Sermitsiamut taama oqarpoq.
Kalaallit Nunaanni aatsitassarsiornermi akuersissuterpassualik
80 Mile nunatsinni aatsitassarsiornermi akuersissutit arlallit pigivai.
Suliffeqarfik immikkoortortani aqqutigalugit Nunap Qeqqani uuliasiornissamut pingasunik akuersissuteqarpoq, Qeqertarsuup eqqaani sumiiffimmi anngajaami Nuussuarmilu aatsitassarsiornissamut arfinilinnik akuersissuteqarluni, sumiiffinnilu taakkunani kanngussamik, nikkelimik, koboltimik platinimiillu saviminissamik nunap iluanit aatsitassarsiortoqarusuppoq.
Ilaatigut aamma tuluit suliffeqarfiutaat saviminissamik titaniumitalimmik Moriusap eqqaani piiaanissamik akuersissuteqarpoq.
Aatsitassarsiornermi suliniutini taakkunani piginnittuuffik niueqatigiinnikkut Amerikamiut suliffeqarfiutaattut niuertut aningaasarsiuteqartullu allat niueqatigiittarfianni nalunaarsorneqalissaaq.
- Suliffeqarfiit taakku katinneri oqimaaqatigiinnerulersitsillunilu ingerlatsinermut aningaasartuutikinnerulersitsissaaq aamma nakkutilliinermut oqartussaasut ataasiinnarmik attavigisassaqalissapput, taamaalilluta akuersissummik pissarsiniarneq ingerlateqqissinnaassavarput, Roderick McIllree Sermitsiamut oqarpoq.
Greenland Energyp siulersuisuini siulittaasup Larry Swetsip niuernissamut siunnersuut nunatta siunissaq ungasinnerusoq eqqarsaatigalugu ineriartortitsinneqarnissaanut periarfissaalluarnerarpaa.
Taassuma oqarneq naapertorlugu, ‘Kalaallit Nunaat peqatigalugu Kalaallit Nunaallu pillugu, Kalaallit Nunaanni suliffeqarfissuarmik sananissaq’ siunertaavoq.
- Kalaallit Nunaata pinngortitaa pisuussuteqaqaaq periarfissalli piviusunngortinneqassappata aningaasat, attaveqaatit, teknikikkut immikkut ilisimasallit aningaasaliisinnaasullu utaqqisinnaasut pisariaqartinneqarput. Ingerlatseqatigiiffiit ataatsimoortinneqarnerisigut tunngavimmik nukittunerusumik Kalaallit Nunaannut aningaasaliissuteqarfiusinnaasumik kalaallinut periarfissanik pilersitsiffiusinnaasumik pilersitsisinnaasoraagut, suliniutinillu akisussaassusilimmik ineriartortitsisinnaalissalluta Kalaallit Nunaata aningaasaqarneranut siumungaaq namminerlu aningaasaqarnikkut oqartussaanerulernissaanut iluaqutaasinnaasumik, niuertut aningaasarsiuteqartullu allat niueqatigiittarfianni nalunaarummi taama allaqqavoq.
