Polar Raajat: Raajartassiissutit piffissaq sioqqullugu nungunneqartut – kingunerisaa suli nalunartut

Aasianni tunisassiorfik maannakkut matunngilaq. Polar Seafoodip tamanna Facebookikkut allakkamini erseqqissaatigaa.

Suliffeqarfiup tunisassiorfiup siunissaa ukiup ingerlanerani arlaleriarluni nalorninartoqartippaa. Taakku oqarnerat naapertorlugu tamanna raajarniarneq raajartassiissutikippallaarneranik ilungersuaneranik pissuteqarpoq. Taamaammat qaleralinnik neqerooruteqarnermi ajugaassanerlutik utaqqivaat.

Suliffeqarfiup oqarnera naapertorlugu pisassiissutinik aalisagassaqarunnaarpoq, taamaammat tunisassiuinnartoqarsinnaanngilaq.

Taamaammat Polar Raajat raajanik tunisassiornini qaammat ataaseq sioqqullugu aggustip 15-ianni unitsissavaa.

Tunisassiorfik Aasianni ingerlatsinermik ingerlatsiinnarnissaminik kissaateqarnini pissutigalugu sivitsuilluni iliuuseqarsimasoq pilersaarutigineqartumiillu amerlanerusunik tunitsivigineqarsimasoq, Polar Raajani pisortaaneq, Jan Weinreich sulisunut allakkamini KNR-ip takunniffigisaani allappoq.

- Ilutigitillugu raajanut taarsiullugu tunisassiassanik nutaanik pilersitsiniarsimavugut, ajoraluartumik maannamut suli iluatsivinngitsumik, allakkami allassimavoq.

Tunisassiorfilli nioqqutissiassaqarallartillugu ammaannarallassasoq, Polar Seafood Facebookimi allappoq.

- Pisut massakkut erseqqissisippaat tunisassiassatigut tunngavissat naammattut aamma siunissamut isigaluni Aasianni tunisassiornerup aamma suliffissat aalaakkaasut qulakkeerneqarnissaannut qanoq pingaaruteqartiginersut, Polar Seafood allappoq.

Polar Seafood umiarsuup ataatsip peqataaffigisaanik montagui-raajanik misileraataasumik raajarniarnermik misileraalluni paasissutissiissutigaa. Tamanna aggustip 15-iannit naanerata tungaanut ingerlanneqassaaq.

- Fabrikkip pisarnermisut annertuumik suliaqarfiulluni qaqugu ingerlaqqilernissaa ilisimanngilarput. Neriuppugut 2026-mi oktobarip ingerlanerani tamanna pissasoq, tamannali uagut sunniuteqarfigisinnaanngilarput.

Naalakkersuisut avataani qaleralittassiissutinik, saarullittassiissutinik nataarnartassiissutinillu neqerooruteqarneq taamaatinniarlugu juulip aallartinnerani aalajangerpaat. Taarsiullugulu pisassiissutit ilaat Aasianni suliffinnik qulakkeerisinnaanerat tunuliaqutaralugu pisassiissutigineqassallutik nutaamik neqeroortitsipput.

KNR-ip Polar Seafood pisumut atatillugu apersorniarlugu saaffigaa, tamannalu malinnaaffigissallugu.

Inuussutissarsiortut qisuariartut

Sulisitsisut immikkoortortaqarfik Diskomi siulittaasuata, Søren Hansenip Aasianni najugaqarlunilu sulisup nalunaaruteqarneq maluginiarpaa.

Søren Hansenip Aasianni aningaasaliisartoqarunnaarsimanera KNR-imit kingullermik oqaloqatigineqarami oqaatigaa. Tamanna tunisassiorfiup nalornissutigineqarneranik taamaalillunilu illoqarfiup siunissaata ilarujussuata nalorninarneranik pissuteqarpoq.

Tunisassiorfik 2005-imi matummat inuit 300-t – tassa innuttaasut 10 procentiisa missaat Aasianniit nuupput.

Søren Hansen Sulisitsisut Immikkoortortaani Diskomi siulittaasuuvoq. Taassuma naalakkersuisut qaleralittassiissutinut atatillugu erseqqissaassuteqarnissaata tungaanut Aasianni inuussutissarsiuteqarneq suli nalorninartumiinnerarpaa. Assi © : Markus Valentin / KNR

Søren Hansenip Polar Raajat pisassiissutit nungunnerisa kingunerisaanik tunisassiornermik unitsitsinissamik aalajangernera nalinginnaasutut isigaa.

Naallu Polar Seafoodip tunisassiorfik maannakkut matunngitsoq nalunaarummini allakkaluaraa, tamanna pissutsinut aaqqiissuteqarfiunngitsoq Sulisitsisut immikkoortortaqarfianni siulittaasoq isumaqarpoq.

- Kikkut tamarmik Naalakkersuisut qaleralittassiissutinik nutaamik qanoq neqerooruteqartitsinissaannut utaqqiinnarput, Søren Hansen oqarpoq.

- Neqerooruteqartitsiniarneq sivisungaarmat raajarniarneq maanna naammassillutigu utaqqiinnalerpugut.

Allamik annerusumik pilersaaruteqartoqanngitsoq

Tamanna Polar Raajani sulisunut qanoq kinguneqarnissaa suli ilisimaneqanngilaq.

Søren Hansenip tunisassiornermik unitsitsineq siullertut tunisassiorfiup kiffartuussinermik inuussutissarsiuteqartunut sunniuteqaqqaarnissaa naatsorsuutigaa.

- Umiarsuarnik orserlutillu nerisassarsiniartoqarunnaassaaq, aamma umiarsuarnik iluarsartuussinerit assigisaannillu suliaqarnerit unissapput. Taakku aappaagu pisassiissuteqartoqarnissaata tungaanut uninngatiinnarneqassapput.

Tamanna qanoq sunniuteqartigissasoraajuk?

- Tamanna tamakkiisumik ajoraluartumik ilisimasaqarfiginngilarput. Neqerooruteqartitsinissamut aalajangiisoqartinnagu periarfissagut ilisimanngilagut.

Inuussutissarsiuteqartut Polar Seafood neqerooruteqartitsinermi pissarsiaqanngeriataarnissaanut allamik annerusumik pilersaaruteqarpat?

- Aasianni inuussutissarsiuteqartut ataatsimut annerusumik allamik pilersaaruteqanngillat. Suliffeqarfiit immikkut susoqarnissaa ernumassutigalugulu namminneq allamik pilersaarusiorniarsarisoraakka.

Pisortaanerup Polar Raajat tunisassiorfiani sulisunut allakkamini neqerooruteqartitsinissaq neriuuteqarfigalugu allappaa.

- Ilutigitilluguli piviusorsiortariaqarpugut, ersarissarlugulu massakkut suli tamanna qulakkeerneqanngimmat, allakkami allassimavoq.