Amerikamiut uuliasioqatigiiffiata Nunap Qeqqani misiliilluni qillerinissat kinguartikkai

Tuluit ingerlatseqatigiiffiata 80 Milep kalaallit aatsitassanut oqartussaasuinik aamma suleqatissartik Amerikamiunik pigineqartumik Greenland Energymik oqaloqateqarnermi kingunerisaanik Nunap Qeqqani misiliummik qillerinissamut pilersaarutini aappaagumut allanngortinniarlugit aalajangerpaa.

Greenland Energy piffissaliinermut pilersaarumminnik allanngortitsinissamik pisariaqartitsiviusumik naalakkersuisunit paasissutissanik pissarsisimalluni tusagassiuutinut nalunaaruteqarpoq.

Ingerlatseqatigiiffiit marluk taamaalillutik akuersissutinik pisariaqartunik pissarsinissamik 2027-mi ukiup tungaanut suliaqassallutik, 80 Mile paasissutissiivoq.

Ukiup aallartilaarnerani imaluunniit naajartornerani?

Ingerlatseqatigiiffiulli 'ukioq 2027' qanoq isumaqartinneraa ersarinngilaq. 

2027-mi januaari, februaari imaluunniit marsi pineqarsinnaapput, kisianni aamma 2027-mi oktobari, novembari decembariluunniit pineqarsinnaavoq.

Erseqqinngitsumillu oqaasertaliineq ingerlatseqatigiiffiup aningaasaliisuinit ilaatigut maluginiarneqartoq, eqimattat nittartakkatigut allaqatigiittarfianni allassimavoq. Piginneqatigiissutip nalinga tusagassiuutinut nalunaaruteqartoqarnera kingunitsianngua malunnartumik appariartulerpoq.

Ingerlatseqatigiiffiup pilersaarutini maanna allanngortillugillu siunissamut pilersaarusiorniarluni allappaa. Ilaatigut 'najukkami inuiaqatigiinni, pilersaarusiornermi suleqatigisanut aamma oqartussanut attuumassuteqartunut atassuteqarnermi nukittorsaaneq'.

Ingerlatseqatigiiffiup kalaallit oqartussaasui qanimut suleqatiginerat ingerlateqqissavaa akuersissuteqarnissamullu suliaqarneq pillugu erseqqarinnerusoqalerpat qillerinissamut pilersaarummut piffissaliineq pillugu paasissutisseeqqikkumaarlutik, allappaat.

Pakatsisut suliarli ingerlaqqissasoq

Rod McIllree 80 Milep tusagassiuutinut nalunaarutaani piffissaliussap kinguartinneqarnera uggoralugu oqaatigaa, tamatumali saniatigut ingerlatseqatigiiffiup 'pilersaarutip ilippanaateqarluartup ineriartorteqqinnissaa tamakkiisumik tunniusimaffigalugu' erseqqissaatigaa.

- Kalaallit oqartussaasuinik oqaloqatiginninneq ingerlatiinnassavarput, akuersissutillu pisariaqartinneqartut naammassiniariartut qillerineq aallartikkumaarlugu.

- Nunap Qeqqa 80 Milemut misissuinissamut periarfissatsialaavoq, oqartussallu sulinerat naammassippat qillerinissatsinnut pilersaarutit misissuiffissatullu pingaartitatta misissornissaat qilanaaraarput.

Amerikamiut uuliasiortut kimigiisertut

Pisut kingulliit Amerikamiut uuliasioqatigiiffiat pillugu oqaluttuami unikkallarnermik ersersitserpasipput.

Amerikamiut anguniagaqallaqqissut uuliasioqatigiiffimmut aningaasaliisut pissusilersuutsitik oqaatsitillu pissutigalugit nunatsinni nunattalu avataani tupigusuutigineqarput. 

Uuliasioqatigiiffik suliani akerleriiffiusuni tulleriiaartumik upernaarli akuliuttarpoq - ilaatigut Ittoqqortoormiini innuttaasunut ataatsimiisitsinermi iluatsilluanngitsumi, Trumpimik nuannarisaqarluinnartumik Dr. Philimik sulilersitsinermini akuersissutillu pisariaqartinneqartut suli pissarsiarinagit qillerinermi atortunik mittarfimmut Nerlerit Inaannut tikiussinermini.

Malinnaasut arlallit uuliasioqatigiiffiup Amerikamiut aqutsisuinut, nunatsinnik piginnilernissamik suli anguniagaqarpasittunut, attuumassuteqarnerat allaat eqqarsaatersuutigaat.

Uuliasioqatigiiffiup akuersissutisinissamini sumut killinnera tusagassiuutinit sapaatip akunnera kingulleq sammineqarnerulerpoq naalakkersuisullu paasissutissanik nutaanik saqqummiussipput. Aammattaaq tusagassiuutit nunanit tamalaaneersut arlallit pisut saqqummiuppaat.

KNR-ip 80 Milep pisortaa, Rod McIllree, nutaarsiassaq pillugu maannalu qanoq pisoqarnissaa pillugu oqaluukkusukkaluarpaa, allaaserisalli saqqummiunneqannginnerani oqaaseqartinneqarsinnaasimanngilaq.