Polar Seafood Nuummi tunisassiuinnarniarluni USA-mit raajanik tikisitsissasoq

Nunatsinni raajaleriffiit nunarsuup illuatungaanit raajanik suliassaminnik tikisitsiffiusariaqalerput.

Manerassuarmit containerit raajanik imaqartut Polar Seafood Greenlandip tunisassiorfianut Polar Raajat Nuummut oktobarimi tikissapput.

Suliffeqarfik Polar Raajani tunisassiuinnarniarluni taama iliuuseqartariaqarpoq.

Raajat ilaat Pandalus jordanimik taaguuteqarput USA-meersuullutillu. Taakku Nuummi tunisassiorfimmi suliarineqassasut, Polar Seafood tusagassiuutinut nalunaarummi paasissutissiivoq.

Suliffeqarfiup oqarnera naapertorlugu nunatsinni raajartassiissutit ikiliartuinnarnerat tunisassiassanillu pissarsiniarnerup ajornakusooraluttuinnarnera raajanik eqqussisariaqarnermut pissutaavoq.

Raajanik tikisitsinermi tunisassiornerup annikilliartuinnarnissaa pinngitsoortillugulu tunisassiorfimmi suliffissaqartitsinissamut qulakkeerinnissutaassaaq.

- Tunisassiornerup ingerlaannarnissaa siunertaralugu raajanik Manerassuarmeersunik tikisitsisariaqarnerput, pissutsit qanoq ilungersunartiginerannut takussutissaavoq, Polar Seafood Greenlandimi pisortaq, Bent Salling oqarpoq.

Taassuma eqqussisariaqarneq ajornartoornermi aaqqiissutaasoq periusissiaanngitsorlu erseqqissaatigaa.

Suliffeqarfik raajanik nunatsinneersunik tunisassiorusunneruvoq, kisianni pisassiissutit pitsaanerulernissaat tunisassiorfik suliaqartinnagu utaqqiinnarneqarsinnaanngilaq.

- Raajartassiissutilli tunisassiornermik ingerlatsinissamut naammanngippata, assagut sarliaannarlugit iliuuseqartoqarnissaa utaqqisinnaanngilarput. Periarfissanillu ujartuisariaqarluta, taanna oqarpoq.

Suliffeqarfiup raajanik suliassanik pissarsiniarnerup ajornakusoornera tunisassiorfiit tamakkiisumik atorneqarnissaannut ajornarnerulersitsisoq nassuerutigaa.