Aasiaat siunissaat: Polar Seafood neqerooruteqartitsinermi toqqarneqartoq

Ingerlatseqatigiiffiit sorliit qaleralittassanik, saarullittassanik nataarnartassanillu tunineqarnersut aalajangerneqarpoq. 

Neqerooruteqartitsinerni siullermi aappaanilu toqqarneqartut tassaapput: Siku Trawl aamma Qeqertalik Seafood.  

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik tusagassiuutinut nalunaarummi allappoq:

- Naalakkersuisunut aalisarnikkut pisuussutivut ataatsimoorussavut sapinngisamik amerlanerpaanut iluaqutaanissaasa qulakkeernissaat pingaaruteqarpoq. Tunniussinerit marluk aqqutigalugit avataasiorluni aalisarnermi ingerlatseqatigiiffinnik najukkaneersunik nutaanik ilanngussivugut, Aasiannilu suliffissat tunisassiornerlu qulakkeerlugit, aalisarnermut naalakkersuisoq, Peter Borg oqarpoq.

Royal Greenlandip Polar Seafoodillu neqerooruteqartitsinermut 2-mut neqeroorsimanerat KNR-imit piffissami kingullermi allaaserineqarpoq, tassani suliffeqarfiit Aasianni suliffissanik qanoq pitsaanerpaamik qulakkeerinnissinnaanerat tunngavigalugu aalajangiisoqassalluni.

Neqerooruteqartitsinermi Polar Seafood toqqarneqarpoq. Qeqertalik Seafoodimimi piginnittut Polar Seafoodimik aamma piginnittuupput.  

Aasiaat pilerngunneqarnera

Royal Greenland Polar Seafoodilu Qeqertalik Seafood aqqutigalugu neqerooruteqartitsinermut 2-mut neqerooruteqarput, tassani kitaani qaleralittassiissutit 2.468,5 tonsit (IOK) Tunumilu saarullittassiissutit 5.000 tonsit agguarneqassapput.

Royal Greenlandip pisassiissutit 75 procentii Aasiannut tulaattarniarlugit iluanaarutillu 5 procentii Aasiannut aningaasaliissutigisarniarlugit oqaatigereeraluaraa, Polar Seafood toqqarneqarpoq.   

Qeqertalik Seafood A/S toqqarneqarpoq. Ingerlatseqatigiiffiup ukiuni qulini aggersuni ukiumut minnerpaamik 54-59-inik sulisunik sulisitsinissani qulakkeerniarmagit, aalisakkat sorliit tunisassiarineqarnersut apeqqutaatinnagu, tusagassiuutinut nalunaarummi allassimavoq.

Qeqertalik Seafoodilli Aasianni qaleralittassiissutinit 25 procentiinnarnik ukiuni qulini tulaassinissamut pisussaaffeqartoq, tusagassiuutinut nalunaarummi allassimavoq.

Qeqertalik Seafood Polar Seafoodimi piginnittut Miki Jonas Brønsip, Bent Friis-Sallingip Laila Friis-Sallingillu saniatigut Knud Palle Brønsimit, Nive Gitte Brønsimit aamma Nauja Erna Brønsimit pigineqartoq, cvr-imik nalunarsuinermi allassimavoq. Qeqertalik Seafoodilli suliffeqarfimmik piginneqataasut 20-t sinneqartut paasissutissiissutigaa.

Suliniuteqartut nutaat

Neqerooruteqartitsinermi siullermi Siku Trawl nunatta kitaani qaleralinnik 2.468,5 tonsinik, saarullinnik 1.950 tonsinik aamma nataarnanik 166,6 tonsinik pisassiissuteqarfigineqarpoq.

CVR-imi nalunaarsuiffik naapertorlugu, ingerlatseqatigiiffimmi Finn Meinel, Ernst Mikael Lund, Jeppe Jensen, Pavia Kunuk Egede Lund aamma Tsatso Bent Johannes Martin Efraimsen piginnittuupput. Piginnittulli 30-nit amerlanerusut Siku Trawlip ilisimatitsissutigaa.

Naalakkersuisut neqerooruteqartitsinermut qinnuteqaatit katillugit arfinillit tiguaat.

- Tunniussinerup siunertaraa aalisarnermi avataasiortumi piginnittuunerup ingerlatseqatigiiffinnut najukkaneersunut amerlanernut siammarnissaa, tusagassiuutinut nalunaarummi allassimavoq:

- SiKu Trawl A/S ingerlatseqatigiiffik nutaajuvoq, piginnittunik nutaanik peqarluni pilersinneqartoq, ingerlatseqatigiiffiullu ineriartortitsinissamut pilersaarutaani aamma Kalaallit Nunaata Kujataani Narsamullu aalisarnerup inuussutissarsiornermillu ineriartortitsinermik nukittorsaanissaq immikkut ukkatarineqarpoq.

Aalisarnermut naalakkersuisoqarfiup Siku Trawl aamma Qeqertalik Seafoodip piumasaqaatit naammassineraat ingerlaavartumik malittarissallugit oqaatigaa.