Aasiaat siunissaat pillugu: Royal Greenland pisassiissutit pilerngunneqarnerannut ilannguppoq
Polar Seafood pisassiissutinik kitaani qaleralinnik 2.468,5 tonsinik Tunumilu saarullinnik 5.000 tonsinik tunineqarusuttuni kisimiinngilaq.
Royal Greenland Ice Trawl Greenland, Inugguit Seafood Arctic Fish Greenlandilu peqatigalugit Aasiaat Trawl pilersippaat, pisassiissutinillu tassanngaanniit qinnuteqarlutik. Taakkulu Aasianni suliffissaqarniarnerup qulakkeerneqarnissaa pingaartippaat.
- Soorlumi ilaatigut oqarpugut Aasiaat Trawlip qaqitaasa 25 procentiinnaa tulaannagit 75 procentii tulaattarusuppagut. Tassa annertoorujussuarmik, piumasaqaatit 25 procentiungaluartut 75 procentii uagut tulaattarusuppagut Niels Thomsen KNR-imut oqarpoq.
Polar Seafoodip ilisimatitsinera naapertorlugu, naalakkersuisut neqerooruteqartitsinermi aalajangiunneqartut tallimanngornermi aggustip 21-anni saqqummiutissavaat.
Ingerlatseqatigiiffik nutaaq Aasiaat Trawl Royal Greenlandimiillu pigineqartoq, pisat amerlanerpaartaannik Aasiannut tulaassinissamut taamaallaat pisussaaffilersimanngilaq. Sinneqartoorutimilli ilaannit illoqarfimmut aamma aningaasaleerusupput.
Neqerooruteqartitsinermi amerlanerusunik neqerooruteqartoqartoq
Neqerooruteqartitsinermi juulip aallartinnerani saqqummiunneqartumi, marluk neqeroorfigineqartussanngorlugit saqqummiunneqarput.
Naalakkersuisut neqerooruteqartitsinermi 2-mi, Aasianni suliffissaqartitsiniarneq aamma pisat ikinnerpaamik 25 procentii Aasiannut tulaanneqartarnissaat pingaarnerutinneqarpoq.
Royal Greenlandili ingerlatseqatigiiffiit pingasut peqatigalugit 75 procentinut procentinut amerliniarlugit aalajangerput.
- Tassa tassuunakkut maluginiarsimagatsigu imaluunniit oqallinnermi maluginiarparput pingaartinneqartorujussuusoq Aasianni tunisassiorfissuup ingerlaannarsinnaanissaa, Niels Thomsen oqarpoq:
- Taamaammat piumasaqaataasoq tusarparput imaluunniit kissaatigineqartoq tusarparput taavalu piumasaqaat 25 procentiinnaagaluartoq 75 procentinut qaffapparput, neriulluta tamanna uagut tigujumaarlugu.
Aasiaat Trawl tulaanneqartartussat amerlanerulersinneqarnerisa saniatigut iluanaarutimi 5 procentii Aasianni inuussutissarsiornerup ineriartorneranut aningaasaliissutigisarusuppaat.
- Oqallinnerup ilaaniippoq illoqarfiup ineriartortinnissaa, tassa nunap immikkortuata ilaata ineriartortinnissaa pineqarami. Taamaammat tusarnaaqqinnaarsimavarput oqartussat, tassa politikkikkut aalajangiisartut qanoruna oqariartuuteqartut:
- Taamaammat una 5 procentimut tunngasoq, pisassiissutit pissarsiarinissaat piumasaqaatinik saqqummiussinermi eqqaaneqanngikkaluartoq, uagut isumaqarsimavugut tamanna tulluartuusoq, tassami piumasaqaataanngikkaluarpoq, kisianni kissaatigineqartunut ilaagami sumiiffimmi ineriartortitsisoqarnissaa.
Niels Thomsenip aningaasat qanoq amerlatigissanersut oqaatigisinnaanngilaa, qalerallilli saarulliillu "akigissaarmata" aningaasat ikigisassaannginnerarpai.
Polar Seafoodip suleqatiginera
Neqerooruteqartitsinermi pisassat amerlasuut pineqarput. Tamanna pilugu Royal Greenland taama isumaqarpoq.
- Tassa aalisakkat pineqartut taakkua aammalu allat imarmit pisuussutit soorunami uatsinnut pingaaruteqartorujussuupput, soorlu unammillertini aamma taamaattoq. Taamaammat aamma una pineqartoq soqutigisorujussuuarput, Niels Thomsen oqarpoq:
- Kisianni taannaannaannginnami tassa niuerneq kisiat pineqannginnami. Uagut pisortat suliffeqarfiutigimmatigut aningaasarsiorneq kisiat aallaavigisinnaannginnatsigu, soorlu ilaatigut eqqartukkatsinni Aasiannut tunngatillugu, illoqarfiup ilaatigut pittaatigisumik uumaannarsinnaanissaa ineriartoqqinnissaanullu toqqammavissaqarnissaa pineqarami.
Aasianni tunisassiorfik Polar Seafoodimit pigineqarpoq, Royal Greenlandilli pisassiissuutinik tunineqassaguni "pitsaasumik isumaqatigiittoqarsinnaanerarpaa".
- Ilaa akeqanngitsumik tunniussinnaannginnatsigit. Allanut immaqa nammineq tunisassiorfitsinnut immaqaluunniit allamut tunissagaluarutsigit taava akinut tunngatillugu naapertuuttorisatsinnik pissarsisarluta perusuppugut soorunalimi, Niels Thomsen oqarpoq.
